丹沢主脈縱走(Day4)

行富士山唔係大問題,第四日先係主菜,我有比個行程比隊長睇架,不過佢有冇睇唔係我管轄範圍內,睇左有冇發現問題更加不在考慮範圍內XD.

事源自漫畫'山與食慾與我'49話,見到縱走二字就去找一下地圖,起點位於東京同富士山之間,正好可以落富士山後'順路'走一趟,傳說也是一個可以遠眺富士山的地方,還有就是出名的蛭ヶ岳是神奈川縣最高峰.之後就係網上揾路線,八下山屋,諗住一晚分兩日行定一日行完好,最後決定富士山後休息下,第二日走一日完成比較好,主因係山屋比較煩,二來全程約24km,隊長應可應付.

路線圖

行呢個山脈既起點終點都會有鹽比行山客用,日文有講解,當然我地唔識日文,但我知點解會有鹽XD

由開始到結束行程,上山落山都係全部行裝揹上身,有8至10kg重.

指示清楚

大倉上山口有兩個公仔(左手邊),日光日白還好,夜晚見到就......

兩邊都有大樹遮蔭,不過山腳位比較焗.

有時仲有保育介紹森林裏既小動物/植物

每隔一段有休息位,夠放背囊加大字形瞓上去.

為左保護植物同好行尐,好多時都見到木板路,有一格格即使有雨都唔會跣.

即使個山唔高,但一樣有山屋,不過平日唔係間間都開.

一泊二食6500円,我影得差冇攪個CPL.果條巾有隻鹿,條巾有得賣800円,個山真係有鹿,不過我地遇唔到.山屋可樂500円,合味道杯麵300円,隊長要左個食得好開心.

唔比爆林

大倉到丹沢山約9km,丹沢山到燒山登山口約15km,上山耐尐,落山快尐,上山用左5個鐘,落山用左4個鐘.其實條路唔難行,上高亦不算多,難在我地都揹住行裝,香港少有揹咁重行山,除左露營,隊長冇咩呢方面經驗,攰死佢,但佢係小強唔使怕既.行左冇耐已經開始毅行模式,"比我休5分鐘","唔得,三分鐘";"休下先","前面先休啦".....冇事既,我係前面行,久唔久等下佢,都唔使等好耐,有時影兩張相就見佢行到,上山慢少少啫,落山復活啦.

山上都成日見石龍子,幾靚,香港都有不過少見尐.

walking dead XD

應該食得,但係唔好食啦,好多昆蟲爬過上去玩.

去到最高點,隊長都仲行到既,約行左5個鐘10km

過左最高點後開始少木板路,但條路都仲係好正,係有雨時比較跣,有時要小心尐.

接返東海自然步道,東海自然步道係由東京高尾山行到京都,差唔多1700km

行近燒山時有雨,靠TG5影

終於近終點,全程都唔使9個鐘,趕得到尾班車.

呢條線除左蛭係一個伏之外,另一個伏就係燒山果邊尐車一日冇好多班,平日下午只有兩班,趕唔到就行返出去,星期六日好似更少,下午得4:23一班,所以多數人都係一早由燒山開始,大倉結尾,不過大倉近我地尐(行完富士山計).夠時間既,唔夠咪行返出去囉,好似7km馬路左右,行到三ヶ木.

蛭即係蟥螞,吸血蟲,個山名都寫明蛭ヶ岳,吸血蟲山XD.比吸血蟲吸住既話,用鹽撒上佢身,佢就會縮,之後可以好易彈走佢.

蛭ヶ岳"特產"

行到近巴士站時我都睇下自己對腳有冇吸血蟲,是但睇都見有兩條吸住隻腳,跳幾跳震左條走,都冇再睇真,快尐到巴士站撒鹽好過,順便叫隊長睇下有冇蟲爬上佢對腳,尐蟲嚇親隊長,攪到尖叫發狂XD,問我點攪,我都係叫佢唔好理,去到終點撒鹽.隊長對鞋係富士山已經入沙入石入水,而家入埋蟲再加鹽,返到酒店再浸水,着左十次都冇已經飽受煎熬,我好懷疑隊長返到香港仲會唔會着返呢對鞋.隊長一路撒鹽一路爆粗,佢對今次行程既評價已經不能用中英文操口形容XD.

我比吸血蟲吸左啖,唔痛既,係尐血流左陣先停,個樣嚇親人啫.

晚餐.隊長終於會食返正常人份量既餐,之前佢飲野多過食野,咁都有力行得到,不愧為小強.