星期五有朋友陪,由黃大仙開始,上沙田坳,逆走衛徑到基維爾再回頭,順走麥徑,可惜到近大埔道時朋友比樹根跘到撞到地球,半邊身都擦傷.唔使入廠但都比佢老婆軟禁一星期,跑街都唔比.我只好一個人走埋去,天文台話今個星期有雨又有雷,UTMB又開左鑼,而家半夜操麥徑既人少左一半,到鉛礦坳都只係遇到一隊操毅行,餓餓地就轉落大埔食宵夜,食飽就開始有雨,仲鬼咁大,30k 左右,收工返屋企瞓.半夜揾車坐除左打的,都唔知仲有咩快方法,最後用左近兩個鐘先返到屋企,瞓一陣就冇得瞓.
傳說有苹果批食,但都係食個正常既河粉比較緊要.
行左近六個鐘,黃大仙上沙田坳半個鐘,來回基維爾1個鐘,到大埔道1個鐘多些少,休一陣,去城門約1個鐘,針草約個半鐘,落大埔約半個鐘.
第二朝星期六,老婆去家長會,我揍仔,比個仔玩,12點幾老婆返屋企接手,我執行裝落樓食午飯(一碟炒飯加紅豆冰)直接出發,青衣到荃灣,上引水道過城門,龍門郊遊徑上川龍,上返蓮姐到,再上波波逆走麥徑到大埔道,中途係草山遇到朋友,佢已經行左40k,我只係30k左右,兩個都有些攰攰地,於是一齊行到大埔道先分開走.之後走石屎路,荔枝角美孚,同平時放工跑返青衣路線一樣,行到荔景時計落唔夠數,迫住要來回走多段,落到葵芳又上返荔景再落葵芳,好唔容易先夠60k可以返屋企,用左10個半鐘,1點返到屋企仲可以有五個鐘左右瞓.
青衣除左麥當當真係冇宵夜可言,連麥當當都唔想行去,最後食個杯麵就睡死左.
原本星期日定左六點半醒,但按下鬧鐘合上眼再開眼已經過左一個鐘,趕到八點車出荃灣西,再趕到八點半架51上荃錦坳,之後開始苦悶的雨中帽草針針草帽,用了近八個鐘,中途有留言老家食飯,荃錦坳過川龍落返荃灣坐車返老家就算,35k草草收工.三日共126k.
晚餐食飽回家瞓飽,星期一朝早磅重都仲係輕左八磅,返工食埋晚飯再磅都係輕左5磅,消耗咁多都仲返到工,冇中途休克入廠自已都覺得有進步.
