劏魚半條

由上年(定上上年?)有人話要由大嶼山頂走到低,又傳說其實這路線已經有行山隊(火星人聚集的行山隊)行過,Ingress亦有mission由花坪頂開始走到分流,之前分開三日玩過.近期又有人講起話再唔行就天氣開始熱返行唔到,可惜天氣係涼不過都係唔多好.

頭半GPX

朝早八點起步,一行五人,想影相時發現張卡儲存唔到,好彩朋友有帶多張SD卡,我唔信邪用埋電話張SD卡,所以見到開頭有到拉直左但都係唔得,最後要借用朋友張卡先影到相.

朋友要去到大嶼最東南開始

上返花瓶石

開始簡單

之後好大霧,條路好滑

呢幾支標係過左高速公路橋低再上返去,陰澳支標

上緊老虎頭

我係花瓶石之後落山時跣左一次落地,之後由老虎頭落返望渡坳都好跣,直到大東落山後先改善.

望渡坳後上蓮花呢一段未行過

望渡坳上蓮花不用到白芒,路線短左直左,但時間可能仲用得多,因為條路好滑,尾尾要用手捉實兩邊既草先上到,同埋要過個沼澤位,濕左半隻鞋,兩邊草都好密,但已經比想像中好,最少唔使爆林,條路亦明顯.一路都有其他小路,加上大霧,帶路行過都要開GPS睇住行.

上到近鳯徑又清返

可以望返白茫一帶

行一陣近大東又霧過,又係行一陣要抺眼鏡.比上星期暖,可以短袖行唔使着風褸.

接返鳯徑後就簡單得多,大文大路,但係望渡坳上山十分消弭,係望渡坳已經休過一次,食飽先上山,上完山到大東已經肚餓返,落到伯公坳要再食過.我帶左5個飽出門,開始食兩個打低,望渡坳食一個,伯公坳一個,落昂平又一個,食曬.

上鳯凰繼續霧

近鳯頂時竟然清左見雲海

鳯頂大約係行程一半

到昂平已經近6點.

到伯公坳時已經知要放棄走全程,昂平之後仲有最少20km先到分流,再加5km出大澳,行下跑下正常最少要5個鐘.兩點前到昂平係最理想,但係要好早出發,仲要好好力上山,好快落山先得.

麥景陶全走

一切都係自己太傻太天真,竟然信KBJ講既野,騙徒手法層出不窮,騙徒手法層出不窮,騙徒手法層出不窮,很重要所以講三次,之前諗住去睇下麥景陶碉堡,好耐冇去行沙頭角果頭,三十幾km用十個鐘,應該行下快步應該唔使跑都行得完,果邊都冇乜高山......

八個人起步,7男1女,一開始冇耐就知中伏啦,上個山仔,條路濕濕滑滑咁,同行有幾個中左招,好彩都未使爆林,最多係有棵樹打橫阻住條路啫,擒過去就得;又最多都係棵樹有刺啫,唔好掂棵樹就得(如果發現得早).左穿右插終於到第一個麥景陶,用左一個鐘.

第一站

中伏故事既發展多數都係開頭正正常常......係第一站玩左1個鐘後再去第二站,跟住有尐唔正常係好正常的說......好彩都唔使爬好多.

終於到第二站

第二站冇玩好耐,食下後備糧就行人,係後備糧啦,傳說午餐可以食豆花放提,但未中午都餓死人啦,唔好咁天真信中途有補給.再起步時已經過左三個鐘.之後就經過尐沼澤,黑水一腳踩落去,唔好諗,唔好諗,唔好諗,很重要所以講三次.之後就講行左幾多km,係全程幾份幾,好似6km,定7km,總之係進度內......20個鐘行程(原定行程係10個鐘)既進度內,好似話要追返一個鐘喎.

之後係閘邊行,警察叔叔好好禮貌,仲幫我地影相.

上面有條正路的說......唉......不要再說了

之後上左個山仔再去白花山,個山仔好彩唔高,個天又唔熱,個地又唔濕,都攪左陣.之後開始面對現實......我地個行程係10個鐘......說好的快步唔使跑,唔使跑,唔使跑呢......

重點係支標

小背心加馬尾加偽黑絲一支箭咁,前面好似係着涼鞋,仲有KBJ

終於第三站

第三個碉堡,仲有四個碉堡,已經過左5個鐘多尐,之後就開始練跑咁跑,早知跑咁多就揹少尐野,好彩唔係着行山鞋去,對腳一定渣都冇.之後都係石屎路,跑下行下到第四站,6個鐘多尐.

第四站

見到條文錦渡就想坐車

過左七個鐘終於到第五站,再去就可以去食豆花放提,即係傳說所講既午餐......下午四點既午餐都係午餐,終於有午餐.

可惜冇食豆花放提,食豬排麵同魚蛋緊要尐.

行左陣幫助消化後又跑馬路.玩左9個鐘到第6個碉堡,仲有9km左右去最後一站.

第六站同第七站都冇介紹版

已經入黑,玩左11個鐘到第七個碉堡,行返出大路11個半鐘終於玩完.

原本諗住鬆腳,唔只鬆啦,散埋添,筋肉係冇咁實既,不過膝頭哥痛痛地,腳板低又攰攰地咁,全程36km左右.坐返車去上水,女士唔理我地,剩低7男丁去打邊邊任食,JT介紹,幾好味,冇數食左幾多碟豬牛羊雞,只知侍應放低,我地攞起倒曬落煲,三分鐘後唔見曬.

騙徒手法層出不窮,下次要睇清楚尐先得.

2016大嶼50

好彩之前走左轉大嶼試路,試過老虎頭,愉景灣返梅窩果段,知到有尐位滑滑地,密密地,有心理預備,上上落落見到要濕腳爬石過澗都唔會雞手鴨腳.今年同當年第一屆大嶼50比,差幾個級數,當年玩左八個鐘,仲要攰過今次.今年多左平路,上少左山,多左大文大路,仲要全程天陰‬.

一開始長距離平路,唔跑唔得,都冇計時速幾多,跑到就跑,跟到就跟,過到就過,頭段唔進取尐好難跟到前面堆人,平時自己跑青公都冇跑咁快.到十朗CP1用左36min左右,之後跟住兩個外國人跑,一路跟到芝麻灣CP2,停腳食塊餅同飲可樂,水都唔使加就又起步,早過佢地出發,不過係南山已經比佢地追返,之後已經冇乜力,行大半,跑細半.

全程都冇熱食,得熱飲,係伯公坳見到朋友,‪痴到碗熱通粉食,再慢慢上大東,着返件風褸,近大東頂已經雨粉粉,頂位好大風,吹到塊面赤赤痛,尐雨粉又攪到眼鏡睇唔到路要停低抺,行一陣又要抺,都唔知比幾多個人過左,反正就係見個影走過.

過左大東頂,個通粉生效,落山可以快返d,不過都係追唔到前面尐人,到白芒CP4見到其他參加者,但應該係玩100(做17個鐘左右),50果尐走左人,飲左半杯咖啡,仲食左尐野,得呢個CP既橙係冇皮,超讚.

平時唔會飲咖啡,係比賽先會飲咖啡或茶呢尐提神野,所以次次都好見效,個人係醒神左,好似冇咁攰,不過上老虎頭都係慢慢來,落山又比兩個人過左,但係有個到左底又停係到比我行先,之後唔見佢追來.去到見返梅窩果頭開始狂落,睇下7個半鐘冇問題,衝到近低,唔係喎,7:xx都食硬喎,到左低,7:yy喎,唔係呱,衝7:zz,好勤力咁衝啦,可惜最後都係過左最靚時間1分鐘,不過名次已經係有史以來最高.

玩100,50,25,做義工都係木牌,25果塊細尐,其他一樣咁大.

大嶼50試路

星期六終於的起心乾去試老虎頭果邊條路,平時都係上到頂,又唔記得第一屆果陣點跑,條路有尐位冇印象,好似唔多覺有行過.

比賽係梅窩出發,自己練就係東涌開始就算啦,今年漁護收緊左好多,攪到尐山賽都改做行大文大路,成個大嶼50就得老虎頭同個大東,個老人山都冇得上,頭十幾km都好似跑長跑咁,過左芝麻灣先要上大牛湖頂.

得個睇字

收唔到訊號,Cap唔到,又係影左就算.

我由東涌出發,去到南山已經34km,兩點幾,再跑到伯公坳都要成個鐘以上,唔上大東衝落東涌都要過四點,趕唔到返屋企再出屯門飯局,索性企定定hack,同用下尐key,反正冇位.玩到三點先坐車走人.

一層由6百幾到8百幾mu不等,全部加埋都唔夠屋企付近起一個咁多.

全程只上了千七米

敗家Gregory Stout 65

近期公司每況愈下,年頭又要做年報,平日已經OT,星期六日仲要開工,冇跑步冇行山,個人就泥"乾"過鹹魚.上個月買落個65L背囊,月尾可以攞,等到星期五先有時間交收.

買Gregory Stout 65既原因有幾個(敗家總要有理由,合唔合理係另一個問題,哈哈哈).自己去露營40L都夠用,同個仔去露營,40L唔夠使,要裝埋個仔尐食玩瞓用品,最少加10L,個營又要大個尐,個煲又要大個尐,平時自己成個煲上攞住食,埋個仔最少都要帶多套碗筷比佢用......仲要帶佢尐玩具.屋企都有個返大陸行山用既70L(好似係60+10),但係重尐又冇呢個咁方便.

吉囊一個

頂蓋有三個袋,一前一後加個暗袋.

放水袋位,可拆出當細背囊用.

放防水套

另外有位可以放,方便唔使開袋,平時可放褸.

側邊有拉鏈位,可放地圖,地蓆

最正係可以大開中門,方便攞營煲睡袋,唔使翻箱倒籠

側袋夠深又闊

有腰袋係選佢既其中一個原因

放個睡袋入去.

計計埋埋十一個袋位,加由頭到低外掛位,一個人去一星期旅行普通上山應該夠用(諗落都好耐冇一個人去旅行).已發現既一個壞處就係有中間個細鉤比較難開,手指大冇咁就手,佢唔貼住個背囊,有條帶伸出少少咁就方便好多.

p.s.我鐘意個舊logo多尐

p.s.hkd950有找

p.s.好似係第一次買呢個牌子既行山用品

hea過頭

之前話左2016要hea,新年食左好多油膩野,年初三去大嶼山試個xcls mission,去估下要幾多個鐘先行完,東涌開始,石門甲上昂平,隻雀,L024,隻雀,L023,隻雀,去到L022唔夠時間,要返歸,只完成約三份一,扣除東涌上昂平都用左5個鐘,中途去了市集大休半個鐘,4.5 X 3,計返都要13個鐘起,昂平起計上左千五,距離只有14km,毅行者平均1km先上升43m.

頭一個鐘係東涌上昂平,約6km,如果想一日內完成都係坐車上昂平比較好.

行完果日落山都好地地,點知第二日樓梯都差尐行唔到,都好彩休左兩日對腳先正常返尐.可惜星期六玩果個唔正常,個活動名充分表現出活動既神韻.今年叫癲傻220,由前年180開始,上年200,今年220,已經問埋下年,會唔會240,答案係230,因為施Sir唔想玩太晏.

今年跑左43km就跟唔到大隊,其實可以休夠再出發跟大隊再走多7km就有50km公仔,不過冇所謂,志在參與,下年再戰,比我hea返夠本先,哈哈哈.

一早青衣運動場就好多人

cp1

cp2

cp3

cp4

跟唔到大隊,走錯左,呢個係上年cp5,今年唔係呢到.

我幫人攞今年隻公仔,紅色係100km,今年50km係藍色.