九龍50貓

9D 2018 50 Miles

上年有朋友叫我一齊去做義工,今年有優惠報名價,不食白不食,報左先算.有50英里,50公里同連兩日加埋一百三十幾公里.50英里即八十幾公里,心諗冇乜伏既,50公里長尐同100公里短尐啫,咁諗就中招啦.

一個月前操得算勤力,我多數勤力完一排就懶,除非個比賽過100公里或者諗住做時間,呢個50貓志在玩下,有分攞,試下新比賽,少操左,此仍伏線一.玩左咁多年山賽都好少會留意Cutoff時間,除左過100公里,正常都冇諗住會比人Cut,此仍伏線二.新年多飯局,到比賽前一排先知係半夜開始,但果晚已經約左朋友去打邊邊,呢個伏線三堅伏.

夜晚打邊邊任食,肥牛唔少得,自己都怕出事,冇狂食肥肉,不過係打邊邊食炭水化合物都有尐難度,最後甜品食左兩件窩乎.九點幾坐車去元朗同朋友滙合打的入去,等車時見到個單拖比賽裝,叫佢一齊坐,三個人五十幾蚊,行少段斜路.到左起點等一陣,隊長都到,年初二有一齊行過粉領到新娘潭,雖然郊遊mode,但對比賽都有幫助.

三個人一開始就分開左,我跑跑下又見返隊長,我朋友應該係後面留力,佢同我一樣都係夜晚打邊邊先泥比賽XD.頭5公里都係隊長附近,之後出石屎路,又分開左,去到CP1係大帽山到食緊大會糧又見返佢,之後就齊齊上頂,上波波好鬼大風.落果陣就落先,不過係鉛礦坳去個洗手間就見隊長追到落泥,之後就一齊行.

去嘉道理都冇乜事,上山就開始眼瞓,凍凍地頂唔順要着返件褸,一口氣上好過慢慢磨,一慢就眼瞓,上左脊就可以行快尐冇咁眼瞓,隊長有尐咿咿哦哦,落山啦,停左實眼瞓,落左去先講.去到CP4過左一半路程,一停真係堅眼瞓,唔理咁多瞓陣先,瞓過龍左幾分鐘,飲多兩啖咖啡先出發.隊長行左先,上到龍山又見返,成日都話唔使等啦.

之後到鶴藪都冇乜事,但一上完南涌郊遊徑排樓梯後就開始冇電,到落山都係行住落,隊長又追返上泥,仲話我知CP5個時間呃鬼人,CP6會出事,過左CP6仲要追CP7.個人都冇電,想快都唔得,都係果句你行先,唔使等,追到就追.

CP5同CP6差距8公里,仲要上樓梯,但個Cutoff時間就只差1個鐘,即係唔預早尐到CP5,CP6就一定唔夠時間,不過鬼唔知要快咩,快到先得,CP5食返尐應該都未吸收得切,行快陣又慢返陣咁,去CP6仲有兩個鐘多尐,但係CP6去CP7又係要預返時間,最少都要比多半個鐘,即係CP5去CP6都係只可以用個半鐘左右,唔係之後就會唔夠時間去CP7,即係由新娘潭去仙菇峰,過八仙落返鶴藪去沙羅洞,得3個鐘時間.

呢種追時間係半死半生既情況最鬼煩,追又攰到死唔追又會死,我唔想DNF下年再玩,雖然有優惠價啫.去到CP6仲有四十幾分鐘Cutoff,預返最少半個鐘出泥,即係得十幾分鐘走棧,呢個位唔食返足尐真係唔得,除左薯片同椒鹽卷餅(平時真係唔會放入口),比我見到有說謊蛋糕,極品呀,食左件,留返其他比後面尐參賽者,又袋咁尐薯片同椒鹽卷餅上山食.

上衛徑前前後後都有人,個個都抽抽地,追過一兩個又要停低按下腳又比人過返,個個都計緊夠唔夠時間去CP7沙羅洞,平時就真係唔怕佢,但已經行左70公里又唔同計法,仲要一快尐就抽筋.平路都唔係好跑到,頂住上仙菇,休陣食薯片同椒鹽卷餅,食多左叫上返尐電,跟返前面尐人,一路行一路睇錶計仲有幾遠,仲有幾多時間,好彩落山都仲可以快到幾步,到沙羅洞CP7仲有30分鐘先Cutoff,個個都好高興,因為之後慢慢行都可以輕鬆完成.

係CP7休到比義工話休太耐先慢慢出發,由得其他人過頭慢慢上九龍坑山,再慢慢落,有個馬尾過左我都冇追,之後又有兩三個過左我,落到山腳跑幾步馬路就到終點,終於完成.見到隊長飲住啤酒等緊我,佢一早到左啦,早半個鐘以上.

如非必要應該唔會再玩呢個賽,同埋真係唔好賽前打邊邊,冇電到既慘狀真係好可怕.127(50貓人數)+155(50貓/50公里人數),共282人玩50貓,全部得100人完成,生存率<35.5%.

今年個牌,仲有隻玻璃杯送.

Hea走營

今個星期六日HK100比賽,以前自己跟路線玩頭50,今年就免啦,之前跑夠,Hea返陣先.西貢人多,去大嶼,揹住個背囊亂行,夠鐘就揾路去扎營位.八點幾出門,東涌慢慢食早餐,九點幾先開始行.大東鳳凰昂平羗山,啊,夠鐘,轉去石壁,去營地,估唔到有人,單拖,仲要扎金仔,少見.

黃龍有少量吊鐘開左.

大東不見天日.

幾時爛?我都好耐冇上大東,唔想同人迫.

有人渣掉個營係路到,仲好有心咁用石頭壓住,怕吹走?

最PK係營包住堆垃圾,咁算點?等人幫佢掉果陣可以順便掉埋,用石頭壓住唔會吹到四維係?點解可以咁賤格都做得出.99%係香港人,因為隻營係"色翼仔"營.

最後成抽野掉左落伯公坳.

夠鐘就係呢到轉軚唔跟鳳徑.

去返石壁.

由黃昏扎到入黑終於扎好個營,攪咁耐係因為其實扎既唔係營係天幕,仲要唔係一塊過,係兩塊,本來諗住買塊做地蓆或者做前廰,但係心血來潮想用下個露宿袋又唔用返之前個五坊塔,諗住輕丁屎,但一塊實遮唔曬,買塊大尐又話重,最後就買多塊細既返泥,兩塊一齊用.

紅色係露宿袋

中間兩塊疊住.

晚餐又泥二人前.

今次帶個大尐既煲,比夠水,怕佢燶.

另一個鈦平底鍋,一燒就紅,中間好快受熱.

落唔夠油,唉,又燶.

頂!!

算啦,都OK,呢到係一半份量.

營內環境

好似係因為我煮得太香啦(除非唔係),引左隻小動物出泥,就係隻老鼠仔,我隻營夠開放,隻老鼠又夠大膽,佢走入營想同我齊齊過夜,順便揾下有冇好野食,但係我唔想囉.瞓左係個露宿袋到聴到有野好近咁走來走去,伸個頭出去同隻老鼠四目交投,見佢係個腳位,即刻喝佢走.攪到我又要起身減少個營既開放度.唔知係做法真係有效定隻老鼠仔都要瞓定佢知有個人係到唔多鐘意佢,總之之後就冇再入我個營.個營減少開放度,即刻暖左幾度,仲好瞓左.

張地蓆係12蚊店買,1.5米x1.5米,唔夠長,用埋個背囊套墊底.

個門口收細左,再加高,再加埋野頂住,個頂再揾野夾住.

 

邊位加石頭壓住,希望阻到老鼠仔入營.

今次輕裝,帶個地蓆都係輕裝,卷埋佢放係背囊.

枱仔都輕裝,不過用果陣要有尐重野壓住先,唔係會唔平.

摺埋個樣

兩張天幕,一張約200g,2米x1.5米

今次輕裝,裝備約6kg,食既3kg,水1kg,共10kg左右上身.裝備可以再輕尐,唔帶保温袋,唔用pole,個背囊揾個再輕尐.為左兩塊鰻魚(約半條),帶左兩個冰左既綠豆沙同400ml冰,如果食物簡單尐,唔帶冰既話都輕唔少.

用pole行百份百會攪到我慢左,買支碳棍起營都唔使100g,雖然冇pole上山會攰尐,不過平路落斜用pole慢太多,到我雙腳冇力或着行山鞋先用啦.

星期日行左陣就走人,夜晚食自助餐,丫,估唔到又有鰻魚食.

癲傻246

癲傻2乜乜後面既數字對我呢尐普通人泥講係無意義既,施SIR年年加長,但我都係最多100km.今年天氣朝早自幾好,但入晚就麻麻,仲要越來越大雨,夠數就閃人.

朝早七點半青衣運動場集合,一早就雨粉粉,我算好時間先出門,早出發幾分鐘到.一堆人都聚集係有蓋地方,影大合照時應該影到隻手既.

一如以往到三聖前都好多人,洪水穚就開始少左堆,個集團冇咁密,有尐開始跟唔到,有尐打算第二日再跑廿幾km加埋就可以有公仔.再到吉慶圍過左50km,少咁大半,過50km已經有公仔,再上就要又跑50km先會變做100公仔,同埋普通人都攰啦,好多都開始跟唔上,我同呀總去到都仲見到施SIR,不過知到下個cp一定跟唔到,就放棄跟時間表,自己跟返自己速度跑,當然慢好多啦.

食返個牛腩河先,食食下又有兩個呀總朋友泥食午餐,之後齊齊跑,佢地中途加入,目標係跑夠50km,之後跑多10km左右就分開左,佢地計劃剩餘果尐明天再跑.我同呀總繼續慢跑,一個鐘7km左右,有時見到有得食仲會坐低食,食胞先再上路.

新田郵局食下午茶,到河上鄉蘿太豆腐花已經好似就收檔咁,到聯和墟時又買蛋糕食.聯和墟之後就有雨,仲要越落越大,對鞋襪都濕左半,呀總腳板低起水泡,啱啱就返我呢尐慢腳.之前訓練好似有尐成效,雖然唔夠快,但咁長途對腳都仲可以慢跑到,冇以往跑得咁痛苦.跑到十一點幾先到大美督,施SIR個幾鐘前已經走人,我地亦跑夠數可以返屋企沖返個熱水涼瞓覺.

深井

三聖

洪水穚

朗屏

新田

羅湖

羅太豆花

下年自己提早起步,再第二日跑多幾十km......諗下諗下= =zzZ.

四日三夜全麥走

聖誕幾日紅日走來走去,本來諗住新年紅日都會咁,但牛小姐話新年有朋友玩全麥徑露營,正喎,轉軚跟佢去玩,反正日本燕槍果陣都係咁行,香港地長尐啫,冇乜野既,有咩事最多都係坐車走人.行咁多次麥徑都未試過咁玩法,又有機會試下新背囊(我唔小心又買左個背囊).比較得意既係雖然我同牛小姐都識既朋友唔算少,但其實大家之前係未真正見過面既.總結就係成團人都係第一次見面,唔知咩料,一泥就行100KM走營.

29號帶埋個背囊返工,放工即入西貢,係彩虹上小巴果陣就遇到牛小姐,之後到西貢見埋其他團友.齊齊食晚飯.尐團友個個都有個側袋仔(日本好興,不過香港少人用),我成日都想買,但自己又揹個相機袋,好似揹好多袋咁,攪到至今未買,見到人用又心思思orz.計埋自己四個人先到,入間茶記坐低叫餐先,一枱四個人(仲有兩個之後到),得我唔係着住件化骨龍.都未睇真佢地尐背囊架餐,睇泥個個都放毒唔使本咁,好得人驚.

六個人食飽飽去巴士站又多一個人到,一個煙民,尐煙自家制自家食,唔食煙行唔到既快腳(界到煙應該會再快尐),七個人坐巴士去北潭涌起步,行入浪茄.一路行一路聴佢地講故仔,主要都係山藝堂或旅行經,有一個去左尼泊爾一個月,有一個法國行朝聖之路一個月,嘩,都係乖乖地聴故仔.

十一點多尐行到浪茄揾位扎營瞓覺,應該瞓低果陣都過左12點,晚餐食得夠,唔使食多餐就瞓.第二朝6點幾起身攞水,放水,食早餐,烘多士加花生醬,熱食花生醬溶溶地一流.尼泊爾小姐仲帶左兩個自家制麵包,朝早分比大家食,好好味.食飽飽8點幾出發,常見既西灣山,西灣,鹹田,中途休下等下,幫襯下士多,上大浪坳前大休食雞翼,幾好味.上斜前又有兩個陪行加入,不過佢地食埋雞翼先再追我地.尼泊爾小姐唔舒服係北潭坳暫時撤退,之後一團人上章上,又食返個豆腐花先.一停就凍,太陽開始收山,去到雷打石已經5點左右,個黃昏幾靚,落到水浪窩已經入黑,兩個陪行同一個團友撤退,帶隊決定煮埋晚餐食埋先過營地.

晨曦

燶燶地既早餐

例景

2017年尾二既日落

晚餐開左個罐頭牛腩,幾好味,都有幾塊牛腩,同食牛腩河差咁多咁多啦,算唔錯,再加個二人前烏東.個自私煲太細,煮烏東煮到嘔白泡加燶低,好彩有人肯借塊快潔布省下佢.團友又介紹下佢地尐新奇玩意,洗面珠珠,擦牙珠珠,原來有尐咁既野,我都係第一次聴,攪鬼既係我老婆原來都有用洗面珠珠,不過我一直冇留意過佢係咩用途,咁點解老婆係屋企都要用洗面珠珠,實在不能理解(我攞去露營用既話應該會比老婆滅口).

罐頭牛腩個包裝

去到營地見到人山人海,好彩有個邊邊位冇人扎,夠我地一團五個人用,快快手扎好營,四維都仲係好熱鬧,死啦,諗住實嘈通頂冇覺好瞓,事實上都係瞓落地蓆冇耐就攰到瞓着左.

第三日行程最長,最多山上,一開始就上馬鞍山,之後仲有獅子山筆架山,針山草山,帶隊成日講三點前到鉛礦坳,下午三點?咪傻啦,佢係講零晨三點,我次次聴到都會重申一次行程寫晚上八點到營地,計返上去針山睇2017最後一個日落.第三日好多人,尼泊爾小姐復活返泥陪行,仲有個靚女,仲有個形男,個形男好行得,啱啱先尼泊爾行完山返泥唔使休就陪我地行.

上馬鞍慢慢行,帶隊,煙民,形男前面,法國小姐都好行得,其他小姐們係後面差5分鐘左右,上左馬鞍坳小休,自己食一盒粟米,又比一盒法國小姐減輕負重.小姐們上到泥又派野食,有橙有柿,有朱古力,食到飽飽地.

成隊去到基維爾都唔係拉好長,頭隊等左陣,尾隊都到,再去沙田坳大休,計落點都唔使三點扎營,城門附近睇日落啦.午餐同法國小姐分左個二人前拉麵同罐沙甸魚,又輕尐.大休完靚女同尼泊爾小姐閃人歸家,形男繼續陪行,起行去獅子山筆架山途中煙民肚痛,可能食太多即食麵,減左速,形男係後面睇住佢,痛完再追返上泥啱啱好兩個小姐都到,係筆架山休一陣,派下包魚肉腸,拉下筋,腳跟後面條筋緊緊地,落樓梯唔舒服,可能着跑鞋用小腿泥備震用太多,震到頂唔順.

好彩呢團唔會衝落山,個天又入黑,成團都唔拉太開,筆架山之後形男都閃人.全隊五個人行到金山睇日落,月出,個天唔多雲,唔開燈都好光.帶隊決定城門晚餐,大家都餓啦,點都頂唔到去鉛礦坳先食,一至讚成.係城門又用自己個煲,今次落少左麵都係一堆泡,頂~~~~又燶過,今次冇人有快潔布,用幾塊葉頂住先.自己食左半個二人前沾麵,另一半分左比團友一人試啖,都幾好味.

2017最後一個日落 

食飽之後打最後大佬---上針山,有幾耐冇重裝上針山呢,真係唔記得,近年多數都係跑山背囊上去.夜晚好凍,着住風褸上山,法國小姐竟然係第一次行針山,第一次上針山竟然係重裝夜行,勁,帶隊都少行針山,行冇耐就話就到,唔好呃叔叔喎,我行針山行咁多次,真係佢燒左都仲認得出.係山頂見到個大陸人單拖露營為影2018日出,咁鬼凍,又大煙霞,比我就閃人落山,第二朝見有機先輕裝衝返上頂影好過.係個頂到見到有燈係草山果邊快速移動,全都係UTMT同YTF參加者,一路行去草山一路叫佢地加油.最後到左鉛礦坳,係城門果陣一早就過左8點,又未使零晨3點,中位數十一點半左右啦,未使12點,扎營煮第二個晚餐,又同法國小姐分左個二人前烏東加罐梅菜扣肉,又要勞煩法國小姐開爐用佢個煲,我果個一煮實燶.開埋包薯片食,尐食物食得七七八八,最後一日出發可以輕好多.

2017行山最後打既大佬---針山

朝早用個燶煲煲水沖飯加茄汁豆,出發前又磅重,個背囊10kg都冇,慢慢上大帽山.牛小姐上左無耐就係咁衝,上山喎,重裝喎,話雖最後一日個背囊輕左啫,係後面跟佢衝一陣,好快就到左四方山個停,開包麥芽餅食返尐補充下,冇耐大隊都到,慢慢行上波波,帶隊同煙民行頭,不過好快就唔見影,到左波波就走小路慢慢落,午餐食連姐既杯麵,魚蛋加汽水,帶隊同煙民又各買左包薯片分大家食,食飽好上路.

帶隊同煙民好快又唔見影,得我同兩個小姐慢慢行,行到吉慶穚都唔見前面兩位,咁就三個人小休又開餐,又繼續麥芽餅,今次加埋花生醬,麥芽餅夾花生醬都好夾又夠高卡路里.之後兩個快腳係伯公坳到等我地等到就泥可以做露宿者.近大棠有紅葉,超多人,我地揹住個背囊又唔細,好鬼難行.遠離紅葉先少返人,尾段帶隊,煙民同牛小姐都有上次全走臨尾香回憶,仲一路講案發經過,特登指出案發現場位置,睇泥當年(2017年復活節)都真係好悲劇.

睇唔到2018第一個日出,睇第一個日落

最後一段悶死人既引水道,小休清埋尐花生醬,全部帶去露營既野食曬= =V.隊友着行山鞋行引水道行到腳板痛,好正常,正常唔會着行山鞋行引水道嘛.痛還痛,尐人都仲行得幾快,煙民想行快幾步去小解都比人係咁死跟放甩唔到,迫到佢要出聲先走得甩.尾尾入黑用電話開燈就算,唔使好耐6點半就行完到終點200,過埋對面馬會M201,終於可以Quit去食晚餐.

2018第一個月出,攝於M201馬會門口側.