0K
去天池山莊可以騎電單車,有人幫手'送貨',當然要錢$v$
第一日行到天池山莊,大文大路,冇難度,當然中伏故事既發展多數都係開頭正正常常......跟住有尐唔正常係好正常的說XD.天池山莊係新起,入面都真係好大,唔係以前瞓果種兩層床,而係一個個房,樓低鬼咁高果種,開P都得.
第二日尐路就開始密,係明明有人行,但尐草生到遮曬條路唔撥開就睇唔到,台灣人好似好習慣行呢種路,佢地好似唔使睇咁照行,我就步步都要撥下草先安心,行到我都覺得煩.
係營地遇到另一個香港人既營
去到營地算早,兩三點左右,之後越來越多人,見到個人用隻貴野,台灣見比較貴既營多數係MSR,有時BA,TRAPTENT真係少見,連香港都唔多見有人用,走過去八下,用極唔入流既國語交流,講左幾句團友就就叫話佢係我同鄉,即係都係香港人XD,係得香港人先聽唔出尐國語有唔同,最後轉返廣東話講,佢跟另一團台中行山隊,形式有尐唔同,營糧水都係自己解決,當然便宜尐,雖然知到平尐,但諗到餐餐都食即沖飯杯麵,感覺就太差,三餸一湯,加真米飯,個差價我覺得值呀.我參加果間可以揍夠三個人揹個輕尐既靚營就更好.
第三四五日都有日出睇,不過朝早一條友收營個感覺就唔多好,仲要揹住個濕營Orz.第三日全日都係咁向上爬,爬極都有,不過可以慢慢爬,成日等前面爬上去,再等後面一齊休.
第四日有最出名既斷崖,睇就好似危,實際有曬繩帶隊唔會比你自己爬落去,差唔多想捉住我隻腳咁落去.比較攪笑既係落去果陣要掛D扣,個扣扣係邊呢?唔係用條帶綁個人再扣條帶,係個人揹好個背囊,個D扣扣係背囊到,個背囊條帶夠唔夠力拉起70KG以上呢😏,真係唔知,背囊個扣夠唔夠力綁住個人呢,這個就真係好伏啦XD.BTW全隊都係有帶D扣加扁帶,但全都冇用過.
呢段好似大東山XD
今次呢隊有個真係好勁,後生靚仔好力行得快又肯幫人,我揹16KG佢揹26KG佢都行得快過我.下午近營地放人衝,一個帶隊,果個靚仔,一個女,加埋我,三個衝左兩個幾鐘,後面差一個鐘先到.個女既行密林好快,上山同我都差唔多,揹既可能重過我尐,咁多次台灣登山團之中最行得既女將.個靚仔仲勁,可以跟住帶隊速度上山,佢應該係咁多次台灣登山團之中最行得既團友.可惜同我同營既,一個大叔新手,想幫但幫唔到,一個就大叔自私精,爆佢都費事.
第五日朝早上安東軍,好多人,有團有人完成百岳,比佢霸左個山頂牌成幾個字,成村人排隊影相,第一次見證原來完成百岳果下真係大L曬,明明我影緊都可以叫我讓開,好似我阻住佢地咁.之後就瘋狂落山,落完再玩落澗,呢次真係夠多原化,我對鞋要過澗先發現穿左洞,唔想入水又唔想換拖鞋,成日要自己再揾位過澗.
曬營係中午大休指定動作
抱抱大樹
第六日係更多既過澗,更大水,個個都要換拖鞋,不過好快就有人比水沖走左拖鞋,唔止一個.開始時帶隊都仲叫人過完澗換返行山鞋行,但換左陣都要過,換拖鞋,換鞋仲慢過我着拖鞋行,最後個個都唔換,拖鞋行碎石路就算,直到真係上返山路.
最後係澳萬大出返去,冇人會捉你收返入場費(強國會).之後行返一個鐘左右出返去停車場,有冰凍沙士啤酒生果,個個都換拖鞋吹水等尾隊.上車返上山前既旅館洗白白,係附近食午餐,再坐五個鐘車返台北.
原本六日縱走加前一日集合即七日,我就買左七日機票,點知係唔得既,縱走行程係唔會準時完成,唔會準時完成,唔會準時完成,行程寫七點半返到台北,咁我就買左近十點既機票,最後係9點半先返到台北,當然,第二日同團友講起已經比人叫我改機票,最後都改左第二朝早機(攰死,返到香港返屋企開工直落).
今次天氣一流,景又靚,揹得輕唔算特別攰,麻煩位唔多,最煩係撥草同過澗時換鞋,過澗反而冇乜大問題,團友就兩極化,好勁同好流既都有,肯L定同團有人未起過營.有個第一次用GAS爐,摟返個爐出泥果時會有尐漏氣,問人係咪唔可以摟開要用到冇氣為止,我心諗冇理由,除非刺穿式氣罐,正常唔會係到出現啦,肯定唔會唔可以摟開啦,妖,係我諗緊國語點講好果陣有人答係呀,一摟開就會漏曬尐氣唔摟得開架,CLS,咁都答得出,頂唔順,即刻走去攞個爐摟開比佢睇,都係果句,爆佢都費事.
沒有留言:
張貼留言