癲傻92/240

終於玩到三月最後一場,癲傻第四年,已經去到240km,第一年180km,施sir真係超人,好似唔使休咁跑,下年好似話246km,下年再計點斬件易入口尐,一次過跑太長太惡哽.

朝早7點半青衣運動場出發,人山人海,慢慢跟,玩左咁多年都知開頭跟得快未必好,見到尾燈就得.隻腳同之前跑馬果陣一樣,好返尐,但知又好唔曬.

CP1

CP2

 年年都係CP1,CP2好多人CP3開始少,CP4多數會等耐返尐,去到CP5已經係一隻馬有43km,CP6已經50km,亦係最多人離場既位,因為夠數可以有lego公仔.亦有人分兩日跑夠數,咁就易尐,一日廿幾km兩日50km,亦有人兩日加埋過一百km.

CP3,25km,已經跑左半隻馬有多

CP4

CP5

CP6,約7小時,52km

我去到CP6就只見到隊尾,休返陣再跳到CP9先再跟,輕鬆好多,但係休太多都冇乜用,之後由CP9跟到CP10沙頭角再到鹿頸有支援車,之後就跟唔到,隻腳又開始痛,一下子跑太長都係傷患復發,休一星期唔夠時間真正好返.之後同朋友行返太和,分兩段走加埋都只有82km,仲差18km先夠一百km,所以同朋友轉去CP17等大隊.

CP9,上年係間7仔,估唔到轉左估麵包店.

CP10,沙頭角海景

CP11,呢到都係多人走既CP,因為如果冇跳CP,呢到已經跑左102km.

CP12

 CP17之後就休下隻腳,希望可以捱到多十幾km收工,但係等到大隊到左,我地都未出到發,朋友凍到手都震,佢消耗太多,之前冇跳CP跑左百幾km,諗住陪我跑多十幾km收工,但朝早未出太陽果陣落雨,好鬼凍,佢對腳都唔好得我好多,所以又休耐尐休到太陽出來.雨停左陣,我就打算出發,但朋友件風褸太薄好凍頂唔順,只好我一個出發,跑左一陣隻腳都係痛,都係行既多,一個鐘得5km,到行左6km時電話冇電,我都唔識路,剛好有場雨,都係返屋企沖個熱水涼休養下,下年再戰.最後86+6=92km收檔.

CP17

少左一年220km,我有跑但唔夠50km冇人仔,得三個人仔係我既,其餘三個係幫人暫時寄存.

首爾馬拉松

之前老婆同個仔計劃左三月中去旅行,冇人看管就又想去散下心,但又冇假,兩日旅行揾尐野做先好似充實尐,就八下有冇馬拉松可以跑下,原來同一日有三隻馬,一個大陸清遠,一個台灣萬金石, 一個韓國首爾,最好跑應該係首爾,所以就去報名.

講報名,首爾馬拉松個網到報名,填資料,填完會比個E-MAIL,有條LINK,去到會彈個EXE要人下載,一定要用電腦,安裝個EXE,之後估亂碼要填咩,信用卡過數,完成得可以去個網睇返比左錢未.比賽前一日去到終點個位攞號碼布.呢個算好,之前報過另一個韓國中央日報馬拉松要過數去韓國銀行既入數紙,電匯過去唔平又煩,最後啱啱有朋友去韓國工幹幫手先成事.

上星期六大嶼50之後都冇跑過,等隻腳繼續養傷,行路落樓梯都可以正常唔會一枴一枴,算唔錯,最多咪行到比人捉上車(限時5個鐘),既來之側安之.

星期五放工即地鐵轉機鐵轉眼到機場,等上機,坐廉航好彩我隔離有吉位,冇咁迫,可以打側身放對腳.落機入境出到閘都兩點,上離境果層揾個位差電話補下眠,六點已經開始多人,去買張T-money上網睇下點坐車去攞號碼布.坐地鐵站站停慢慢行轉車用左兩個鐘先到蠶室綜合運動場.

終點

攞完野去東大門睇行山用品同食午餐.行山用品都係唔夠吸引,多數係衫褲鞋果尐,我想要爐煲營果少,成日行入去睇兩眼就轉身.再亂行去左壁畫村,但尐畫甩咁尐同好多人,慢慢行睇下就算.夠鐘去Check-in.今次住新村平價單人房,交通方便設備齊全.

原本應該係兩條鯉魚

間乜乜24好多分店,單人房有埋洗手間,有雪櫃仔,電視冷氣,300HKD有找算唔錯.七點幾就落樓下揾食,食飽早尐執埋行李瞓.

第二朝起身,對腳好似幾好,跑一兩步都冇咩問題咁,買左盒朱奶同個飯團做早餐,八點起跑,坐地鐵七點未到已經到左,等到咁上下時間先上地面放寄存袋。起步前有囡囡做熱身示範，不過係大叔做講解。見到有pacer,揾下個4:00先,之後就等起步.

韓國好熱門既維他命C運動飲品,跑完有支送,飲左幾啖都係放棄.

開始冇耐好似幾好力,所以好快就過左4:00個pacer,揾3:50,跑多陣見到3:40就跟3:40跑,跑左十幾km試下再前尐,都係差唔多5分km,唔好理隻腳跑住先,有事再算,可惜過左一半隻右腳開始投訴,左腳就住右腳跑,跟住左腳都痛埋,減速都唔得要行下跑下,有時停埋一邊拉筋,不過都冇乜幫助.一慢左冇耐就比3:40過左,過多一陣3:50都過埋我,好彩都近尾聲,行都夠時間4個鐘完成.

跑完休一陣又飲返盒朱奶,覺得韓國朱奶濃味尐.諗來諗去都唔知去方好,之後去清川溪.閒逛到夠鐘就返機場反歸,但第二日星期一返工回唔到,上午返公司,下午都係要病假返屋企瞓返陣先似返個人.

一條友是但坐低食

都係十一月有花燈睇先靚

進取的三月

話說上個月尾得閒無事幹好做唔做,揾返對之前買左但又唔係成日着既鞋着,着住玩左陣pkmg,就咁行傷左隻右腳,腳指公對落個位痛,火星人朋友話休一陣過一排就會自然冇事,信住先.

休左兩星期都係痛,明顯比之前好左,但落樓梯,跑步都係有影響,見步行歩,行到幾多得幾多.話說三月三個星期都有活動,先來大嶼50,之後有首爾馬拉松,最後有顛傻240.

還好大嶼50係做陪行,唔係單人賽,隊友慢,又操得少,傷左都唔會慢過佢,所以可以放心慢慢行唔傷腳.同上年一樣路線,今年天氣比較好,天陰但山上又未算好差天氣,上年大東好大風攪到大會要腰斬.今年多數朋友都順利完成或快過上年.

講返比賽,頭14K都仲有得跑下,開始唔跑會大塞車,所以一開始就督促隊友,拉開後面距離,還好過左十朗位置仲算係唔錯,但之龍尾時隊友已經開始謝,佢竟然講得出行左幾遠,話一日只可以跑7K,14K係極限已經冇電,睇錶又真係如佢所講剛巧14K,只好慢行等佢回電,之後大隊人馬過頭,又跑一小段,不停跑下行下未致包尾.

出左芝麻灣上個山仔就落返南山,返伯公坳都係行多過跑,隊友訓練太少,仲行得到都偷笑.想像之外,仲有人同我地差唔多都係跑唔到,一半未有已經謝左一半,最少都上大東先謝嘛.唔通又係報名唔使錢?

終於捱到伯公坳,隊友話差尐想嘔,要休返夠本食返尐野先,休夠再上,慢慢上算唔錯,唔停就得,果陣已經唔多人所以冇塞車,遊人多過參賽者.比上年好天氣得多,雖然都係行到眼濛濛,行一陣就要抺眼鏡,但上年係尐雨打到塊面都痛.慢行左咁耐,隊友都回夠電,落山可以快返陣,雖然我隻腳落山都仲係痛痛地,但平路跑多幾步都可以追得返.

過左白芒又係食食食,隊友食飽慢慢行左先,我食多個三文治先出發,慢慢捱上山,之後就簡單,落既多,平路密少少,落多過上,圍住高爾夫球場過返梅窩果到仲可以過返幾個人頭,點知......唔使過河,上年要過河,一條好細既澗仔,過左上少少一落就出返大路可以衝落梅窩返終點.今年改左路,係過河之走U字回頭落返大路再沿大路上返斜,落幾多就上返幾多,半條命既隊友上條斜路上到抽筋,之前過左既人又過返我地頭.好彩都可以係入曬黑之前落到低唔使開燈.最後九個半鐘左右完成,又係木板一塊.