七藏溝(一)

一朝早起身集合,但等車遲左一個鐘有多,第一印象就覺得今次馬幫不太好,搬行李上車時個馬夫仲企上堆行李到,好彩營骨冇比佢踩斷.仲要坐一個多鐘車先到起點,第一日就已經18km,不過少上落,入黑前過半數人到達,有兩個要坐馬,坐馬的位位一百人仔,上年貢嘎那個不另收費,今次個馬夫食人唔吐骨.

起步天氣很好

牛場

之前夜晚仲係有雨,地有積水,路有爛泥

中途有人收保護(環境)收費,位位三十人仔,話過河的橋都是他們修的.

其中一條橋,第一日共過了三/四條橋,唔使濕腳

長海子雪山倒影

夜晚幾個團友都出來影星,抬頭就見銀河,一天都係星.

七藏溝(零)

上年朋友行牛背同貢嘎,好靚,朋友每年兩次長途,春秋二祭,我選其一,兩次都是秋季,貪其金秋紅葉.今次運氣好,出發前天氣有雨,到出發時似未轉好,到上山時卻好天,直到下山後當晚即行雷閃電下大雨.上次行得比較高,最高點有四千九米,今次只有四千三,全程没有高反,睡眠質素亦徍,上山以來,一晚比一晚暖.

第一日去深圳機場,約朋友於羅湖,坐地鐵到機場前一個站,再轉巴士,坐兩個半鐘機.下機後坐機場巴士到茶店子站放下行李,再轉地鐵會合早一日出發的朋友.

好耐冇去深圳飛,要朋友帶先知點去

密集恐懼症

深航去程飛機餐唔錯,回程就一般.

朝早香港出發,到成都已經入黑

第二日都係坐車,由朝坐到黑,坐足12小時先到松潘,去旅館放行李,再出去食晚飯已經用了一日.

第三日先係開始真正的七藏溝之旅.

無緣的雷利

今年終於唔係玩156,而係去玩78km,原本冇諗過玩,但朋友想邀請,就隨緣吧.玩完UTMF後對腳休息夠,但筋骨異常地硬,已經常常拉筋,但都有朝早瞓醒伸懶腰時抽筋情況,比賽當日都係冇諗住衝太多,但又唔想太慢,定左目標約廿個鐘.

都怕個天有雨,帶左件防水風褸,諗住細雨頂到陣.朝早比賽開始都天陰,直到中午先熱少少,東洋山都未太曬,5個半鐘到沙田坳,中途有些平路都冇全走,上東洋山前仲休左陣.沙田坳有十卜,有飯食,飲蔘蜜,食大會雪梨.落到引水道慢跑去大埔道,可惜隊友開始肌肉痛,跑一陣要行一陣,之後過去城門,要上樓梯,隊友要停低休息,我兩隻腳條筋都好緊,好怕會抽筋,成機拉筋拉返陣.

到左城門又休返陣,隊友回到尐電,塘畔徑都追住另一隊跑左陣,可惜過左平路上斜去鉛礦坳時已經要還,個天開始下雨,隊友大肶小腿前後肌肉都硬曬,加冇帶防水風褸,見到佢起雞皮,係鉛礦坳休息一陣就慢步落元墩下剪帶,我都冇戰意,落雨慢行上九龍坑/八仙食風好易病,為左下星期去玩,放棄果兩分.之後係個CP站等小巴返大埔火車站食晚餐.

CP6先派既摺杯,好過HK100果隻,這隻細尐輕尐.

都有50km,要食返夠本.

下年唔想玩比賽,不過年頭得3分,今年又抽唔到HK100,TNF直頭冇諗住報,LT70都冇埋,得返大嶼山,諗住平平地報50k,朝早跑,夜晚仲有機會返屋企食晚飯,唔使通頂捱眼瞓.夠4分,咁2016抽HK100,有冇都冇影響2017既UTMF4分報名要求,2016年可以安心(係個山到)食玩瞓.

UTMF 2015

因為雨天關係,所以没有帶DC出發,但手機都影得不多,很多時都雨粉粉,部SONY SR個防水蓋已甩,要用保鮮袋套住,所以多數影下大會食物就收機,怕冇電都係原因之一.後來連個人都冇電,冇心情影相,有時間都用來瞓覺.

講返比賽,今年改左比賽在夏季季尾擧行,剛好遇上有颱風迫近,雨帶正好比賽果兩日路過富士山一帶,賽前賽後都見好天,就係比賽時有雨.

開始係平路,同朋友都佔了個好位,跟住頭隊跑,都不用太快,跑了3km左右過馬路上山,一般行山速度,路窄時睇後面有冇人想超前,快一兩步到闊一點既位讓路就可.煩的在下山,有幾段斜路,如果有雪橇車,一定可以一下滑到低,可惜我冇,要雙腳左右跳保持平衡,好幾次都差點跣倒,先頭部隊當然係不怕死的多,但後面比較慢的就未必個個衝住落,其中一兩個小心翼翼慢慢落就會開始塞人,所以大會第一個CP就加了半個鐘,但仍然有很多人趕不上,第一站就DQ左.後來睇返時間第一站排名約二百,真係衝得有點太過.

A1食物,有豬肉同唔知咩既一片片野,一口粉,唔啱我口味.

A1到W1又讓左堆人過,自己慢返點,四頭肌都要回氣,再到A2還算正常速度,W1去A3就吐血,泥漿上落斜,上上落落幾個山頭,上年就係另一方向行完呢幾個山就傷左腳要退出,今年小心以無傷為上,W1時時速有6.81km/hr,到A3時已急降到3.35km/hr.之後去A4多返正常路先回升速度,到A5時仍有5.5km/hr以上,用左22hr37min,行左103km.

W1食到既飯,白色果堆係腐竹,係全程最好味既食物.

A5有豬排包,但咁肥,我怕嘔完再嘔

有食,不過個湯好重口味,三碗水煲埋一碗咁

100mile比賽永遠最惡劣情況都係100km後發生,A6去A7時落有大段落斜,跑左一陣就嘔左一堆黑水,應該係A5站飲左啖甜到嘔的紅茶(原本我係想飲中國茶提神),下次真係除水以外任何飲品都飲不得,休息一陣都未回到氣,後來食唔到,能量有出冇入至後段A10趕不到cutoff時間.

嘔完之後的CP多靚路,可以慢跑,冇力情況下跑一陣行一陣,不過個人好眼瞓,一向上行就總要行一陣停一陣去小睡一會,次次一瞓都唔知自己瞓左幾耐,多數係被其他後追上來的參加者嘈醒或照醒.A7已經行左126km,用左未夠29.5hr仲有時速5.7,但個人已經狀態急轉向下,咖啡又唔敢飲,怕又嘔到一地都係.去A8好易行,大半都係石屎路,半條命咁到,過左33個鐘多幾分鐘,還有13個鐘行33km,不過係A8一合上眼,醒來又少大半會鐘.

A8去A9個人好似冇電咁,6km路行兩個半鐘,中途只上過一個山仔,上升四百.之後的杓子山大上大落使我耗電至零,記得在山頂長櫈一合眼又半個鐘,落山到一半時已經知到唔夠時間,到終點前約17km(已經行左155km)到馬路,跟另一日本人參加者同大會工作人員問有冇車接返終點攞行李,冇精神行去A10.等左一陣有車接我們,一上車就見到朋友,佢又係嘔到冇力行,係之前一站被cutoff,佢仲嘔得多過我,係車到都仲嘔緊.返到終點攞完行李仲要趕返旅館退房,好鬼忙.

朋友完成後洗淨全部裝備(相內只係約一半數目),等冷氣風乾

日本敗家

今次敗家以露營用品多,今年大半年操山太多,之後要去露營平衡一下,而且比賽只剩下雷利,比賽用品要買的早就買了.

烤多士架

燒烤架(其實有多士架都夠用)

摺櫈

孤寒爐腳架

 

銀包同雪糕羹

UTMF EXPRO買的裹布

可以當三角巾包頭,包便當,實都係唔多會用,得個靚字

UTMF EXPRO買的頭巾

仲有些冇用得個玩字(其實上面果堆都唔係特別有用,笑)

CHUMS的摟蛋

孖寶30週年撲克

撲克背面,因為打算送比人,所以冇打開.

孖寶30週年一番賞抽到隻杯

仲有一對拖鞋,兩條CWX,個仔既車仔,LEGO(日本買真係好平),老婆要求既零食,化學品就唔使POST出來啦.

日本之旅

上年比賽在春季,東京入大板出,東京没有過夜,對上一次到東京閒逛已經係5年前渡蜜月.

第一日去新開的戶外村,貨多但一點便宜也没有,去的只是為了食雪峰

一半食具器皿是用自家出品

套餐份量不算多,但有三盤烤蔬菜任食,洋蔥(上面第三張相),薯仔,番薯,紅籮白等,一定食到飽.

枱櫈都有snow peak字樣

甜品,其實想睇隻碟係唔係有snow peak,snow peak有出碟,不過呢隻冇雪花圖案.

之後去東京車站,但冇戶外用品買,同行朋友買鞋,我都未聴過的牌子

夜晚食左個自助餐,啤酒任飲,但我唔飲酒,食就好一般,早知唔跟朋友(一個酒鬼)去.

第二日跟另一邊朋友,去的地方比較啱心水.新宿車站附近的一間戶外店,有些貨品有特價,朝早眼看手不動,夜晚才回來買了一堆.

之後朋友就帶了一團人去看鰹鳥,我買了些MIJ有用没有的.

轉角有間低調的甜品店,午餐都没有食先食甜品,救命.

估唔果到尐甜品好得意,看似蛋糕,其實大陪份都是雪糕來.

之後行過幾條街,食龍蝦熱狗先係午餐.

第三日坐車去河口湖,一下車就去旅館放低行李,再去會場GEAR CHECK.同行EXPRO,但冇咩氣氛,加上毛毛雨,又買了些記念品就去超市掃貨.

第四日上午食個好味鍋物就出發去會場.

第五日係泥濘中行屍走肉.

第六日得半條命回旅館,買車票,浸溫泉,返新宿,去池袋

預計錯時間,應該預兩個鐘先夠喉.

池袋祭

第七日朝早去築地食壽司,傳說話下年搬.

下午去買玩具,是但一間有幾層樓好似BIC C既都可以,反正都平過香港.

第八日朝早最後衝刺買手信,下午去機場,轉頭又返到現實既香港.

9月頭

整個9月都没有記錄,十月一次過寫返.

8月尾正是三日長課,接住的星期就開始咳,由咳少少到咳多多,多到同事都怕.請假睇醫生,換來抗敏感藥,但效用不大,食完三日藥都仲係咳到甩肺,最後屋企大清洗先好轉,轉眼已經過左兩星期到月中.好轉後那星期仲有幾聲咳,但覺得跑到步,星期二同同事放工跑返荃灣,休息左兩星期可以跑返感覺太好,加上比之前涼爽,快了5分鐘到荃灣,感覺好攰但好滿足.

之後星期日同朋友行港島徑頭25km,一路行一路吹水.朋友參加左倉鼠跑50km,跑運動場不斷轉圈的感覺實在太差,仲要125個圈,諗下都覺得悶,自己近半年跑運動場好似最長跑過8km(20個圈),以往記錄最長好似係14km(35個圈),之後多以10km為限,倉鼠跑不用預我.

之後的星期一晚就上機出發去東京,出發前有睇當地天氣,有雨有雨同埋有雨,當時諗的只有"既來之則安之",這想法太樂觀了.