城門水塘一圈唔大，但多野玩，有時懶懶地都會去跑下，上山有針草帽，平路有引水道，越野跑有環塘，探險有下城門，行澗都有幾條。近期有條路線多左人衝住跑，事源TNF攪個跑班，黃浩聰指道，免付費就有要求啦，唔會呀豬呀狗都入到班，出左條路線，最快果三十個就有機會入班啦。
隊長唔知係咪當年比我地糟質得多，近年發奮係咁跑，跑班跑會比賽，星期六比賽星期日又比賽，上午操山三十幾km，夜晚再去跑班衝圈，把小強復活能力發揮到極緻。因為今年又會同隊長組隊，見佢跑左次用一個鐘十幾分，為免我同佢一齊跑果陣會比佢帶到爆計，自己去跑一次睇下而家慢佢幾多先。
咁熱天時緊係下午先去跑啦，乾乾地好好跑，個天有時有雲又有樹陰，全程都唔多覺曬，可遇不可求。預計認真跑可以個半小時內完成，七點日落，五點半後出發最好，我都係差唔多時間開始，太陽弱左有尐風，全程三十度以下。
一開始就石屎平路過埋水霸轉左，變越野跑，泥路，間中有水有泥有碎石，小量上，但已經會使我減速，一來跑左陣已經保持唔到5分速，二來有上斜，有時又要避碎石，避水避泥之類。
跑完內環塘徑，變返石屎路，右轉係上斜路，仲要係長命斜，上足25分鐘，已經係比平時行得快果種，當然跑唔到，跑得到既話，呢個位可以減到幾分鐘，掉返轉計，上斜跑到就環塘唔會慢啦，講到尾就係冇氣冇力。
上完長命斜上上落落兩三次後會見到針山，有得跑住落返陣到針山腳，之後咬緊牙關上埋佢就得，唔使停當賺啦，已經得半條命。上到頂唔好停跑埋落去，一路落一路回下氣，四頭肌用盡佢，講係咁講，自己都落到想死咁。落到一半前面見有人前面又衝緊，諗住佢會唔會又係玩測試路線，仲叫佢唔好停一齊衝，有人帶住冇咁攰(心理上)，同埋為左唔比人放甩會勤力尐跟住跑，點知佢跑左陣縮埋一邊，你老闆丫，竟然縮，雖然佢冇錯，但係我想有人帶嘛，唉，冇計，用埋最後丁點意志頂住上，落到低仲要跑返燒烤場，最後果km都仲係6分速內已經算係咁，個肺同個心都就爆咁，停錶後都唔敢即刻坐低，行來行去幾分鐘先冇咁喘，終於可以正常返尐。
最後都係慢隊長5分鐘左右，不過佢應該可以再快幾分鐘，我操返多尐盡下人事睇下有冇得食到佢尐塵。其實仲有個cls同隊長跑呢條路線，不過佢太快，已經快到連食佢塵既希望都冇，可以直接放棄XD
事後睇返個心率就知當時覺得命都冇係好正常。
