陽明山東西縱走

原本想行南湖大山要四日四夜,但不能成團,改行雪山只要三日三夜,多了一日可以上山,揾台北行山最後揾到陽明山東西縱走路線,可以單拖出發,朝早打的去劍潭(捷運未有咁早開),轉市巴小巴1至風櫃嘴.上車見到另一個跑山裝大叔,佢問我去行邊,我用好爛國語話東西縱走,剛好佢都係,結果變做二人同行.

前輩原來分開行過好多次,分段行係因為要帶團,假日會幫手帶團行山,類似康樂組組長.全程大部份時間天陰,間中有太陽,下午有一兩陣雨,收左相機一陣個天就停,攞返出泥又落幾下,攪到後段泥路好滑,好彩有繩可以扶住行.

朝早6:10係劍潭上車,下一班已經要十點幾.

1頂山.話雖十個山,但其實落少少行過隔離上少少又到第二個,唔係想像中咁難.

2石梯嶺,一路風景都好正,台北淡水河基隆101,盡在眼低.

3竹篙山

4七星東峰

5七星主峰,七星東峰行過去一陣就到.

落返小油坑

只係27度,唔算好熱

之後就食午餐,小油坑有小賣部,食八寶粥飲汽水.

6大屯山,之後先係難關,小心路滑.

7大屯山南峰,大屯山南西兩個峰都比較少人到,路比較難行,要預多尐時間.

大屯山之後先係最難,主要係路滑,如果秋天應該可以快好多.

8大屯山西峰

上落都泥路,路滑要小心,不過有繩可以扶,帶手套會好尐,拉繩可以快尐,隻手又冇咁痛.

上面天山之前分差口有個停,附近有松鼠,唔係好怕人.

9面天山

10向天山,之後仲有2K幾路要行,不過都係大文大路,落到低就係車站.

比想像中快,因為没有跑很多,休左幾次,又影相,中午還有停下食午餐,最後都唔使8個半鐘.