蝻蛇尖日出加雙鹿

天氣好熱,但個天好清,有人想睇蝻蛇尖日出,影星,我都想去影下相,咁就出發.星期六小朋友要叩門面試(頭獎有難度,抽獎運又太差),去到下午先走得甩,七點西貢食埋飯先坐巴士去北潭坳,赤徑士多又開返,係士多門口裝水,半個水袋2L左右帶上山.行上大浪坳再向蝻蛇尖行,行分差小路找個平地起營,朋友唔多使食,影陣相就瞓.我帶左包餃子,十五隻,食埋啱啱好.

半夜好多人上蛇尖,幾團人,估唔到咁熱鬧,山上面實嘈過旺角.扎個位都幾好風,熱都唔係問題,煩在夏天尐蚊出動,我個蚊帳又貼身,隻蚊係蚊帳外面飛,激死我,成晚都冇覺好瞓.下次都係用返光波.

個月光又圓又光,好似射燈咁.

瞓前影,有兩團人上緊頂,之前之後仲有幾團.

第二日日出前,又係有人上山頂

明明幾日都係藍天白雲,高清天氣,偏偏日出果陣就有雲,蝻蛇尖仲要有霧,咩玩法.濕度太高?總之就係食白果.今期山棯花全開,一山都係,睇唔到日出,有花影都冇咁傷心.一上一落,返到都係八點左右,之後先執行李,再慢慢落山,朋友有下場,佢返北潭坳,我過大浪西行雙鹿.

舊雲一字排開,太陽影都冇.

呢張相話自己行蝻蛇尖,自己都認唔出.

離開山頂位先見返太陽光

好似好耐冇行雙鹿石澗,想閒遊所以冇全走,過左千絲瀑就接返郊遊徑閃人.水唔大,千絲瀑得一條絲,腳架都慳返.上遊多尐玩水位,不過要走到好遠,早尐收工返屋企補眠好過.

其他行山隊行全澗.

乾爭爭

頭隊等後面,呆等

有兩個菲律賓囡囡問路,問跳水瀑布位,要落澗喎,唔知咩玩法.仲有幾個應該大陸人,行澗上到泥問路點返麥二起點,嘩!浪茄喎,睇唔透,原本佢地想行去鰂魚湖果邊條路,見佢地個樣連自己係邊都唔知,點返佢地去西灣停.

鹿湖郊遊徑接口大休,開爐,行山隊到上泥,睇到都講幾句,呢個年頭都少人行山開爐,當年行山隊行澗多數都會開爐大休,前輩煮麵煲茶,有時仲有糖水.行返出西灣停,兩隻手曬到紅當當,睇到條馬路都係放棄行出去,坐返次29R,早尐歸家.

大霸尖山(下)

第二朝出奇地停雨,天上還見到星星,奇蹟啊,我都想,行左一半左右又起霧,下起雨來.

天開始光

遠處可見太陽照山頂,可惜......

之後開始雨粉粉

起霧

前面座山都唔見影

伊澤山頂

又見返一陣大霸尖山

仲有少量杜鵑

到左大霸尖山時只見一半山

唔比上頂,要行側邊過

行一陣就到小霸尖山,可以上頂,不過個頂一片白芒芒

落返山,有好多手腳位.帶隊話大雨時就唔比上.

尾尾回程先去加利山,很近大路,像一個小丘.

一日四個百岳,兩個係路邊,一上一落30分鐘內可完成,大霸唔使上頂,只有小霸要用手爬幾步,但一頭一尾要行廿幾km,揹住大背囊行,風景變化又不大,帶隊話仲辛苦過奇萊,南湖大山,寧願行南湖都不要再行大霸.最後一日走人,太陽先出返來,不過睇返高位,好似都係被白雲所蓋.

離開先有太陽

又返到登山口

大霸尖山(上)

原本係想行多幾日,但雨季可能比較少人想行長線,成唔到團,急忙轉南湖大山,奇怪地又人多過頭,已經冇位,最後得幾個團可以選,我選左大霸尖山.

天氣麻麻,當然唔想個天落雨,但係冇由朝落到晚已經算好彩,仲可以攞陪大機出泥影相.巧合帶隊的又是上年帶雪山團的那位,佢自己都話年紀唔細,過多兩年就六十歲,比唔少年青人都行得.

大霸尖山除左個山形出名之外,條路線都好出名,因為大多入門百岳團都好少一日行咁長,要行17km平路,再行7.4km上九九山莊,來回都係同一條路,景又唔係有咩特別,連帶隊都話辛苦(佢要等後面等到呆XD).平路太長,但又唔比車入,所以有人帶手拉車拉行李,剛好比我遇到個XD.

觀霧出名山椒魚,所以唔比車行條步道.香港大帽山都出名蠑螈,可惜車來車往,雨後成日見蠑螈餅(比車輾斃)

有雨有瀑布

好多花都掉到地上

平路

石枱石椅

手拉車出場

行左17km先上山,有尐團友都開始謝謝地.

舊橋,比大水沖斷左

高2699米

台北買左本書上山睇

個團日日都好早起身出發,因為路長,帶隊要預時間.三點半起身四點半出發,三日都係咁上下時間,但其實行完都係下午三四點.所以好多時間比我睇書.六點食飯,七點就好去瞓覺,第一晚係山屋到遲左瞓,結果交響樂嘈到瞓唔到,第二朝起身係咁放蚊.

Knot五方塔

五方塔只要MLD TrailStar既十份一價錢,當然一分錢一分貨,係一般天氣用都還可以,大雨既話就唔好試,正版既料抗拉力好尐,阻燃好尐,防水好尐,造功好尐,如要惡劣天氣使用,正版會比較安心.

我係秋天買,係乾燥天氣用過幾次,算不錯,最近係大帽山又用過一次,潮濕天氣帳內外全濕,出出入入時碰到帳頂,羽絨濕左一大片,不過正常係咁,正版貨都係易受潮,單層帳通病,雙層帳都會濕,只不過多層紗網,唔會碰到外帳既水.

頭一兩次起有尐煩,睇呢個,但都係冇用到條帶,次次都係自己估,次序唔同,由入口對面隻角開始定位,再兩邊,最後先係入口,位置易尐預計,開始幾次個形冇咁公正,整多幾次就靚,不過都要睇地形.五方塔佔地比較多,內部空間比較大,我係放張地席,全部行李都放地席上,再係上面起五方塔,煮食都係個塔入面,比單人帳更多地方隨便放.
我有個防水露宿袋，eVent料唔焗，有地蓆，長褲加件羽絨，十幾度大帽山剛剛好,今日又係鳯凰山用左晚都冇問題.

用腳架頂住先

大風壓到個邊位好貼地.

(呢張睇真尐會見到搖黑卡個印XD)

另外比較煩既係要兩支行山棍,我之前用腳架頂住,但要影相果陣又煩,最後都帶多支短行山棍,120cm可伸縮.如果估到扎營地點可以有樹枝用就懶,只帶一支,門口果支用樹支頂替.

再熱尐開始多蚊蟲可能要用返雙層營,個人係紗帳內,煮飯時只露兩隻手伸出去,大肶唔使餵蚊.一係去返尐大風高位,少尐蚊,不過起呢個天幕時大風要小心唔好吹走.同埋大風會吹到個牆,個室內空間會少左,扎得唔好會推倒中間支行山棍.基本上大風扎得唔好會成晚好鬼嘈,拉唔緊果尐位會伏伏聲

五方塔買左返泥係要塗膠水,接駁位先會防水,有尐店家可以收錢幫人塗埋.我自己塗,覺得好煩,都係有人幫手塗埋好,不過我都未試過.

最後一樣就係佢收納果個袋太細,次次收返果陣都要九牛二虎之力,差尐手指抽筋.