六十六十

又係加明挑戰賽，話說班CLS發現台灣加明有個賽鬥多里數，頭三團有衫送，於是就一班人起個團，諗住一人百幾十個都成千，點知班CLS渣流灘，一係就掛住Link 😛，一係就行山mode，仲有尐掛住拍拖，明明慢跑幾日都過百。

反正七月一又諗住玩雙尖，上年熱死人，今年都要操定先行，唔係就實爆。六月開始操就啱，月尾收腳，七一行。有得操又可以係挑戰賽到呃里數，一舉兩得，上星期六就走去元朗食午餐，去一程三十返一程又三十，行下停下玩左十三個鐘。第二日頂唔順，下午先出發去城門走下，冇咁曬，好好多，慢慢跑都有半隻馬。

今個星期"涼"返尐，有活動可以參加，星期六跟人kill標，最肥標同最瘦標，朝早玩到入黑。深井出發去到灣仔先收工，五十幾KM，慢慢跑下行下，點都好過上星期跑青公。深井>青公>下城門水塘>城門河畔>馬鞍山海濱>榕樹澳>深涌>南山洞>海下>灣仔半島>棺材角，之後返灣仔碼頭等運到，好彩唔使好耐就有人坐船入灣仔露營，我地成班人就可以坐返果架船出黃石，八點半巴士返西貢

深井東村對上肥標

跑去荃灣,梨木樹上城門

明明水塘乾到爆,呢到就玩放水

轉眼跑到西沙

灣仔瘦標

帶隊仲要出埋海邊影埋官財石

頂唔順,要食返個大米線先覺得回到電.

星期日又有個活動帶環島，本來都諗住起唔到身就算，點知成晚好好瞓，第二日又知醒，好似仲行到就出門，諗住跟到幾多得幾多。好彩朝早唔曬，個團又多人，開始無耐就休，幾KM休一下，想話自己爆左都唔得，香港島又多七仔OK，有糧有水，唔覺唔覺就過一半，唔覺唔覺又到赤柱，到左赤柱已經40KM，差果20KM左右行都行得完，慢慢來最後唔使13個鐘就返到起點，原來逆走環島都唔錯。

唔係帶隊講,平時都冇留意呢個係燈塔

瀑布灣

赤柱

大潭

土地灣

大浪灣

柴灣公園,朝約8:30出發

又慘仔XD

講返個挑戰，最後都唔夠數orz，同台灣人比，鬥多里數都仲差好遠，十幾日走二百幾KM既人多的是，三百幾KM都有十幾廿個，最勁果個跑左五百幾KM，日日都一隻馬，嚇死人。