燕槍穗高連走(一)

一早起身,六點左右,出門行返去穗高站,那裡就有去中房温泉的巴士站.到巴士站等車時已有另一個日本人等車,但巴士未到,就已經被JR帶來的行山客呼喚夾份打的去中房,有叫過我,因為我唔識日文,又唔知咩價就搖頭繼續等巴士.雖然穗高站係中途站但未到旺季(山上紅葉未盛)加上星期五,問題不大,有位坐,之後都仲有幾個站有人上車,到最尾都有位剩.

出門時日出無耐.

總站落車就係中房温泉,向上行幾步就見登山口,有個資訊站似既小木屋,可以投登山計劃書,但唔知份野想點,我行程又隨意就冇填,我見成車人都係得一個人有填.去洗手間,執下背囊掛返塊太陽能板出泥差電.一開始就向上行,開始比較多樓梯,之後就冇咁斜.

漫畫《岳》的登山呼籲.我個人比較喜歡《山與食慾與我》,不過講登山安全,用《岳》比較適合.

中途有四個休息位,由其團隊登山的人多會係呢尐位到停留,單拖就唔好休咁耐,係團隊起步前就起步,唔係就有排"素面麻石".大約兩個鐘可以上到合戰小屋,出名既800羊西瓜,56HKD一片,八份一個,沙田坳汽水都十蚊啦,做西瓜汁都唔只330mlx2啦,高沙田坳一倍唔止喎,800羊都唔係好過份啫......轉個頭又見個西瓜賣曬,個哥仔又切另一個西瓜.

記錄下時間對比地圖提議時間,用來預計之後的到達時間.

熱到除左風褸.

富士見係見唔到富士山既,因為全都白芒芒.

開始見到黃色葉

最出名的西瓜,800羊,雖然一個人食有點奢侈,但我就是單拖呀.要落鹽,要落鹽,要落鹽,很重要XD

到合戰小屋兩個鐘左右

合戰小屋之後就有尐紅葉睇,不過都係唔多,差唔多三個鐘到燕岳山莊.又係到執下個細背囊,帶水,幾塊豆板(呢隻有尐似米通,唔係純花生糖),相機就去燕岳頂,其他就由佢放係山莊到.

見到燕岳山莊

個個都係咁放.

燕岳出名既海豚岩

咁啱人地個細背囊都係同品牌,似係新版或另一系列大背囊包既細背囊(我有個60L).

又返到燕岳山莊

中途見到一隊行山隊,尐行李多到好似尼泊爾尐挑夫咁,相比之下我果個似係行即日來回.

行完燕岳就去大天井,一路都有紅紅黃黃,我覺得已經算不錯,比我想像中好.行左六個幾鐘終於到終點,又放低大背囊上山頂,今次好近,一陣就到,不過已經開始凍,急急腳返山屋.比錢攞個牌仔扎營.好彩快手,起完營無耐就開始有雨,宿係營到食晚餐,瞓.

最後500米係最攰的

到山屋

1L水200羊

影下日落

山上有山屋,但我都係扎營.扎營700羊.

一次100羊

煮食架餐:爐,煲,風擋(自家製)

夜晚12度,比想像中暖.實際上近天光先係最凍.

晚餐係即沖飯,計起上泥,中美日韓台既即沖飯我都食過.

燕槍穗高連走(零)

零晨機到羽田,即刻轉車去新宿,如果跑快尐應該可以趕到早一班車,不過算啦,第一日到左都係買GAS同乾糧,有時間就遊下附近景點.

坐車啱啱好仲有日出可以睇

6:35有班車,不過衝唔到.

最伏係買GAS,因為冇得係香港帶過去,但落地又晨早流流冇得買,只好到左先買,穗高站出名坐車去燕岳登山口,但唔代表一定有行山用品舖.出發前係網到揾到間,點知佢已經搬左舖,仲搬到鬼咁遠,6km以外.我走去車站既資訊中心問有冇得買GAS或邊到有得買,最後又揾到間,果度尐人好熱心幫我打埋電話去諗住幫我問,但係冇人應,好啦,我行去啦,2km左右吧,最後見門口話星期四休同不定休,咁啱第一日係星期四.

搬左舖

不定休,呢個絕對無敵orz

好彩我都仲有朋友幫到忙,揾到係過一兩個車站附近有間montbell舖,應該有得買gas.反正去果頭,車站附近又有得租單車,仲可以係單車舖放低個背囊,放LOCKER都要500羊啦,可以順便遊下附近風景,200羊一個鐘,踏車抵啦.

嘩,好大間,入面乜都有得買.

即刻買罐250GAS

仲見有即沖飯.

山長水遠就係為罐氣.

買左GAS之後順便去埋睇山葵農場,有軟雪糕食(成個旅行食左五次軟雪糕XD),有免費水任飲.有得影下水草同水車,遊左陣就踏返去還車.

上午經過一次,但好似冇人,咁我都冇約實幾點會到,冇人都好正常,下午再去就有人開門,可以放低個背囊,間Guest House主人唔係好識英文,唔緊要,我都唔係好識,佢用mac book開google 翻譯,入日文出英文,講下東南西北,之後我就去行超市同食晚餐,佢就去種香草.買左堆糧草,洗個白白,問左第二朝好早出門要點攪,咁就瞓啦.

晚餐亂點左個鐵火丼,山葵好味,魚生就...

瞓前執行李

燕槍穗高連走(事前)

除左諗行程同山上路線(要睇天氣),其他都比較簡單,訂住宿(或住好尐),交通都比較隨意,大約會係邊過夜,到時先訂住宿或買車票.

出發前還真煩,因為想上山露營,但又唔想揹重,左諗右諗先攪得掂個背囊,執到最輕,已經係我呢個平民既極限,如果係土豪就可以再輕尐,但都豪又何需扎營呢(山上還真見到土豪露營).

還真為左輕,連膠袋都磅過先帶,個結果係未計GAS同水,大約14.2KG,呢個係我係機場磅既重量,到左之後再買些少乾糧加罐GAS再入滿1.5-2L水,加埋約16KG上山.

相機其實已經佔2KG左右.

40L背囊約1.5KG,如果用60L背囊要2KG.

衫帶唔多,約2.5KG,一件羽絨,兩件長袖衫,三件短袖,兩條短褲,一條長防水褲,兩條梯褲(一長一3/4),襪兩對,自己着一件短袖衫,防水風褸,短梯褲同短褲上機.

腳架係香雞腳,約0.5KG,最長有一米高,但好少開到盡,開兩到三節,60CM左右高,都係要蹲下來睇,但都好過要貼住地睇.

營係BA營,約1KG,兩層,二人營,當1.5人就好,一人瞓正中間就最舒服,不過係半自立,有尐煩,不過又輕又夠大,特特價時買仲想點.

睡袋約0.5KG(不要問,好恐怖,夠我買個零下十幾度羽絨睡袋),正確來說係一張睡被,但可以兩邊扣在一起,頂到7度,上身加埋自己件羽絨,着埋長褲頂到4度,但個腳指都係有尐凍.充氣地蓆加埋個充氣袋套都有0.5KG,比較重但有明顯保暖作用,收藏算細小,家中有另外兩張地蓆唔使充氣,但體積有近一倍以上.

營低蓆,可能都0.5KG,一張係Luxe幫民紙,一張係Luxe寄倉袋(舊產品,應該已經停產左,但我覺得都算幾好用)

頭盔,0.22kg,佔位但其實好輕,多數用扣外掛在背囊頂.

煲同爐,snowpeak地爐同solo Cookset,同個風擋,約0.3kg,個煲可以裝800ml水,夠使,仲有隻杯用.

唔見左個膠袋水袋,帶左個Camelbak 3L水袋,0.2kg,唯一好處就係唔怕佢穿.

尿袋兩個,各10000mAh,共0.44kg.太陽能版一塊0.5kg,山上好好用,揹一日差滿尿袋尐電,成日都用唔曬.

仲有其他雜物:膠袋水樽,硬水樽(最後跌左落山,仲爆埋),攻頂背囊,瀘水器,拖鞋,腳套(借來的),帽,USB火牛,大機電池USB差電器,usb線,扣,匙(食飯用),十字刀,快乾毛巾,牙膏牙刷,雨衣,太陽超,頭燈,3A電,燕槍穗高地圖,膠布幾塊,繩兩條,即食飯7包,鹹糖十幾粒,仲有幾包華田沖粉(可惜最後都係冇沖到飲).

大約就係呢尐架餐,好彩唔係一次過買,破產都似,會比人碎屍萬段.