上下富士山(Day3)

山屋支燈關左都係有個位發光,瞓上面果層都係覺得冇關燈咁,自己攞個睡袋擋住,瞓到一陣.八合目上頂要兩個鐘左右,5點日出,兩點半先醒都夠時間,點知山屋1點半就開燈,太早啦,醒左就算,執野出門,出門就大霧,上得越高就變大雨,仲要大風,凍死人.好彩就日出時停左雨,散左霧,見到個太陽,又有雲海,真係好好彩.

上高山都係要帶多部防水相機比較安全,唔係就咩都冇得影.

日出

日出完冇耐又霧返

原本想寄名信片,點知郵局一早就收左,九月頭先收山屋,八月中就收郵局,太早了吧.

睇完日出,郵局又冇開,冇野攪就落山,係御殿場線落山,傳說中幾條富士山路線最難一條,真係百聞不如一見.落山還好,上山真係睇見都攰,感覺應該係上三次蝻蛇尖或以上.

御殿場線山屋不多,呢間係期中一間.

一腳沙,唔使諗,除非着防水鞋,唔係一定入沙.

見唔到盡頭既沙石落山

兩個都一腳沙,有時頂唔順,要除鞋倒沙石.

落一個鐘先見到個盡頭.

係五合目車站望返上去.

時間多,走左去睇小田原城,細細個,不過不失.

上下富士山(Day2)

第二朝影返民宿,隊長尐移動能力比較差,次次收拾行裝都要比人慢,趕住出門去車站,唔好意思咁打尖買票上車,真係對唔住m(_ _)m,係香港應該會比人鬧爆.

影下個民宿樣

呢間民宿好好人,朝早仲可以免費車人客上五合目.

套票,包來回票加一張500円巴士卷

坐巴士唔使坐好耐就到,見到個蓋章位就落車,原本以為要係下一個站行返轉頭,原來呢個站就係,慳返幾km腳力.

蓋章

呢個站落車就係個蓋章位

之後行馬路,如果照足個3776介紹咁行,馬路行到傻都似.

坐車會係收費站上五合目,但個3776介紹係收費站隔離有條山路上六合目,呢到就跟得過啦,係日本行林道上富士山,路靚環境靚,指示足,冇垃圾,冇石屎路,空氣好,行得好舒服.

收費站旁有路牌指示路線,粉紅色係車路

穿過個森林就見到雲海

上呀上呀

再上就火山地形,一地沙石,冇大樹,不過風景都唔錯.

呢支柱好面善,係尼泊爾上EBC都見過.

價錢反映高度

由森林上,六合目比五合目近,所以一到就係六合目,最後一個章都係山屋入面.

有兩間山屋,兩間都可以蓋章.

同想像中差唔多時間到八合目,夠時間九合目,不過唔想太進取,同埋山屋越高越少位,價錢亦越高,八合目可接受啦.

睡袋係Mont-bell.床位比較窄,台灣山屋闊得多.

咖哩飯,好味,都有尐肉既,好似有.隨餐附茶一杯,只此一杯.

八合目上尐有呢兩支柱,柱上好多円.

仲有呢個鳥居,個位影相都唔錯.

上下富士山(Day1)

之前見有平機票,諗住去日本行下山,原本冇諗住行富士山,但之後見到個有章攞路線,幾得意就去行,上年個毅行隊長見我去行,佢又話跟,咁我計下數應該整佢唔死就做下不付責任帶隊.

講返個攞章路線,如果真係跟足佢咁行就真係悶到傻,山腳到行街咁行,再住係尐冇選擇既位住,一個係よもぎ湯,至今都唔知係咪可以住,網又冇得訂位,好似變左做購物網,第二個係露營場,有得訂,但個價就......算吧啦.因為所以就係咁,唔理佢個行程,用自己方法去CP位蓋章.

第一日簡單啦,車站行一陣就到,落車就見富士山,雖然唔係好清,但見到已經算好好.

個箱入面有蓋章紙同行程書,當然有埋個章,即刻蓋返個章.

都仲見到,好過冇啦

午餐

之後用自己方法去第二個蓋章位,順便睇下個大淵笹場,係見唔到既,過左中午就多雲,見唔到就走人,散步去民宿,散左約10km

附近個公厠貼左個路線點行去睇富士山個位,同見到既話係咩樣.

我同隊長兩個一間房,原本話仲有四個香港人會住隔離房,但睇個勢似係因為打風來唔到.隊長話曬係一個土豪,少有地係外地唔係住四星酒店,甚有新鮮感.民宿主人好好人,仲有一個台灣妹妹識日文可以幫手翻譯,民宿主人幫手訂第二日八合目既山屋,山屋呢家野真係唔係好識玩,網上訂又冇人回應,要有日本電話又要同佢講日文先訂到.

冇野既,隊長玩手機啫,未死XD