天寒地凍閒遊大東

原本星期五都想去大帽山,但天文友加天文台加HK100朋友/義工都話冇雪,即係得霜睇,加埋大帽一定多人,咁就即係唔使諗,到到差唔多,星期六晚安心瞓,第二朝再算.

今朝早見到朋友出左張C1201有冰條掛係個牌低,正!做完公司野,轉個頭就出去東涌上黃龍郊遊徑,未到個C1201已經見到冰條,反而到C1201時,牌低冇曬冰條,不過一路落山既山友都話山上面仲有大把冰,睇泥星期一都仲有.

上到去見尐草上面條冰條好似手指咁粗,上面食曬風,唔係有石屋頂住,我都影唔到咁耐,帶左手套隻手都仲係吹到赤.上大東既人唔多,甚至我覺得仲少過平時,講廣東話既得一半左右.

冰泥,唔係玻璃

尐草其實都係冰左上半身,下半身都係冇冰,所以個山頭都唔係好白

呢塊冰夠厚

Moto G Trubo

又返Moto懷抱,話說部上年ZR用左年半後呢幾個月開始接觸不良,近日差到電話都接唔到,防水蓋又甩左半年,已經唔係防水機,見MOTO比人食左後出最後一部MOTO電話(之後就係L字頭),生活防水又平,啱我粗用.

星期日朝早等停雨先出門,十點幾青衣跑出荃灣,青公到元朗食午餐再返屯門,三十幾k收工返青衣城,八過瘋宅,哥哥仔話未有貨,伯老會唔多覺眼,上網睇下論壇話邊到有得買,個個都話"謂信",最後問"謂信"有冇貨,有呀,正價平一百送貼,1799,網上話深水埗有細舖1700,懶出去,到時冇貨就時間都冇埋.

返屋企裝返尐APP,之前部ZR得8GB,仲有好多APP唔啱使,比我用既得4GB左右,又冇得上棉花糖,唔夠位玩FF III,玩左三份一到就洗左.

G Trubo好多位(對比ZR之下),同埋善用左張SD卡,多左野過左張SD卡到,上網又快尐尐,充電真係好快,弭電好似比ZR少(不過可能係新電),個Mon大左,影相好似靚左.

棉花糖太新,FF 最後係黑畫面,都係玩唔到(呢個最傷心,哭).其次係部機大左,平時跑步個腰包個袋太細,難放左(又有藉口換過個).冇得掛手機繩,個細八達通冇得掛,平時手指鈎住條手機繩就算甩手都唔怕跌部機,而家冇左,要用雙手先放心冇咁方便,其實個機背有坑紋唔易甩手,係我唔習慣啫.

網上其他開箱文
http://www.ringhk.com/report2.php?id=12143
http://www.eprice.com.hk/mobile/talk/4537/204371/1/rv/motorola-moto-g-turbo-XT1557-review/

2016Hea左先講

新一年1月1日冇去睇日出,走左去睇日落,中午先出發,昂平棧道上昂平過羌山已經日落,都叫做睇到個黃,想行到靈會山先扎營,行左陣又怕食風,都係返L041個分差口平平地又有位(一個營咁多既位)又唔大風,早尐起營早尐有得食.

下午已經好霧

好彩都仲見到個蛋黃

5:50就日落,6點幾已經全黑

出發前係街市買左15蚊叉燒,分左兩餐食,大部份做晚餐娃娃菜叉燒鮑魚麵,食飽都係9點左右.

有帶罐頭,但可免側免.

諗住黃昏都霧霧地,一覺瞓第二朝,但係熄曬燈後都仲好光,出營睇下,竟然見到星星.

1月4日象限儀座流星雨高峰,早兩三日,想賻下,落腳影左一堆,但都影唔到一粒流星.

1月2日朝太陽未出就收營去靈會山,未出都知食白果,不過有雲海睇下,春天的感覺.

 過返萬丈布食早餐烘下個餐飽同叉燒,食返兩個叉燒飽同煲水先落大澳.

條橋之前好似未斷,係我記錯定太耐冇經過?

之前比人入去仲有得買汽水,而家唔比入,仲有狗係閘入面吠人.

經過大澳行返出東涌,中途上象山想玩下ingress,唔知係唔係個台整左收漫遊,上左山腰就收唔到本地,2016第一個悲劇,影張相當hack左(哭)

象山頂

新行山徑?(笑)

山上有幾支測量用既柱

上到海豹石就放低個背囊,返轉頭先攞返

之後行返出東涌經過深屈,原本想食碗綠豆沙,但好多人,唔想迫住坐,行過左就算.再過一段仔路見到多左檔新野之前未見過,問過老闆話係十月先開檔.當時約兩點幾,老闆係咁叫十蚊任食豆腐花,於是就落左去食兩左碗,老闆話三點會清檔,豆腐花有剩會倒,唔想浪費,所以十蚊任食,只限配紅糖.配桂花糖玫瑰糖冇份.

 行返出睇飛機位,尐垃圾多到滿地都係,取消垃圾桶好過.

又返到起點