一早起身去坐巴士過大圍,轉車去石門,係大圍揾唔到咩好食,買左兩個包就算,食左一個入閘,出閘再食多半個,去攞號碼布,轉身就遇到朋友P,拉筋熱身放行李,捉到小背心.小背心返通頂瞓三個鐘出泥跑十km,呢個唔知係咩玩法,如果係我可能會請返半日假,一係就跑唔到.
劈頭就衝出去先,唔鐘意一堆人咁跑,怕踩到前面又怕阻到後面,衝前尐冇咁多人,可以做返自己速度,其實都唔知自己咩速度,跑到未爆,仲有尐力留返後面咁上下,多數開始會快左尐,後面就都係捱返終點.
一開始都係漸進式爬頭,一次爬幾個,跑一陣又爬過,爬左唔使好多次就唔多人係附近,我都冇得再快尐,再快尐就返唔到終點.未爬到自己速度果陣已經係小背心後面,之後就跟啦,有力都跟住先,反正佢都唔慢,快唔過佢,快過佢即係玩自爆,食到塵已經當贏,本來諗住跟到一半就會被海放,點知佢好似散步咁跑,話佢快又唔係,係我前面冇海放我,話慢又唔係,追極都過唔到佢.
過左一半,睇小背心好似遠左,加返尐力水,追住追緊小背心果兩個馬尾,有時過左個,未過第二個又比第一個追返,而家真係多左好多好跑得既女將,去到最後一兩km先過曬兩個追得返小背心,最後幾百米,小背心都係散步咁跑,未發力咁,我迫埋果丁屎力水快小背心十零米過終點.
過左終點唔可以停,怕尐血回唔切,停一陣差尐嘔,即刻行快返幾步,泵返尐血先.行返陣先返轉頭繼續話小背心做乜鬼唔出力,全程明係半馬訓練mode既速度跑10km,返到終點好似咩都冇出過力咁,激死我.事後話轉左個枕頭瞓唔好喎,出唔到力,我諗瞓得三個鐘都唔方好瞓得去邊.
事實上前面見唔到小背心我又未必有意志追住佢食塵,時間比我想像中好好多,少過45分已經好心滿意足,平時跑都係46分以上.之後等左陣捉埋朋友P走人,佢都跑到PB,恭喜有得請食甜水XD.
跑完10km後一星期,我好有閒情咁見到有人攪個長途閒跑,由兆康跑到紅磡共81km再坐巴士過海去香港島跑9km,實際都唔係全跑既,行下跑下咁,都冇諗住玩曬全程,攪手問起打算走幾多,都係答盡力啦.可能之前練10km都有尐幫助,慢跑冇咁易攰,係個人眼瞓左尐,最後係一有大休就買檸檬茶飲.平時最多吸咖啡因都係飲可樂,咁長途又上上落落唔想一肚氣,最後飲檸檬茶就算,都真係有幫助,中途都低迷過一排,跑到行係隊尾,差尐想閃人,飲左又跟得返.
今次用腰包跑唔用背囊,諗住輕得幾多得幾多,不過跑得耐都係勒住個肚,攪到個肚有尐反胃咁,下半程有時都鬆下個腰包兩隻手抽住咁行.
好彩有得行下跑下,全跑就真係頂唔順.有得食足兩餐又有得小休下等齊人,其實好多人都完成到,只係有幾個有約,有幾個要玩其他比賽,就跑住一半先,即係40km以上,留力比第二日,聴到都覺得癲.
最後三個人玩到半夜仲係灣仔海傍到跑.尾尾係終點想揾個女途人幫手影相,人地都比我地三個嚇到急急腳走左去,唔知真聴唔到定扮聴唔到.全程最後夜晚十一點四十幾分完成,再半趕半追咁去坐地鐵回家.
今次係第二屆,傳說第一屆要走多最少20km,得一個人完成,行到第二朝四點,好可怕.今屆改左由梅子林上矛平落西貢,之前係走西沙公路.另一改動係香港島,之前係走香港島先,坐船過海,因為要走去碼頭,又要走多幾公里,仲有其他路線都有改良,最後減少20km變得較易入口,亦唔使玩通頂咁慘.
