我不嬲都冇乜運,近年尐山賽太多人玩,連比賽要抽籤,我多數都抽唔到,不過冇所謂,可以慳返一大筆.原本冇得玩,之後又變有得玩,都唔知係咪好事.
2019年一開始第一個賽係元打伙,近期冇乜點操,最多都係跑青公/運動場/放工返屋企,山都唔多上.就係咁就GG啦.
比賽果日諗住有人可以一齊行,點知竟然放飛機,諗住有人趕下我行,咁我可能會行快尐,又或者我可以食住花生行會行得輕快尐.
一開始就上斜,扮快起步係咁衝但前面都仲有幾十人,衝左陣上山就開始比人過返頭,對鞋個低已經平曬,有沙斜位上又煩落又煩.第一座山四排石還好,第二座雞公上山已經夠攰,落山又要捽住落,上又比人過,落又比人過,好傷心,有段遇到個馬尾由後追上,諗住可以跟陣,點知佢好鬼快,仲有個猛男跟住一齊跑,睇真尐,黃生喎,唔阻住人地,亦都唔夠快跟唔到,目送兩個快腳走左去,前後都未過半個山頭.
去到打石湖已經要休返陣,之前上雞公山已經開始食GEL糖,小量我會食既生化武器之一,之前隊長買,幫我買埋.千蚊馬拉松(圖X)果陣有帶冇食,今次真係唔食唔得,上山食幾粒先頂得住,唔係實抽筋乏力.上大刀刃已經係一個死樣,行下停下,落山先快返尐,但都係咁比人過.
到左嘉道理農場個CP可以盡情食.今次好多野食,有茶葉蛋有杯麵,有PIZZA,仲有砵仔糕,好多豆,感動過有杯麵食.全個比賽影左三張相,一張起點,一張杯麵,另一張就係個砵仔糕XD
食飽好上路,上返四方山,不過都係慢慢上,都休左幾耐,食左唔少野,慢慢行消化下先得,反正對腳就冇乜力,攰死.一如所料,之前個個CP都退十個名次左右,嘉道理農場到四方山退特別多,退左廿幾個.四方山落碗窰係最輕鬆一段,就係得個落字,但沿途見有其他參加者唔多鐘意,環大帽全程最浪漫既一段呀,唔識欣賞,可惜可惜.
到左碗窰就好熟路,又食一餐,計過都可能可以十個鐘內就死死氣咁上草山唔好休咁多.天陰有毛毛雨,個天快左黑,最後都要用頭燈,尾尾好驚過十個鐘,由麥徑開始落到火碳馬路都要睇住錶死衝返終點,休都冇得休,好彩仲記得大約條路,停低睇地圖一定超時,最後差尐就過十個鐘咁過終點,自覺未算太差XD.
過左兩個星期又係冇乜操山,本來諗住休息下,轉過頭又去玩HK100,連改左路都係比賽早幾日先知,冇諗住做灰姑娘,但都冇諗過要睇日出 orz
開始起步已經趕趕地,七點四十幾先落車,即刻去放行李,去起步位集合,今年幾好,有分組出發,可能分再開尐更好,15分鐘未必疏散得曬.開頭都係塞人,細號碼既應該快尐,但個個節奏唔同,有尐留前鬥後,有尐唔留前後面先算,我就係後面先算果尐,正常後面先算最多都係慢尐,冇咩野既,正常既話.
第一二個CP都還好,之後去到改路既位就開始冇力,舊路係去黃石,大灘平路唔使上,新路係上到嶂上先有得落,唔係好高,但冇得回,又餓又熱,其實到赤徑已經攰攰地,上山冇力,到左嶂上落山都冇力果下慘,見到朋友,問有冇好野,唔係問馬尾,問食物呀,最好有雪糕啦,雪梨果尐都好,當然好正常係冇既.只好慢慢落山回下氣充下電,好彩落到馬路轉灣就到,頂埋果百幾米斜路= ="||
猴塘溪個CP幾多野食,不過都係休息要緊,飲水食野,瞓低休返陣降温,食得最多係蛋糕,幾好味,又袋咁尐走,怕之後行行下餓有野食,不過都係好吸水,同我自己揹住果幾包餅一鬼樣.休夠都要走人,行左陣又見到熟人,打個招呼跟住就趕佢走,快尐啦,唔應該係到仲比我見到.平路都冇乜力路,之後果尐上上落落去到灣仔就攰死左,又瞓低,休果下真係好爽XD,一起身就PK啦,小腿抽筋痛死我,有個鬼佬仲話佢都抽,全身抽,尐肌肉自己抽,唔玩啦,要走人,抽都要行返出去先走到人架.之後佢都係要行,到左海下見士多又休返陣,飲下肥仔水先,個CP仲要走上條斜路先到,最多而家休左,到時休返少尐.
個白沙澳CP都冇乜位好休息,飲野多,開始冇乜胃口食野,都放左尐野入口,味噌湯最啱入口,冇其他,食物就算啦,已經放棄有好野食既希望好耐.出CP轉個灣行幾步就見有嘔吐物,行多幾步有個人嘔緊,OH,希望佢頂到終點啦.繼續行下同行下,唔追時間,廿個都仲有希望呱,但好快又放棄左呢個希望啦.
完全提唔起勁,個人呆呆地咁行,反正向上行,跑都係自爆行為,行下等條筋冇咁緊好過.榕樹澳都係飲味噌湯,食左咩都唔記得,都冇乜好野食.上雞公反而有力,過左十個左右,沿途又見幾個嘔,有尐就話凍,應該食唔落野又冇曬電,聽到幾個話要走人唔玩,行左大半喎,而家走太浪費,雖然我都想走,但又未謝曬冇咩藉口.係水浪窩發呆休息,又見到朋友,奇怪咁遲仲係到,叫左佢但佢聽唔到,到休完出發又見返佢,比我精神有力啦,叫佢做廿個鐘內,佢又話唔追啦,不過上馬鞍都快過我,轉眼就唔見人.
上馬鞍已經入黑開始涼,着住件風褸行唔敢除,平路行下跑下比想像中好,都係比人過架啦,不過後面都有時都可以跟人跑到陣,到基維爾精神都算OK,反而想休息冇好位,食物都係麻麻,唔想食甜野,有舊唔知乜鬼糯米雞棒(!?)硬到石頭咁,食左幾啖就放棄左,係架貨車側面避風休左陣拉下筋,之後都係頂硬上出發.
去到沙田坳士多竟然未閂門,想食燒賣,冇曬,都食返個杯麵先,胃口麻麻,慢慢食都係只食得大半,飲埋尐味精湯都回到尐血,之後行真係唔攰啦,不過胃口唔多好,行下跑下,到回歸停就瞓返陣,睇下錶狗衝都要過二十個鐘,安心繼續慢行XD
筆架山有大爐有雨褸派有粥食有位坐,後半場咁多CP之中最好一個,食夠粥後都走人,有返尐力,反而係眼瞓,成日見長櫈就瞓.到城門有好多野食,但冇乜野想食,又袋住蛋糕走,針草上山過幾個人,平路冇乜跑,見有平位又瞓,到鉛礦坳個胃真係頂唔順,想嘔又嘔唔出,尐聲又嚇親人,義工問左我兩次使唔使幫手,"幫我整碗粟米肉碎粥丫",當然係冇咁講,最後食左尐腰果同提子乾就上路.
冇乜電又想嘔咁上,精心計算下(Hea到丫),大帽山最凍果段時間已經過左,太陽都就快出泥,日出之後係精神返尐,不過個胃都仲係咁差,最後都係要嘔,係仲有幾步到白波果到嘔左一灘,用尐水浪下口,再倒咁尐走,反正剩低落山,嘔左反而個胃舒服返尐,仲有40分鐘比我落山,唔係就過廿四個鐘,銅人都冇,咁就實在太差,睇住錶跑,又唔使太快但又唔可太慢,近終點仲見到兩個好有閒情既友仔泥睇我過終點,必埋尐尐電跑住唔停咁去,都有過幾個人架,不過之前比太多人過,所以名次都係仲後過鉛礦坳.
攰都唔算好攰,話曬中途瞓過唔少次,最慘係個胃唔舒服,隊長請食早餐都只係食得落碗粥.再有得玩既話要試走頭大半先得,預返尐腳力,天氣熱真係好易爆,今次算近年跑最差一次,仲差過九龍50貓.估唔到最多跑到嘔既賽係HK100,玩三次嘔兩次,失敗,失敗.
