Out Door Buyer

2016年12月8日星期四

尼泊爾EBC,Zonglha(第八日)

去EBC唔算難,因為去EBC條路唔使急上,慢慢行唔會咁易爆.因為時間問題,我地第二朝就上kala patthar,上完先食早餐再行去Zonglha.去得EBC,kala patthar就係附近,一上就係,上四百左右,係五千一左右上四百,有力氣既話冇咩大問題既,不過我地時間關係,限時三個鐘左右.上到就上啦,話說kala patthar算係EBC線上出名既山之一,上面風景都係果堆雪山,話係睇聖母峰既最好位置,但其實都係比個努子峰阻左大半.

慢慢上,急急落

上左一陣就已經出左太陽,不過比其他山遮左未曬到.

一路上一路睇住對面個頂變光

山頂既石有一堆都係呢種紋,係咪化石?知既請話我知.

隻錶出到過左5600,WIKI話得5550.

影幾張就閃人落人,趕時間食早餐.

影返個指示牌

六點出發上山九點返到山屋食早餐,之後就易行好多,返落下面Lobuche午餐.話說休閒團行kala patthar就過左一日.

呢條路同之後上泥果陣係完全一樣,午餐之後先有唔同.

沿途都行過,加上趕趕地,成團都冇咩停咁行,不過都係行啫,冇跑.

午餐清清地最安全.

下午條路就唔同上泥果陣,轉右邊去Zonglha,如果直行會返到Dingboche.中途經過Chola Lake,個湖好靚,不過就行唔到去個湖邊.

呢個係Chola Lake,明天先到Gokyo Lake.

上山果幾日挑夫唔會等我地,落山先會有時等下我地.可能因為落山我地前後差得比較遠,怕我地行錯路,所以等下我地.我地都分下尐路糧比佢地,明顯佢地比較鐘意腰果,芒果乾同朱古力,糖就一般.

呢一邊比較少人行,又可能我地遲出發,一路都冇其他人.

終於到山屋,明天打第二大佬Chola Pass

4700果到係冰川,山屋係4800,雖然係落,但上落比較多,尾尾要上返去果段實在使人振奮.

2016年11月26日星期六

尼泊爾EBC,Gorakshep(第七日)

目的地係Gorakshep高樂雪(個中文名名副其實),不過到左Gorakshep只係食午餐休一陣就出發去EBC,今次旅行幾個大佬之一,應該係最易打既大佬,辛苦的在後面.如果只計去EBC,除非遇上惡劣天氣同高反,慢遊模式下真係易過走轉船灣淡水湖郊遊徑.

行5km都冇就到

唔記得果朝食咩早餐,只記得食左等同冇食,最後又係加兩刀花生醬.

太陽出左,但係比個山遮左未照到,河面都仲係冰

太陽終於上到高過座山,暖好多.

好快就行到山屋

屋後面座山(啡色,唔係白色)就係Kala Patthar,另一個大佬

坐定定等大隊到,狗狗曬太陽唔理人,除非你比野食佢,果到仲有另一隻黑色狗,朝早會上Kala Patthar,下午會係EBC.

午餐,太乾,記得好似最後食唔曬.

之後就係打大佬,EBC沿途都好多人,多到好似芒草季上大東咁,路唔難行,有尐位小心滑冰碎石就得,由山屋到EBC唔使上好多.

單程3km多尐,來會差唔多要用四個鐘

有指示牌同好多人比你跟住,唔會行錯.

一路行都會見到條冰川

行下行下見到舊石寫住EBC,以為到左,其實EBC係條冰川到.

又再行落去,見到瑪尼堆同一堆人排隊影相.單人一張,再同帶隊又一張,雙人每部機一張,又再同帶隊每部機一張,再跟住三四個人每部機一張,又再同帶隊合照......,再全團每部機一張,又再同帶隊合照,每部機係指相機同手機(單人,雙人,幾個人,全團,再分有冇帶隊,再分手機同相機版,呢數計起泥都幾煩)......外國人算好皮四,等左咁耐都冇打我地.