星期五放工換行裝去錦上路跟人行,之前全不知路線,都係跟到就跟,唔得就分.一開始異常正路地跑平路,跑了一圈後開始上山,一路上都唔知係咩山,只係帶隊話5百幾級樓梯可以左上右落上完再上,一路上一路睇INGRESS同GOOGLE MAP先知係掌牛山,上到頂見路就落,落到好近村但又覺得條路好密,帶頭就回頭上返頂轉接大欖郊遊徑行大欖水塘一圈,只係30km,但個人已經開始放蚊同腳底少許痺.
之後向河背方向經越野單車徑上荃錦坳,蜘蛛網又多又大,腳底條路又變左做條河仔,好彩唔使爆林,分差口都有指示牌,不過最後都行多左一小段.上到荃錦坳去見蓮姐未開門就轉去川龍飲早茶,都係端記好食尐,可惜冇係端記食.
朋友為我着想,死都話要睇我上埋大帽頂先肯分開行,我都話行得慢,由我自生自滅都唔得,蟻行上頂時中途休息都可以抽筋,都好耐冇抽過腳板底,慘叫一聲順便嚇下朋友.雨中慢遊下山到鉛礦坳,朋友終於肯放我走,佢有佢跑,我有我慢行,轉個頭已經影都冇,上山都唔辛苦,草山向下行先慘,步步都痺到唔想行,行下休下,好多跑山友經過,有幾個都問我有冇事,口講冇但心諗我想換過對腳板底.
最後上埋針山頂,見到教室成班人上緊,人多路窄,又休息下等班人走左先下山,到燒烤場飲完汽水就去梨木樹合計64km後坐車返屋昏迷.同時朋友還在麥徑上飛奔,跑到沙田坳再轉衛徑到油塘,完成佢既90km大計.
手機中途冇電,用朋友個gps log計至鉛礦坳約57km,另加到梨木樹約7km.
