休下休下再休下

七一雙尖之後都提唔起勁,好似賽後後遺症(雖然唔係比賽),總之就係成日諗完成左個賽,休下好應該啫.一休就休落去,反正今年真係冇報比賽(直到今日為止).有個星期都勤力過下去做Mission,大埔大暴走,照計同小背心走十幾個鐘做得完,但咁啱,小背心唔舒服,我第二日又有飯局,最後分兩個星期做,都係hea遊.

比賽消息反而好多,有九龍Ultra,上年做過義工,今年可以超低價玩,應該會報既,應該會操下既,應該會應該既.大嶼100又多個姐妹賽TransNT,今年連大嶼都話要抽(如果唔使抽,大嶼100係玩100km首選),但如果報埋TransNT就唔使抽,套餐咁,以為會冇乜人會咁報,點知FB尐人一半以上都係咁報,連毅行隊長都係咁報(佢好似着左某個開關咁,今年係咁報比賽),見到都覺得攰.唔想抽又玩100都仲有荃打火既,冇乜人爭又有好野食,仲要走100有突,又唔特別貴,上年玩左覺得真係正,係行多少少,上多少少啫.

原本想報環大帽,點知呢個時候冇乜消息既UTMF就出消息,終於定左下年比賽日子,仲要係5月1日紅日前幾日,平時買開果幾間廉航機票個價企硬同貴十倍以上,回程5字頭,諗住放棄,點知又比我揾到另一間外國勢力,回程千幾蚊,正常好多,唔理咁多買左先,點去可以慢慢諗,最多都係買平時間廉航,去程都係7百幾.點知第二日出特價機票去程88(回程都係5字頭四位數,唔使諗多左會平),爭唔到早機,買左中午機,加埋就同環大帽差唔多價,就係咁所以冇報環大帽啦(等下個財政'季'度,收支平衡返尐先再考慮),希望冇咁快滿啦.

壹石雙尖肆頂自由行2017

近年七月一日,行山隊恒行山友都會攪個長跑活動,由元朗尖鼻咀到尖沙咀,每年都加CP,今年同上年一樣帽草針,再加枇杷山,呢個山我從未上過去,有支舊標.

好好天

起步位,今年夜晚有飯局,唔等大會,自己同個火星人朋友起步先

清到冇朋友

轉眼又出返元朗

好多雜種狗

上到荃棉坳當然要幫襯蓮姐

慢行上波波,上果陣有雲,遮一遮冇咁辛苦.

甲龍上荃錦有好多澗仔,可以濕水,有個吉樽沿途見水就入返大半支,再一路行一路淋自己,之後係蓮姐到入左三支500ml,即飲一支,再帶兩支上路,好彩上大帽時天陰,可以正常速度上山.大會係上面個停車場仲有西瓜派,又甜又爽,十分多謝大會支援.

落果陣多左兩個公厠,新既定只係臨時,下次經過留意下先得.

上返草山又多左字,香港郊野越來越有強國風格

之後X石

上埋針山

上到針山剛好用左六個鐘

大帽頂之後落山時個太陽已經開始出返來.上草山,休返陣食午餐,落X石,再上針山,落返山就謝左,個頭好似散唔到熱咁,改左慢行.去金山經衞徑到走私坳再接麥徑,衞徑沿途都有幾條澗仔,繼續淋水降温,加上有樹遮陰,到左麥徑可以慢跑返去大埔道,去汽水機到入返兩支500檸檬茶,即場消滅一支,補下糖加提下神,另一支帶上路,過天穚上枇杷山.

枇杷山舊標

上完枇杷山就只剩點去返馬路,有log可以跟去返大埔道,再接彌敦道,數住地鐵站,太子旺角油麻地佐敦,終於見到柏麗購物大道,都係呢到尐商舖冷氣勁尐,不過涼一陣就轉左入九龍公園,因為今年放煙花,尖咀封路,大會改係香港文物探知館做終點,9個鐘內完成,竟然快過上年.終點又有西瓜食.仲有時間去體育館洗白白,之後又坐西鐵入返元朗交人.

往灣洲西標

講左好耐但都係未去既地方,今次有三個專門Kill標既專家帶我上山.除左J先生外,另外兩個D先生同K先生都好耐冇一齊行山.四個人都有玩Ingress,唔計我,對家應該對呢個JDK組合好熟識(笑).

齊腳起步影下隻腳先

K先生對呢個錯位卜土好有興趣,但另外兩位極力阻止XD.

全日上山唔多.

好好天

好想快尐落個海到

落去紅石門.

到下面個水塘

好耐冇見咁滿水

我好耐冇操山,懶左好耐,比D先生笑我肥左(哭),自己都怕死,所以帶好少行裝,水都得2L.四個人好快就去到紅石門,一路都好好太陽,應該話好過頭,雖然風景好靚,但個人就曬到乾.J先生唔怕曬,仲走來走去Cap紅石門卜土.

多數人到紅石門都向右行,我地今次相反向左行.

落水心切,收機落防水袋,浸下水先,踢一陣就到往灣洲.K先生仲帶對蹼來玩.

跟住三個專家行.

向外展中心行.

個入口密到睇唔到,要行左入去先見到條路仔.

J先生話佢聞到個入口係邊喎,我係見都見唔到囉,唔係佢地,我經過多廿次都唔覺得自己會揾到個入口,J先生同D先生都上過支標,都話上次冇今次咁密,今次條路有尐位都唔知左邊定右邊好,一係靠J先生聞路,一係靠D先生揾路.

睇住個頂,見到都熱.,K先生同J先生努力開路中.

個頂風景好靚,影返個海又清.

影返落去

對面紅石門

外展CP:H

右邊海岸上山,之後落右邊,再行一個圈返去.

話說我介紹玩ingress既朋友,個個都黑左菇,奇在唔係成日行山果個都黑左(試解釋土地灣黑菇可能性),知我懶唔多爆林,所以讓比我種菇.四個人正午三十幾度係冇陰位既西頂Hack卜土Hack到人都爆,好快就一志決定放棄北頂轉玩泳綑.

落返山中途又見到塊B牌

J先生同D先生又爆林爆向紅石門另一方向,終於又可以落返水,之後再綑返去紅石門.

呢個島明明比執毛洲大,但地圖冇佢名.

執毛洲,頂上面有一棵油甘子.

係執毛洲頂影返對面

往灣洲潮退時有好多小生物,海蔘,海葵,沙插,青口,蠔,蚌.尾程仲見到隻野豬,係岸邊食海鮮?.

又行返往灣洲起點.

游返過紅石門.

過海都冇乜力,中途要休下先游到返對面,玩到四點幾,上返山脊,要休返陣吹返陣風,休到唔願走,我都好想瞓返覺.之後行返落苗三石澗到浸淡水,爽返曬.食下野飲剩幾啖水夠行返出去.失策既係冇早尐睇小巴時間表,叫的士台又冇乜反應(唔怪得人地坐UBER),最後又要等到8點三先坐小巴返大埔.

蝻蛇尖日出加雙鹿

天氣好熱,但個天好清,有人想睇蝻蛇尖日出,影星,我都想去影下相,咁就出發.星期六小朋友要叩門面試(頭獎有難度,抽獎運又太差),去到下午先走得甩,七點西貢食埋飯先坐巴士去北潭坳,赤徑士多又開返,係士多門口裝水,半個水袋2L左右帶上山.行上大浪坳再向蝻蛇尖行,行分差小路找個平地起營,朋友唔多使食,影陣相就瞓.我帶左包餃子,十五隻,食埋啱啱好.

半夜好多人上蛇尖,幾團人,估唔到咁熱鬧,山上面實嘈過旺角.扎個位都幾好風,熱都唔係問題,煩在夏天尐蚊出動,我個蚊帳又貼身,隻蚊係蚊帳外面飛,激死我,成晚都冇覺好瞓.下次都係用返光波.

個月光又圓又光,好似射燈咁.

瞓前影,有兩團人上緊頂,之前之後仲有幾團.

第二日日出前,又係有人上山頂

明明幾日都係藍天白雲,高清天氣,偏偏日出果陣就有雲,蝻蛇尖仲要有霧,咩玩法.濕度太高?總之就係食白果.今期山棯花全開,一山都係,睇唔到日出,有花影都冇咁傷心.一上一落,返到都係八點左右,之後先執行李,再慢慢落山,朋友有下場,佢返北潭坳,我過大浪西行雙鹿.

舊雲一字排開,太陽影都冇.

呢張相話自己行蝻蛇尖,自己都認唔出.

離開山頂位先見返太陽光

好似好耐冇行雙鹿石澗,想閒遊所以冇全走,過左千絲瀑就接返郊遊徑閃人.水唔大,千絲瀑得一條絲,腳架都慳返.上遊多尐玩水位,不過要走到好遠,早尐收工返屋企補眠好過.

其他行山隊行全澗.

乾爭爭

頭隊等後面,呆等

有兩個菲律賓囡囡問路,問跳水瀑布位,要落澗喎,唔知咩玩法.仲有幾個應該大陸人,行澗上到泥問路點返麥二起點,嘩!浪茄喎,睇唔透,原本佢地想行去鰂魚湖果邊條路,見佢地個樣連自己係邊都唔知,點返佢地去西灣停.

鹿湖郊遊徑接口大休,開爐,行山隊到上泥,睇到都講幾句,呢個年頭都少人行山開爐,當年行山隊行澗多數都會開爐大休,前輩煮麵煲茶,有時仲有糖水.行返出西灣停,兩隻手曬到紅當當,睇到條馬路都係放棄行出去,坐返次29R,早尐歸家.