東平洲環島遊

Kbj話一年得一兩個月可以環東平洲，我好耐冇去，最少都六七年前，咁又八八掛掛咁跟佢去。

翠華

更樓石

開始時慢慢遊，反正都要等水退，退到海螺洞同難過水冇水，可惜下午個天開始攪風攪雨，尐浪打埋岸都有尐嚇人，海螺洞接唔到難過水，要過去就要落水，但鬼咁大浪，所以就放棄左。

食午餐

士多放出泥賣

食飽慢慢行

開始風雲變色

海螺洞

行返正常路去更樓石，個天又正常返停左雨，風浪都細左，成班人再係更樓石逆走返海螺洞，個天都係要玩我地，見到海螺洞時又開始落返雨，同埋水位又升返，見到但都係差十幾廿米先連得埋個圈，大浪不宜落水，有得落都未必個個落到，最後見到當連左。

又返更樓石

再返難過水

係另一邊又見返個海螺洞

係天氣轉差前又要轉頭返更樓石。難過水難在尐石滑，幾個人都跣到，好彩冇事，到更樓石後就要走返碼頭趕尾班船，唔係就要過夜啦。

Black Diamond Spot 頭燈(敗家)

之前一家大細去露營，一抽二褦，返到屋企就唔見左個ReVolt頭燈，都用左兩年多，有130流明，跑山比賽都好夠用，不過試過接觸不良，要自己攪下塊鐵片先得，有時比佢激死。反正都係買，買返棧新出版，睇中左Black Diamond Spot，有折，三百有找。

二百流明，夠用有突，防水IPX8，水中一米放半個鐘都冇事。

有大細燈同一粒紅燈，按一下大燈，按兩下細燈，三下閃燈(最難按出，不過少用冇所謂，紅白燈都可以閃)。按兩秒開紅燈，按四秒鎖燈，側邊有個POWERTAP，方便開到最大光用一陣又轉返原本光度。

防水係防電子零件，個電池位好似唔防，冇防水膠邊，合埋蓋都仲見到鐵片。之前未見過側邊開入電既頭燈，易開過之前果棧好多，唔使怕開到爆指甲。

個POWERTAP，感覺幾方便好用。

近照，左上細燈，左下紅燈，右邊大燈，最右好細格係電力顯示，開燈用綠色顯示電量，鎖燈會藍色閃幾下。

0528罾棚角咀一日遊

之前有人想揾人0528去罾棚角咀，唔夠人數去，我又好耐冇去，就參一腳。朝早8點半西貢等，鬼咁早起身，仲夠買個麥記外賣食住等。有KBJ，L小姐同 W小姐，好丫，有KBJ 打頭陣唔使開路。

L 小姐話跑麥一入東霸做熱身，我坐係到都夠熱喎，又唔係揹平時果個輕飄飄跑囊，唔使預我，冇人讚成既情況下最後都係打的入東霸。朝早一陣雨後又好好太陽，水氣又蒸返上泥，行一陣就熱加焗到滿頭大汗。出咀尐路少人行，都密密地，少少蜘蛛網但多多植物阻擋，好彩冇刺，不過都係好刮腳。KBJ匯報遲尐先出到咀，好彩影響不大。

KBJ打頭陣

行右邊

遙望罾棚角咀

襯停雨，來張合照

出到咀反而來個大雨，我自己用件雨褸包住自己同背囊，KBJ只保住部電話，唔係好理尐雨。個卜土冇位放"軟銀行"，只好毒完再起過，等左一排最高指示話走得，最後都係唔使我地出手。回程更加大雨，條泥路變左條澗仔，KBJ習以為常，掛住玩水閘，用隻鞋閘住尐水，儲滿水就放閘，L小姐係後面食曬。

天雨路滑慢慢行，上返近西灣山個亭時，KBJ提議出西灣亭，可能會快尐，但係有伏喎，好似話果邊條路都有山泥傾瀉喎，KBJ話得落村果條路有事，我同L小姐都唔係好信，萬一中伏要返轉頭又再上過西灣山，仲要開始入黑，一致反對。

慢慢返到東霸，唔覺唔覺都近8點，好好彩有架的士比人CALL入東霸但又比人放飛機，咁就益左我地，唔使CALL車又唔使加錢。上左車個司機問西灣亭有冇車入，司機話山泥瀉到成個山仔咁，唔使諗咁快有得通車，好彩冇行果邊。之後司機仲同我地吹水講行山，徧徧KBJ坐佢隔離，KBJ為左我地安全着想又唔好嚇親司機只同佢講尐大文大路，明明同我地行果時講緊浪茄仔東天門。返到出西貢去運動場執下個人，L小姐帶隊去食小炒，價錢化算又好味。

閒遊花香爐

見有人攪行花香爐,好耐冇行屯門那邊,又有怪石睇,所以就去跟隊.

天文台話大雨,咁我都見,但佢又冇話幾時停雨,帶隊就問天文友,天文友話早上過後就冇雨,帶隊就改時間下午一點集合出發.帶隊未行過,但有問路線,可惜屯門那邊山頭出名易行錯,一個唔神就落錯澗位,用多些少時間,最後都行返正路,順利行一個圈.

屯門坐52k到總站,先去瞭望台睇海,再去劉氏宗祠,地盤旁邊冇條短梯行上去,穿過果園見電線杆向上行,見大石就到第一景點.

劉氏宗祠

向上行 

要行到大石面睇先似乳豬

近期洗板的十字星係豬肚內,不過爬上去有危險性.

之後再向上行就係花香爐,背景高山係青山

落澗時錯左位,要穿來穿去,其中一個位要行樹橋 

攪左一輪終於到方包石

方包石後就行回正路

不過此路似少人行,因出口石橋已斷,此路尾段要濕水.多數行程都是先方包石後花香爐,再落皇帝巖走.

香港島12山連走mission

幾年前跟過個標童朋友走過一次12山,由朝遊到入黑.星期日跟小背心重遊一次,路線有少許不同,當年冇銀灣柱個山,小背心帶左條唔似係路既路,kbj應該唔係行果條路.雖則夠近,行一陣就到,不`過行頭食好多蜘蛛網,小背心塊面又滑左,應該係,除非唔係.

一團5人

樹總部手機既gps真係唔多生性,要行近多幾步先hack到銀灣柱.

樹總經過指路牌特別話我知C4203個位係邊,我知,我知,我真係CAP過,不過已經比對家炸左.

行完銀灣之後既路都係路,係有幾個位密少少多左尐蜘蛛網.

有幾段都有海量白色小花,不過都已經落曬地.

星期六好太陽又冇風,行得比較辛苦,不過風景比較靚. 

因為呀媽節,所以星期六行左三個mission就走人,星期日先行返果三個再接返大隊完成餘下6個mission.因為要追隊,所以没有帶大機,用手機影幾張,風景好,可惜天陰.

呢一張應該係西高山影

 呢一張自己都忘記係邊到影

後6個mission比較易行,石屎路比較多,星期日又有風.夏天做呢個mission還是分兩日比較舒服,有人帶路加開路更佳.

最後12山連走mission圖

鳴謝樹總sub卜土,kbj起mission,小背心帶路,塵總開團,L小姐同遊.

遊香港島

呢幾個星期都去左遊香港島.

lv15左好耐,ap同章都未夠,ap夠時間一定有,章就煩,唔特登去做真係有排都未得,成日種菇都14x止步,可以不理.其他就一係行路,一係起CF,所以一路行一路起CF.

以前大嶼山填色,今次轉去香港島,平時好少去港島,對上港島行山好似係KOTH,小西灣開始上山,行去龍脊諗住起個三層CF,點知起左第一層之後就係個綠海到,差尐想吐血,可以早收返屋企.

係小西灣見到,隻野豬唔怕人,慢慢行.之後又再見到隻,不過果隻怕人,一見我就跑入林.

過左個星期,又行同一路線,不過未開始已經見到大綠色三角阻住左,行多陣又係個綠海到,都化左,轉左慢行儲里數就算,仲有好多UPC/UPV.

睇個天都唔想我係港島東填色,只好去港島西,第一次去香港大學站,個A出口好迷,地圖又冇講係幾樓出先到條山路,玩左陣先行啱路.一路行一路落雨,越落越大,有遮都濕,最後係個停到休左陣,比好多蚊圍攻.之後都停下落下,對鞋濕曬就梗.行下睇下可以點行去第二隻角,慢慢行,hack key,連線,落返平地坐小巴返金鐘,近近地第三隻既位落車,去拆Block link,再行上去,條路又迷左陣,行極都轉唔到上波老道,係交差位抬頭望先識行.

最後連左五層,一層由近60k mu,到最大果層近70k mu,本來可以連多層,不過又有條Block link,算好彩,條link入尐都少咁層,最後加加埋埋都係去到3百萬 mu,仲差一百萬先黑到,再諗下邊到有......

一樣咁高咁大既cf,係大嶼山既話,都唔知有冇10k mu.

Block link呢尐十常八九,我日日都可能Block左唔少人.

冇跑步升行路章真係會快好多,上星期行左70k,今日帶個仔去大潭散步,行左陣就黑左個行路章,個mu章又可以慢慢來,等ap夠就lv16,去公園散步就得啦.

謎之聲:又帶個仔去餵蚊.