話說之前話過今年要Hea,操少尐,玩多尐,露營多左,都跑少左,不過下年諗住又報UTMF,問題來啦,報名除左錢,仲要夠分先得,一個大嶼50得1分,以前三分就玩得,而家多人報名玩攪到要6分先玩得,下年年頭報名,大嶼100都等唔切(我又去左報大嶼50,不過係被報名).為左報UTMF就要玩返兩個100km先得,hk100有報但抽唔中(想玩都係要去做義工),毅行,TNF100,Half168,uthk100同荃打火115k,TNF玩過同加左價,又要抽,放棄,168同UTHK太出名,唔敢玩,只有毅行同荃打火最安全.
咁啱有個人話想做24小時,為下次做早隊出發舖路,對佢半信半疑,不過我要三分唔係做時間,所以冇所謂,叫得目標時間,慢尐都未會入黑既,唔好玩兩晚就得(叔叔年紀大身體差頂唔順).有時世事真係整定,攪手叫左三個人齊齊抽,得佢一個抽中,比佢做隊長.
之前玩過三次毅行,431字頭時間都做過,仲差個2字頭,咁多次都全隊完成,今次都係齊齊整整四個人返到終點.30個鐘以上果兩次眼瞓死,1字頭果次就攰死,今次最正常.
四個人係出發當日第一次齊人,但個個目標都好一致就係睇住隊長行,隊長操練未試過多過30k,第一次長途山賽就100k,仲要做到廿四內,我有尐朋友操幾年都未挑戰廿四成功,聴到實妒忌死.
開始時當然係跑啦,過到幾多得幾多,而家唔過陣間都要過,開頭過好過上山時過,所以係咁跑,跑到上斜就急急腳行,上到平路又跑,都唔係好趕果種,隊長控制話跑就跑話行就行,停就其他三個隊員都唔比,1個鐘頭3個字到東霸,比隊長休一陣.
之後上西灣山,隊長衝往上,兩支POLE督督聲好有殺氣.隊長上左陣又話就爆,之前係東覇已經成日話自己就爆,慢少少行一陣又可以再衝過,所以其他三個隊員都唔係好理佢既休息要求,成日趕佢走,佢常見台詞:"比一分鐘我,丫,唔好,比三分鐘泥,唔得,休到疊半先",我地三個自然會有人計時,一係唔理佢,知佢冇咁易死就行左去先,係前面行慢尐叫下佢,睇下有冇反應,冇就先停低休息下,見到佢又幫佢計時.佢話自己就死咁,開頭都怕佢真係爆,但後來發現佢同小強冇乜分別.
話說行下行下到北潭坳,之後就上嶂上過雞公,上嶂上果陣隊長大落後,又話要休,仲講到就泥唔得咁,見佢咁慘就比佢休下,點知佢休完一排到落山位,佢見人多行得慢,自己一個一支箭咁標左落山,逢人過人,快到影都冇.嘩,之前咁鬼好戲,比佢呃曬.追左輪先追到,於是我地三個隊員知到佢要折磨一排,休一陣就V形反彈,折磨越勁,反彈越勁果種(好似係).
好靚時間,用左七個鐘多尐就到水浪窩.隊長號召力都有過人之處,可以召喚到個靚女夜媽媽係水浪窩到攞住四個粥等一個鐘,食過皮蛋瘦肉粥,叫隊長放低尐鬼咁重既野(佢唔放低,我就掉佢尐野落山XD),休左幾個字又出發.去到茅苹竟然見到有人派薑茶,毅行經過咁多次(有時陪行,有時參加),好似飲過兩次呀伯既薑茶,之後有次係得薑糖,有幾次就咩都冇.飲完先發現係"樂山行"幫手攪,更覺親切.之後隊長上山又做戲話就死,上到小萬里長城又復活返過左幾隊,係基維爾又大休飲湯食燒賣,隊長話腳掌有水泡(實際都冇)去揾急救包紮,剩機休陣,不過冇幾耐又比我地趕走.
出左基維爾仲保持到唔錯時間,11個鐘都唔使,到沙田坳有救星1號幫手,朋友送野飲泥,有四包朱奶加兩罐汽水,又幫手減輕隊長負擔,隊長落山同平路都跑到,咁又可以快返尐.過左大埔道都只係14個鐘,仲有10個鐘行四十幾km,時間比較鬆動.金山過城門,隊長快步上斜,快到我都出盡力先追到尾燈,去到走私坳又開大餐飲飲食食,有烏東飯團,有我最愛既麵豉湯可以保充鹽份.
轉眼到城門,隊長希望日出前可以過左針山,唔使曬住上,三個隊員努力幫佢達成願望冇停咁,近頂時好似聴到隊長呼叫,但都係針山頂先停低等佢,原來佢想減少重量,最後都係救星1號出手.落到馬路用POLE拉隊長,其實唔使用力,隊長自己行都唔慢得過我,不過有人拉住個節奏可以有得跟,冇咁易慢落泥咁解.上到草山落返鉛礦坳,有合味道杯麵食,以前唔係合味道都夠開心,今次開心多一倍.隊長話眼瞓,比佢瞓左陣,得果幾分鐘,比我就唔夠使.
上大帽時其中一個隊員上先,之後我地等隊長瞓夠鐘先一齊上山.開頭上都仲見到隊長跟緊來,後來企定定等一陣都唔見影,諗住上到四方停再等,點知落大雨又大風,頂唔順走人先.落山時追返先行既隊員,再冇耐就見到救星2號逆上,點左佢上大帽頂揾隊長,點知隊長同佢擦身而過.係CP8個避雨位休息,兩個十卜係到等我地,大風大雨山長水遠來打氣十卜,實在感恩,仲有好開心見到救援物資,重點有9包朱古力奶,喜出望外,飲兩包再揹兩包走.等緊救星2號(佢上左山頂感受橫風橫雨XD)果陣,隊長又瞓陣.之後一隊四人加兩個救星齊齊山發,隊長兩手督POLE奮力向前,離開CP8都未使20個鐘.
過馬路上一陣就狂落斜,唔跑就傻,好彩個個都跑得到,最少都跑下行下,話曬都仲有21,22k.一輪追趕之後去到CP9,過左機先,出發到既走先,我換對襪加飲埋包朱奶先再追,剛好用左21個半鐘,仲有兩個半鐘可以玩,出發時又嚇下隊長一日未出水塘都唔好太hea,陣間要係保良局狗衝就慘之類.
最後出左條悶死人既環塘路後,以為要推隊長上斜,點知佢仲有大把貨,試過推佢,隻掌都未推出去佢自己已經行左,慳返.過埋最後以前比信物果個位,問大會仲有幾遠,答6k,仲有一個鐘三個字先24小時,救星2號啱啱好趕到.辛苦兩個陪行十卜,揹得重又要同我地差唔多速度.冇佢兩個一定做唔到廿四內.飲埋包朱奶,冇乜人性咁除左支水外比曬尐野比救星2號,四個人唔太趕咁用一個鐘返到終點完左隊長24小時內既心願,可以一齊去食下午茶.
過馬路上一陣就狂落斜,唔跑就傻,好彩個個都跑得到,最少都跑下行下,話曬都仲有21,22k.一輪追趕之後去到CP9,過左機先,出發到既走先,我換對襪加飲埋包朱奶先再追,剛好用左21個半鐘,仲有兩個半鐘可以玩,出發時又嚇下隊長一日未出水塘都唔好太hea,陣間要係保良局狗衝就慘之類.
最後出左條悶死人既環塘路後,以為要推隊長上斜,點知佢仲有大把貨,試過推佢,隻掌都未推出去佢自己已經行左,慳返.過埋最後以前比信物果個位,問大會仲有幾遠,答6k,仲有一個鐘三個字先24小時,救星2號啱啱好趕到.辛苦兩個陪行十卜,揹得重又要同我地差唔多速度.冇佢兩個一定做唔到廿四內.飲埋包朱奶,冇乜人性咁除左支水外比曬尐野比救星2號,四個人唔太趕咁用一個鐘返到終點完左隊長24小時內既心願,可以一齊去食下午茶.
其他:
V形反彈咁行毅行真係第一次見.
原來毅行唔使練咁多都做到廿四內(雖然同係四大徑種到黑菇一樣咁冇天理).
毅行做廿四個鐘有挑夫真係輕鬆好多.
毅行要帶杯,毅行要帶杯,毅行要帶杯,好重要,所以講三次XD.
鴻福堂燒賣幾好味.
毅行飲朱古力奶好正,全程飲左6包(共1.5L).
別府飯團好似之前好味尐(定係另一間?),冇咁實.
上草山前果條腸好鬼重口(鹹死人).
合味道萬歲.
今次先知毅行原來有牌攞.
對家到左終點揾我都冇用,我好似已經返左屋企.(定揾錯人?)
V形反彈咁行毅行真係第一次見.
原來毅行唔使練咁多都做到廿四內(雖然同係四大徑種到黑菇一樣咁冇天理).
毅行做廿四個鐘有挑夫真係輕鬆好多.
毅行要帶杯,毅行要帶杯,毅行要帶杯,好重要,所以講三次XD.
鴻福堂燒賣幾好味.
毅行飲朱古力奶好正,全程飲左6包(共1.5L).
別府飯團好似之前好味尐(定係另一間?),冇咁實.
上草山前果條腸好鬼重口(鹹死人).
合味道萬歲.
今次先知毅行原來有牌攞.
對家到左終點揾我都冇用,我好似已經返左屋企.(定揾錯人?)
