未到下午四點既午餐真係午餐

原來都差唔多四年前既事,第一次麥景陶全走原來已經過左咁耐,果次太惡劣,中途加插太多其他野,攪左好耐先可以去到食豆花,第二次好似少左尐"中途加插",不過都係休得多(好似係),今次天氣好,休得少,水都唔使飲得多,個個都食過夜粥,加上KBJ自己都唔想個摵太伏(良心發現XD).

今次最伏既係KBJ唔知醒,叫人朝早CALL佢但TG又唔通,最後好彩樹總有佢電話去叫佢起身,唔係就又GG.因好早集合,七點半左右車入沙頭角,入到去都係八點左右.一行入村就見紅紙,唔係新年發財係叫人唔好亂入村以防傳毒,香港唔封關咪條村自己封囉,咁我地都係香港人又冇返過大陸又冇病徵,就靜靜地入村,都經過一陣啫,之後就上山.有時見到村民仲有叫早晨打招呼指路,都見慣行山人仕路過啦.

今次唔爬牆,有尐連個閘都未到,Hack左就當到左,相都冇影,Hack and Go,好快就落左山,之後就馬路快步,跑同快跑,唔使停,慳左唔少時間,最後今次三點都未夠已經可以坐定定食豆花.食左三碗豆花,再加煎豆腐,本來想食煎腐皮,但都仲係差尐,已經被清倉,下次請早.

路邊竟然有士多啤梨園,咩玩法

一架雙層巴士

過左幾年,乜都變,連條路都比人翹起埋.

呢間野都靚左唔少

三點都唔使,今次唔係好餓,食左三碗豆花加煎豆腐就夠,飯都唔使食.

中途執到就器兩架XD

其中一架冇座位,好過冇啦.

上斜時候緊係要靠好朋友

未到六點就到米埔,火星人早少少脫離大隊跑先已經做完.

做完搣行返出巴士站回頭影返最後一個麥景陶個入口.

一日鳯凰一日大東

新一年個人都仲係幾懶,不過去左Hea camp食足幾日真係要行返多尐,又想試下個背囊(係呀,又有新背囊,之前仲有一個75L,不過除左雪山,我諗冇乜機會用orz)就跟朋友去露營,一日去行南天門石澗,一日做義工行大東山.

一日去東涌,一落巴士就見到朋友牛小姐,一齊去食早餐,食飽再等煙民,好啦,等下啦,話曬佢都好重要,因為佢識路加佢帶架餐加佢識用尐架餐.好彩唔使等好耐巴士,又啱啱夠位上,去到塘福落車,上返鳳徑,左邊見字上南天門.

澗唔多水,多水都幾煩,有尐位濕左會好難爬.有幾個位有尐煩,但都可以爬到,唔算密,最少唔使食網.大石多,爬石多數有手腳位,不過有尐位鬆散,要小心留意,難位係最頂南天門尾瀑,唔做安全措施9成會死人.

見字'南天門'

冇水,冇問題,有水應該會好大問題.

尾瀑近照1

尾瀑近照2

尾瀑個煩位有兩層,兩層都要突個人出泥爬,腳位有但冇乜手位啱用,爬到上去要摸一輪先摸到比較好用既位,都唔係好食力,加上我對手都冇乜力XD,第二層要用背脊頂住加手迫住上,第一層已經好攰,要引體上升,第二層要引多次,手都痺.總之就係冇繩冇PPE唔好試.

大前題係要係個頂到有條繩,係到頂前左邊有小路可以繞過尾瀑,再回頭落繩,不過果條小路都要小心,有個斜坡要小心,唔好一下爬上頂,有個位橫移先再直上.近瀑頂果陣遇到兩個學生,見到煙民同朋友尐架餐好開心,話要買買買,架餐錢唔慳得XD

上左去再睇返個瀑位

 各男丁爬左一次落一次上就收架餐上返鳳徑,入黑就唔行積木崖,直上鳳頂落昂平大休扎營.兩個學生哥就緊係去伯公坳啦.昂平一早就冇位,去左附近平地扎營,仲好,少尐人靜尐.

 星期日比賽路標

行一陣已經天黑

帶左細氣罐,煲左兩次,加埋1L水都唔知有冇

第二朝六點就起身煲水沖早餐食,七點就收好營行返落東涌,一個鐘左右就到,8:30集合,9:30先開始行上伯公坳上大東,咁近掃尾所以係見唔到參加者.掃尾要一路行一路執參加者外,仲要執下垃圾,石門甲地塘仔都冇咩垃圾,一到大東就開始多,唔知係咪近期流感勁,一路都超多紙巾,突登掉落地,有尐係幾步一張,都係好近期,真係卜街到一個點.

好快掃到去南山,應該要係南山再掃返去伯公坳,但因時間關係,已經有熱心人代替任務,咁就可以早收隊啦.

BTW個背囊唔錯,雖然細細地25L,但三日兩夜唔爬石應該夠用,唔帶三寶,個地蓆又可以外掛,遲下換返個酒精爐又可以輕尐,個營都想再輕尐,但又要買過對棍,唉,錢錢錢$_$

陣馬高尾縱走

之前行過一次高尾山,慢遊上頂,係頂到睇過個牌指可以行去陣馬山,之後就有今次縱走.上網揾過坐咩車,大約路線,行幾耐,跑就唔使既,不過而家早日落果下煩啫,之前一日行左轉就知尐雪多極有限,糧水加熊鈴加件羽絨就夠.

高尾站坐車

之前一晚係八王子到瞓,唔使好似行雲取山咁早起身,一出站就揾巴士站,揾到個站再揾路線,一睇就OMG!!運休中,點睇都係話架車唔去陣馬高原下,心諗唔使返酒站咁低能呱,去到幾遠得幾遠,去左再算,於是就照上車.皇天不負有心人,個總站竟然有接駁車去陣馬高原下,奇在佢又唔係高尾果個巴士講,等我唔使咁早出門瞓多陣都好丫.

 因為接駁車要等成個鐘,我又係人地民居到閒逛,都有好多紅葉睇,有間寺有幾棵幾靚.又有時間食下早餐,夠鐘就見架接駁車泥,一百円一位,坐到陣馬高原下,成架車得三個客,但就一個司機一個收錢,真係貼錢載客.

接駁車

收錢果個日本伯伯仲怕我唔識路,見我落車仲問我行去邊,會唔會原路坐車走,怕我唔睇時間表,架接駁車都幾疏,咁我話佢知會行去高尾山,佢就指地圖有尐路封左,真係好好人.起步見到尐霜,但唔凍,上到近山頂先見到尐凍土,有尐出到朵花咁都幾靚.個頂有隻馬,個姿勢就有尐攪鬼,又見到富士山,但就冇雲取見既咁清.

一日五班車

有封路

之後就簡單,沿途都有指示,除非唔識字,唔係都幾難行錯.仲見有進度"條",不過頭同尾就冇特登揾,佢話19KM,我覺得真係差唔多.

因為唔係假日關係,定架巴士停駛左,所以近陣馬山尐食店冇開,傳說一路都好多野食,行完會食肥左.上左陣馬山之後都冇乜大上落,條路正常易行又夠闊,而家紅葉冇乜,但有紅葉應該好靚,同時會好多人.

介紹返朝早影果尐冰之花

尾尾到高尾山都仲可以見到富士山,如果夠清既話XD,高尾山尐紅葉又多返,因為暖尐?真係唔知點解.之後又試另一條路落山,落到去就啱啱好差唔多日落返酒店又去搬行李去第二到.

轉車返高尾站再返八王子,車站有水喉有埋刷,可以洗鞋,洗走下尐泥先好坐車.