兩日一夜鳳徑全走

之前有麥徑全走三日三夜露營團，之後仲有次鳳徑全走團，可惜未能出藉。假又冇得請多日，決定係未熱之前要自己單拖試一次兩日一夜，揹輕尐早尐出發一日應該都行到三十幾km既，係開頭兩座山高尐啫，之後就冇乜問題。

呢邊一張先

星期五晚想早尐瞓但最後攪公司野攪到半夜，第二朝五點幾醒左又攪公司野，好正常冇問題cap screen send比同事，當然冇應機，唔理佢出門入東涌再轉巴士入梅窩，七點半左右到。有比賽，間金拱門好多人，其他餐廳又未開，迫住食碼頭腸粉頂住肚先。上南山竟然都撞到朋友，佢就係去影碼頭見到果個比賽上。之後上大東都唔係遇到好多人，大東霧霧地係常態，一落就正常返，再上鳳凰山都冇大東咁大霧，有幾堆外國人同強國人，香港人反而係少數。

昂平食午餐，四十蚊餃子米，有餃子三隻，加支C++，清左再去七仔買支雪糕食住行鳳四馬路，去靈會山又再少人尐，呢段香港人多返尐，外國人得兩個，冇強國人。

40+14(定12?)

11

落到大澳去左買茶果，一路行住食，今次強國人最多，個個都重裝，有尐可能重過我揹果個一倍都唔止。有幾班一前一後加埋都有廿人以上，重裝既多數好禮貌尐，會應機同阻到路會話對不起，好過朝早係鳳凰見既某幾個一支水上山果尐。

到牙鷹角都仲好早(但都好似滿左營位)，夠時間去煎魚灣，但要係牙鷹角到攞定水，入左3L水，濾尐水入樽，但出水好鬼慢，應該係因為乾過頭，第三次開始就正常返。

雞翼角

最後用左9個鐘左右到煎魚灣營地，一如預期咁，冇水，揹左3L水都夠用啦。好好風有海景，唉，不如話太大風，個營都吹扁。七點煮飯，再蒸埋牛腩罐頭，露營有得食牛腩飯，正!

雞翼角

海景

太大風,要自己加多條繩,個扣係行山扣，怕會扣到穿洞，又加多條頭巾係中間

煮飯中

"煮牛腩"中XD

登登登凳,牛腩飯!!!

全晚都伏伏伏伏...尐風聲，可以媲美大天井果陣，如果冇加多條繩個營一定扁左(又唔會爛既)。第二朝好早就醒左，好似有發過夢，應該有瞓到既。個天都未光，懶得開爐，麵包夾餅乾做早餐，之後就收架餐，七點過尐就出發。

行一陣就接引水道出石壁，全日大多係平路，平路又大多係引水道，雖然已經算好輕，可惜都係跑唔到。去到水口個肚又餓餓地，去揾間士多食第二餐早餐，竟然有牛腩，連凍飲仲平過昂平，個牛腩仲要好味過一般茶記，影低個名，下次經過會再幫襯。

引水道

新標距柱

向前行一陣就轉上去，都唔使上好多又係引水道，10km左右又落返馬路，又係時候食午餐。今次真係茶記貨色，食左個咖哩豬排飯。食飽行多9km就可以收工，呢小段應該未行過，馬路直到又去返芝麻灣郊遊徑先有印象。

45，豬排唔錯，個咖哩就......

比賽成日經呢到

 平時比賽十朗過南山唔經白富田，所以果邊都係冇印象，不過落山可以行快尐，好快就接返比賽路線出返梅窩見返個郵筒。見住架巴士就泥開，是但影左張就走，冇自拍呃讚，可惜。

右邊去，左邊回，第一日行左9hr10min，第二日行左8hr17min。