燕槍穗高連走(四)

一早起身收營,今次真係早,不過收好營,去個洗手間都係7點先起步.由山屋計,上奧穗高岳難過上槍岳,爬的比較多,不過爬得都算正常,山頂有小神社,感覺比其他山頂小神社華麗.一路上時已經有人落山,應該係一早由山屋上山頂睇日出再回山屋落山.網上看到中穗高岳山莊到西穗山莊既人其實不多,地圖話要用8小時15分,救星話我十個鐘應該可以,計起上來我應該用十二個鐘比較安全.

睇返張相,原來係120

一開始冇耐就要爬梯上

對面涸澤岳

山頂神社

360度展望台

過左奧穗高岳頂就麻煩,又係要揾圓圈箭咀,又係一堆碎石加爬上爬落,飲水飲好快,轉眼就飲左1L,到天狗坳已經飲左1.5L,已經知唔係易行,估唔到飲左咁多,剩低1L,時間用左4個鐘,比地圖講既多左一個鐘,地圖話仲有5個幾鐘要行,即係我最少要用7個鐘,果陣已經係11點,再7個鐘即係照計就6點到西穗山莊,但其實過左3點已經唔多好,下午好易起霧,前面可能仲有少量人反方向見面,同方向既應該冇啦,即係唔會好似之前一日咁有救星比水,有咩事就大件事.

行山啫,唔使咁賻,賻上報咩(想上報可以打風前坐船去露營XD),見有路就閃人落山,地圖話係難路,難路易過危路丫,未行既天狗岩同間岳同之前行左3個鐘既路一鬼樣咁麻煩.天狗坳落岳沢唔多人行,有尐地圖冇呢條路線,不過我落左一陣就見到有人行上來,佢地行向奧穗高岳,向西穗行既人係唔會係呢個時間係呢到出現既.(不過世上總有CLS)

呢個位都幾煩,又係揾唔啱位,好彩有相中人指點先可以順利落到.

天狗坳

4個鐘行左2km都冇

我落佢上

落山唔使爬,路標又易睇,唔會咁易行錯,小心尐大石唔穏就得.落左一排就見到小路,但睇GPS地圖仲有大段路先落到山屋.中途只見黃葉,山脊有一兩棵紅枼,TG5就算,大機繼續收埋係大背囊.連埋係岳沢休左陣既時間,3個鐘落到上高地,3點左右.去營地,扎營再即刻去沖返個熱水涼,條命返曬來.

全都係大石,唔好行,但比上天狗岩同間岳"安全"得多.

落左一排終於見返正常既小路.

無止境咁落山

花畑,呢個時候冇花又未見紅葉,有紅葉既話應該會原全係另一個世界.

到岳沢小屋,個人真係散散地,飲返罐汽水休陣先有力落去上高地.

落到上高地,山上已經有霧.

營地分區圖

下次有機會再行穗高連峰唔扎營揹少尐瞓山屋,30L背囊8KG樓下,應該可以快返尐,西穗開始,行個大圈,記錄在案先.