前排有長途跑友玩大嶼兩極,Fitz又咁啱出大嶼兩極文章,之後天氣開始熱,但仍有不少人挑戰,其實最好日子就係三月尾四月頭,日照比較長,少雨又未太熱.朋友帶團又想試走但只走半程,我就冇所謂,反正都
玩過,諗落唔好浪費連假,朋友半程,我玩全程,跟團走上半程,我自己走埋下半程.
本地外地都受疫情影響,零售轉為網上主打,行山露營用品一堆減價折扣,好易失手就敗家.正好可以攞去試,叔叔有練過小朋友不要學,架餐應該係安全環境中先試用.之前又見朋友介紹即食咖哩,又買左包,當然係食咖哩飯,攞返個買左半年都未開嘅tr-210.一乜米加埋包咖哩做晚餐.
青馬收費廣場集合,正常早出發有優勢,我見七點半左右已經有幾班人出發.一團人行去343燈塔先開始計時.上花瓶頂,一串山脊上上落落,太陽好鬼曬,未夠一半已經有團友出現疲態.最後係就到老虎頭山頂前有兩個退出,實在可惜,差一百米左右,之後就落山.
起點燈塔
見愉景灣即係就到老虎頭.
就到......
老虎頭山頂
睇下個唔知準唔準既温度計
一團十人,兩個退出去左愉景灣,八個剩都冇乜力水,亞婆塱上鴨腳瀝唔係人咁品,一致決定去白茫飲返夠本先,到左飲夠就唔上返亞婆塱啦,其他人打算行返出東涌,我就單拖安全計係白茫行返上去大東,龜速慢慢上,一個鐘行2km,上到去見有人扎營,問下有冇水先,點知佢地尐水係黃龍攞上泥,行澗走營都係一個好點子(記錄在案先),冇影佢地尐架餐,唔細心睇都知係好野,隻隻營都唔過1kg,但又有枱有櫈有天幕,直頭係天使同魔鬼既配搭.
大東山儲水池真係值得信賴,300ml水又可以變返做5L水,雖然入面成日都有垃圾/蛙/昆蟲,但係活水,出水清澈,加埋filter,飲用絶對安全.落山時已近黃昏,竟然見低地雲海向伯公坳湧過去,形成雲瀑於伯公坳一瀉而下,什為壯觀.
玩壞左,齊齊冇得玩
雲瀑1
雲瀑2
雲瀑3
入黑前揾個靚位起營,起新營有尐雞手鴨腳,加上用新蚊帳,都係扎得唔夠好,近朝早冧左兩次,不過加加埋埋都有瞓過5個鐘,咁鬼攰,好快瞓着.晚餐煮飯個酒精爐都係新買,加一半滿酒精,煮到嘔白泡,再細火5分鐘,再焗10分鐘.冇爐架,用石頭,冇酒精爐蓋,用錫紙遮半個爐,好彩成果都算唔錯.
清曬
夜晚跌返廿零度,半夜兩點凍醒左,得廿度.我冇帶睡袋,帶左個新
睡袋套,輕,唔熱,有風吹得入,啱夏天用,可惜個人身子弱唔受得冷,廿度都覺得凍,起身用件風褸套住腳,加埋求生毯擋風,即刻暖返曬繼續好好瞓zzZ.
第二朝太陽好早就出大泥,好彩有尐雲,見鳳凰有雲遮下有尐開心.行返落伯公坳,如常見到打爆既垃圾桶,香港人幾時先識正確地掉垃圾Orz.上鳳凰山見到個火星人身形師姐來回跑,唔止一次,原來有隊友行得慢少少,佢就跑返去問有冇野幫手,要唔要攞埋個背囊上山頂,夠唔夠食/水,走左四五轉,係山頂聽到話仲有九個山頂就跑完就估係咪去汾流,多口問下,真係同路,不過佢地kill曬標,我就skip曬唔順路果尐標XD
咁先係人生
又出返個大太陽
一時時有雲,好過之前一日,有雲就休息慢慢行,有樹陰都會停下,估唔到去到靈會山都係同果四個跑山友差唔多,其中一個有尐謝,久唔久就比我追返.去到靈會山佢地出發先,但佢地上大磡森,我就走先,去到鳳徑先大休食午餐,休左陣,有尐謝果個師兄都到,其他kill標未追到,我食飽又行先,經鳳徑去陳記飲汽水又休陣先至出返沙灘去燈塔.汾流燈塔條路闊左好多,但都仲係好鬼刮腳,着梯既小心.
第一日用左十個鐘左右22km,第二日用左七個鐘20km,汾流行返出大澳約7km.行完行返出大澳,原本想買汽水,但係經車站先就換衫上車歸家.
有快艇直達汾流
汾流支標
終點燈塔
行返出大澳見到呢到就可以hea行,食埋剩餘糧餉,再前尐牙鷹角仲有水沖洗手手腳腳.
近期真係多左新手行山,係汾流見到兩個唔識路但又同團友失散左,問點去大澳,見我係大磡森果邊落泥,個板又指去大澳,差尐想走上去,最後叫佢地去汾流過大澳,有另一好心人帶佢地慢慢行返出去.係汾流沙灘見到兩個後生仔(女既唔會咁大膽呱)見路就行咁,見行去天后廟條路仔問我係咪去炮台,我答唔係,炮台好遠,咁佢地冇問點去炮台就唔答其他啦.之後我行去燈塔返轉頭果陣又見返佢地,又問係咪去炮台,救命呀,唔識路就唔好亂行啦,答係去燈塔,炮台係個山仔後面,之後就唔知佢地去唔去到炮台啦,遲早叫消防就係呢尐.
