星期日半夜係青馬收費廣場集合,JT個背囊重我八倍以上,做流動士多,佢真係揹左好多野,我平時露營個背囊都係咁上下重,小背心果個背囊都有我果個五倍以上,我呢次揹1L水加支烏龍茶,兩個飽,一筒餅加頭燈,後備電,跟住就冇乜特別野.
十一點半左右係收費廣場出發,行左幾支標都好順利,不過中途新加既卜土要揾下,又有尐密密地,去到都係Hack到但唔見支標,條GPX log會見到有尐小分差來來回回,就係果尐新卜土位置.
左邊係我既,右邊係JT背囊.
行去二轉涼停
上一次玩係上年復活假,再完成個時間唔會取代舊時間,而係當我玩多次,上次計左玩44個鐘,今次14個鐘,平均就當我玩29個鐘,同小背心14個鐘平均左就變左21.5個鐘.
JT流動士多有好多野食飲品,水都有幾L,早知我應該咩都唔使帶,哈哈.
可惜JT着錯鞋來,腳跟痛要中途退出,半夜三更落返愉景灣,走之前仲有幾L水可以派,個背囊多野食/飲到嚇死人.之後同小背心繼續上路,係老虎頭落返望渡坳,訊號收得唔好,要用秘技走來走去,差尐以為可以返東涌食早餐.全程最難係望渡坳上返蓮花山一段,比上次好,地面乾好多,冇咁滑易上尐,不過中途個沼澤都係要濕腳,想唔濕既話要帶多兩個膠袋包鞋過.上返大路正好日出,真係有一天都光曬既感覺.
全晚都寒風凜凜,出左太陽我都仲要行到伯公坳先除長袖同風褸,小背心就一直都係短袖,我覺得佢鄉下可能係西伯利亞.
蓮花頂
二東
大東
鳳凰
分流開滿白色花仔,一山都係.
終於到燈塔
休返夠本先係燈塔行返出去,都有7/8km,4點前上到車返屋企交人.半夜出發可能係最好既選擇,起點同終點都有車,昂平有得食可以補給.小背心唔揹咁重最少可以再快半個至一個鐘,下次可以同JT試下,我會係屋企睇住你地去到邊.
