個月光好圓,不過有雲,冇車既話可以唔開燈,有車都係開燈安全尐,比車見到自己.
以為冇乜人會咁夜入浪茄,因為傳說冇水,點知落車見個揹住UD45L,我去轉洗手間之後出發又見返佢,講幾講問佢去邊,佢都話要全走,不過終點係元朗,我就去屯門,問佢點解行,唔通又係試背囊=_=?非也,原來因為佢上星期帶病在身玩毅行,中途病發頂唔順剪左帶,條氣唔順,玩左7界都完成到,明明今年操得最好,編編今次完成唔到,所以就今個星期一條友去行返成條麥徑.一路同佢吹水一路行,兩個鐘就到浪茄,可以行住吹水,佢話佢全馬4個半鐘攪得掂,我估25個鐘都冇問題,不過有時病就冇得計,運氣都係成功因素之一.到左浪茄我就扎營瞓先,佢就繼續行.
第二日既早餐
仲有一個未食
今次慳家,盡量輕,帶左細氣罐.
起步前係西貢食左晚餐,行到浪茄起營,呢個係宵夜.
山竹之後都冇去過浪茄,第二朝見尐樹原來冧左成排,估唔到.
少左好多人,不過都好,少尐垃圾,又冇咁嘈.
影下個新背囊
第二朝起身睇返個環境,估唔到冧樹冧得咁勁,少左好多人,8點出發,條路都見唔返,條水喉都唔知去左邊.一路行睇下前面會唔會又遇返個全走師兄,最後只係遇過一個重裝鬼佬同幾個強國人.行到西灣停落少少就見到三袋垃圾 (#`皿´),一大兩細,個大既仲要係穿既,唔重呀,但係一路行會一路跌,救唔到,只好帶住兩袋細既去西灣.
個膠袋明明寫住保護環境,FXXK
係大浪西到收到WHATSAPP要辦工,只好坐定定打電話搖控同事幫手.
過左西灣上返山就見到有工程,唔知攪乜鬼.
去到就到大浪坳果陣就見返個UD45L,原來佢係西灣過夜,不過夜晚唔好瞓,話隻營伏伏聲嘈左成晚,我行得慢,講左聲加油就行先,本來仲想講多幾下個營,但識左三個鐘都冇叫人買隻貴營又唔係咁好意思,雖然又黑色星期五,又網路星期一,MLD,ZPACK,YMG,CS,REI,BC一堆網減價,講多幾個鐘都唔掂.
新牌?
好多隻,廿隻都有.
過左大佬山,趕得切睇日落
着燈
朝八晚七,同返工放工時間差不多,天氣好,唔曬又夠乾爽,唔係好幸苦,係上山要休一兩下,一個鐘行4KM左右就得,到左水浪窩過埋對面馬路,上斜路個水喉竟然有水,攪到我大安旨意山腳都有水,點知乾鬼曬,攞住1L水又唔想返轉頭,就過左馬鞍坳落到個停,再行落去先有條澗比我加水,一攞就3L.行萬里長城果陣見人都問下夠唔夠水,使唔使要尐,點知又冇人要喎.攪到我自己得閒就飲返夠本,去到田坳都冇借口幫襯士多.最後去到筆架山都仲有1L多尐,夠我起營過夜就唔落去同尐馬騮玩啦.
之後入黑都仲有好多人夜晚路過筆架,估唔到咁夜都仲有人行,明明上星期先成村人行完毅行,多數都係兩三個人一齊行,其中一次聴到一個人行,心諗會唔會係UD45L師兄?可惜慢一步,我捐得個人出營,佢都已經走左.
夜晚幾好瞓,冇乜風但又涼涼地,第二朝5點左右就有晨運友上山,見到我隻營都覺得奇,應該之前都冇見過有人係到扎營.食埋早餐飲剩兩三啖水就出發,落山同平路,朝早又涼爽,冇飲過水就出返路口,出口有澗可以加返足水,唔使入水喉水,飲返成L又入返兩L幾,夠曬之後到屯門.過馬路見一堆馬騮再行左陣見到個營,應該係UD45L師兄,不過都仲係好早,唔過去打攪佢,我行得慢行先.
連馬騮都晨運
下次帶呢個碗煮杯麵就算,唔使帶800ML果個.
到左鉛礦坳都仲有水比我煮埋個杯麵,不過煮煮下開始有雨,要我中途搬返去個停到食.諗住落一陣會停,點知只係細雨一陣又大返,去到四方停先攞件風褸出泥着,可惜已經太遲,攪到風褸入面都濕埋.怕停低會凍親,過左田夫仔之後都係快步加少少跑,估平均最少都有6km/hr,最後全程用左十個鐘多尐就走到屯門,坐巴士返屋企.
個新背囊好好揹,係條腰帶要自己再穿好尐先唔會甩出泥,防水冇問題,又夠輕.個網背可以放多好多野,3L水袋,地蓆,兩邊放飲水樽,餅乾同營骨.個低仲有四個圈位可以扎個睡蓆,我用防水袋袋住唔怕整污穢,唔使放背囊入面齖住曬尐位.背囊入面加左墊唔使尐架餐頂住個背脊,背囊下邊可以加墊,個腰位更舒服.用料同個側揹袋一樣,所以色都一樣,一套咁,爽.
M201
PS. 信用卡鎖好左,放遠尐先好睇下面兩個網 :P
側揹袋係ZEROGRAM
背囊係KS ULTRALIGHT GEAR
沒有留言:
張貼留言