台北1O1(ingress mission)

未出發去台灣行山前有諗過有時間剩可以做下Mission,發現台北1O1,形喎,仲可以升兩次mission章,不過好似要好多時間,都係到時先算.行完陽明山後都仲有時間,返宿舍執返個人(成對腳都係泥),休一陣再出發,試下做兩行(12個mission)要幾多時間先,一做就做左4行,啱啱好係象山站附近.24個mission用左1.5小時左右,計落都有機會係我走之前做得完,於是就打算第二日做埋果144個.

第二日七點幾退房,去台北車站行李房放低行李,相機都唔帶,只帶個細背囊放遮,水,手機,銀包尿袋同幾包餅(上山食剩既後備糧).上午同我係咁落,好彩唔係好大雨,對鞋只係濕左少少,但係玩左陣冇電,又要開遮又電話又尿袋,真係想飲水都冇手攞.

做到中午先停雨,已經感到個Mission最難頂之處唔係要行得多,而係差少少就得但係又唔得果種折磨,明明就泥hack到,但又hack唔到,一定要等紅綠燈過馬路hack,但係跟住個卜土/mission又要返轉頭,即係又要等紅綠燈過馬路.又有時係一堆卜土要hack,但係分別係兩條巷仔,行完一條hack完又返轉頭入另一條巷,但下一個mission可能又要返去之前條巷,好有被人老點既感覺.有時多大廈個GPS唔係好聴話,定左格,行過左成百米先識返來,都會激到吐血.六點幾做完返台北站攞返行李時間啱啱好.全個Mission估計要行約20k,都係估,為左慳電,冇GPS log.

都未使跑,但慢慢行就一定唔得,快步一個鐘做到15個mission左右,開始時會做快尐,但精神折磨左一排之後就未必做到咁快,分開兩日會好尐,一日做完要預12個鐘起,同埋小心做到抑鬱/狂燥(唔好掉手機洩忿).做mission都要食飯飲水,要預返尐時間.同埋唔好心急,過馬路,係巷仔行都要睇車,注意安全.

用毒約十幾粒,hs都係約十粒左右,一路行一路掉key,同recycle 12345彈,低腳就得閒插下,mod都落下,一係就recycle,唔係好易冇曬位,到hack果陣先發現,又會想掉手機.

一句到尾,呢set mission其實唔係考腳力,係考EQ.

陽明山東西縱走

原本想行南湖大山要四日四夜,但不能成團,改行雪山只要三日三夜,多了一日可以上山,揾台北行山最後揾到陽明山東西縱走路線,可以單拖出發,朝早打的去劍潭(捷運未有咁早開),轉市巴小巴1至風櫃嘴.上車見到另一個跑山裝大叔,佢問我去行邊,我用好爛國語話東西縱走,剛好佢都係,結果變做二人同行.

前輩原來分開行過好多次,分段行係因為要帶團,假日會幫手帶團行山,類似康樂組組長.全程大部份時間天陰,間中有太陽,下午有一兩陣雨,收左相機一陣個天就停,攞返出泥又落幾下,攪到後段泥路好滑,好彩有繩可以扶住行.

朝早6:10係劍潭上車,下一班已經要十點幾.

1頂山.話雖十個山,但其實落少少行過隔離上少少又到第二個,唔係想像中咁難.

2石梯嶺,一路風景都好正,台北淡水河基隆101,盡在眼低.

3竹篙山

4七星東峰

5七星主峰,七星東峰行過去一陣就到.

落返小油坑

只係27度,唔算好熱

之後就食午餐,小油坑有小賣部,食八寶粥飲汽水.

6大屯山,之後先係難關,小心路滑.

7大屯山南峰,大屯山南西兩個峰都比較少人到,路比較難行,要預多尐時間.

大屯山之後先係最難,主要係路滑,如果秋天應該可以快好多.

8大屯山西峰

上落都泥路,路滑要小心,不過有繩可以扶,帶手套會好尐,拉繩可以快尐,隻手又冇咁痛.

上面天山之前分差口有個停,附近有松鼠,唔係好怕人.

9面天山

10向天山,之後仲有2K幾路要行,不過都係大文大路,落到低就係車站.

比想像中快,因為没有跑很多,休左幾次,又影相,中午還有停下食午餐,最後都唔使8個半鐘.

台灣雪山預備

如果一兩三個去就唔好煩,跟團算,跟團有人帶路,講解(水晶蘭,水鹿腳印都係帶隊講先知),定行程,留意事項(例如天氣),有人揹食物,有車接送,有咩事有人幫(如甩鞋低),所以都係跟團方便.

野訊應該係最大集團,團既人數都比較多人,可以收信用卡.今次參加叫台灣山友,個團細尐,唔收卡,要自己匯款過去(找慶誠書屋),之後E-mail來回幾次就攪掂.跟團多數有兩個選擇,自背同免背,我提議選免背,因為可以揹少尐去台灣,揹少尐上山,有些團只有免背,多數係入門百岳團(玉山,雪山,嘉明湖等).

56月係高山花季,但同時係雨季,高山時常上午好天,中午後落雨,有時都係要睇彩數.另一個我上百岳既月份係十一月,上玉山,高清天氣,登頂睇日出有冰掛,但日出後回山屋已溶解.

基本裝備如下,30L背囊應夠用,我帶多左好多唔使用,所以揹個40L:

長梯褲(A200)
瞓覺長褲(一定唔可以濕)
出門行山防水長褲(Marmot PreCip Pant)
防水腳套(淘寶貨,用到連拉鏈都斷左)
防水風褸(Montane Air Jacket)
雨衣 (有帶但冇用,可唔帶)
遮(日本城25蚊貨仔,爛左唔可惜)
長袖衫兩套(帶左唔只兩套)
羽絨(有着過,但其實唔着都得)
長袖爪毛(有帶但冇用,可唔帶)
地蓆(充氣地蓆,56月其實唔用都得,睡袋好夠暖)
行山Pole(有帶但冇用,可唔帶,不過我係平時都唔用,成團得我同帶隊冇用Pole)
糧餉(帶多好多,一餐兩包餅乾仔都夠,我帶多一倍唔只,白白揹上揹落)
水樽(一個硬一個軟,硬果個可以裝熱水)
拖鞋(一定要帶,Teva拖鞋堅好着)
襪(三對比較安全)
帽
保暖帽
手套(冇用過)
高山藥(帶左冇食)
毛巾(保暖,防曬,抺水/汗)
防水行山鞋(三個月內有着過行山,同團有兩個爆鞋甩鞋低,要帶隊用索帶加闊膠紙頂住)
太陽眼鏡
相機(一單反連三鏡15超廣角,35微距,18-135,加一可單手操作DC)
手機(放幾套小說落去,收唔到訊號都唔會悶親,台灣人多用Line,FB未必個個有)
迷你腳架(冇星冇日出最後冇用過)
尿袋(ASUS ZenPower Ultra 20100mAh好好使)
防水袋
保鮮袋(大中細四五個,放電池,尿袋,臭衫)
頭燈(連電,三粒3A電唔係用好多次,都唔使換,夏天帶6粒都夠用)
食具(碗筷匙,杯都有帶但都係冇用)
紙巾(四包用左兩包,高山山屋厠所冇厠紙係常識吧)
睡袋內套(又係帶左冇用)
大背囊(Coleman 40L)
細背囊(犀牛牌G-118)
刀仔(冇用過)
其他?(有女士用M巾放係鞋內吸濕,呢招真係絶)

台灣雪山主東峰訪翠池3,4日

第三日行最多，不過都唔會太攰，因為可以用細背囊。一日四點起身五點出發，不過台灣六月好早日出，雖然尐雲厚到見唔到太陽不過都夠光唔使頭燈，頭燈用得最多係執背囊時用。

日出前出發，但行一陣已經收頭燈。

第三日主菜係雪山主峰同翠池。

指住唔知邊個百岳。

黑森林,冇耐之前春天大霧有人行到迷路。

途中經過石'瀑'。

森林出口已經見高山杜鵑。

冰斗尐高山杜鵑多到呢。

雪山主峰

由主峰下翠池既碎石坡比哭坡更似哭坡。

影左當Cap

影左當Cap

翠池

回程返369,更多杜鵑,可惜下雨

第四日一早起身，不過第三晚人比較少，可以瞓個好覺，5點幾出發,9點幾已經回到登山口，全程都下雨，影尐好多相。之後坐幾個鐘車去洗白白，食午餐，回到台北已經係4點幾。

登山口既水池都好出名，只此一家。可惜有雨，正常都係影有倒影。