Out Door Buyer: 2015

2015年12月26日星期六

[#慳家]補鑊

三日連假,但兩日要係屋企做公司野,朝早起身踢着個Program,要久唔久睇下有冇事,一行就六至十個鐘,出山就一定唔夠時間,去運動場跑個10k都得既.昨日跑左,今日就Hea,去五金舖買大膠紙同粗沙紙,補返之前燒穿營既鑊,好似跌鋁窗廣告咁,貼塊膠布就算,係呀,唔係仲想點,塊膠布甩先再算(有諗過買過個內帳,但光速咁比人反對左),算啦,大雨都係唔會帶呢隻營.

內帳貼兩面

地蓆貼兩面

個燒烤網就煩得多,一開始用粗沙紙省,但太多,省極都仲有,省到日出都未完咁,之後去開火燒到尐膠熔返,用抺手紙一抺就冇左一堆,剩下來一層薄薄既,再用粗沙紙省一陣就冇埋,燒多次,冇臭膠味,咁應該清曬可以放心用.

未清前

燒完抺完省完之後

2015年12月25日星期五

[#敗家]Sea to Summit UltraLight Insulated Mat

原本已經有張z-lite-sol-sleep-pad(俗稱雞蛋殼),使用方便,一打開就用得,又輕,又唔怕比草/石/樹刺穿,可惜唔方便帶.如果有馬幫就冇所謂,所有露營用品都一包過放duffel bag,70L位都冇問題,但如果自己揹住行小路,有時會比植物卡住,雖然唔會爛,但有時覺得有尐煩.

係三心兩意下選左Sea to Summit UltraLight Insulated Mat,其實比雞蛋殼仲要重幾十g,價錢貴幾倍(雞蛋殼特價時買好似二百幾,STS要九百幾),R值高50%.屋企開過來玩,老手教落唔好用口吹,吹左濕氣入去會生菌.老手又教落用支水管加個密實袋/膠袋就攪掂.

2015年12月13日星期日

繁忙的兩天

星期五晚公司有聖誕飯局,返到屋企十一點幾,十二點先瞓,五點半起身,向西貢出發.好耐冇去西貢,攪到坐巴士落車係地鐵站揾去西頁個小巴站出口,揾極都冇,企定定諗左陣先知自己身處鑽石山唔係彩虹.

一係坐一個站,一係坐巴士,好似有時間,坐巴士,入到西貢都係八點左右,衝去超市(八點開),買兩支水加三支可樂,然後坐巴士去北潭坳.行一陣玩一陣Ingress,上好耐冇上既蝻蛇尖,不過最後都係冇上頂,免得又要落咁多,不經士多,直落東灣出咀.

起完營,攞水煲1L水,加返水出去時飲,放低水同可樂,煲同爐,地席,營燈......攞返出去就只有背囊,衫,500ml水.回程經士多返出去.北潭坳94巴士出返西貢,小巴出彩虹,地鐵西鐵天水圍......外母生日,唔去唔得.

呢個位食曬風,唔落釘一定唔知飛左去邊

回程長幾百米

天水圍飯局後返屋企再攞冰袋,之前冰落既1L冰同火腿芝士,加磅方包,本來想帶塊牛排/羊架,但飯局夠曬油(食左燒乳豬,必X客),唔想再食肥野.坐地鐵出返彩虹,轉小巴出西貢,已經係11:30左右,未落車見到三個人係的士站,成個露營格局,係的士到之前衝上前問係唔係去北潭坳,再問係唔係出長咀,中頭獎,三個係樂善義工,正係要出長咀露營.唔使一個人包的,平左幾十蚊.

上的士到北潭坳已經12:15,三個義工叫我唔好等佢地,話會行到明天日出,只好一個人又行一次出咀路線,唔使半夜同村狗玩對峙.落東灣出長咀,中途迷左陣,本來想經長咀山,但夜媽媽睇唔到支標係邊,最後都係落左樂善CP位,見返隻營冇比風吹走又冇斷骨,算好彩.最後都要攪到三點幾先有得瞓.

第二朝9點幾先起身,烘多士,想烘第三塊時出事,個烘架放得唔好,熔左個營低,個烘架就食曬膠,好想大聲慘叫隻營呀.

穿左

食曬膠

兩塊多士加塊包夾四塊芝士火腿做早餐,一邊食一邊睇住頭隊跑過.之後等朋友,十幾個都清唔曬五支飲品,個個掛住攞背囊.自己留一支可樂,其餘派比有需要既參加者.未夠兩個鐘就已經好多人走過,等到12點就開始收營,12點七八個字左右跟參加者行返出西灣,中途係東灣行返入面唔經沙灘,到赤徑剛好三點三,等一陣就坐船走人.

個早餐好飽,懶開爐,薯片可樂頂住肚先.

好耐冇坐

個營可參考:

http://www.mobile01.com/topicdetail.php?f=628&t=4087026&p=1#55544744

http://www.mobile01.com/topicdetail.php?f=628&t=4094980&p=1

另加我評價:

得一隻窗,天氣潮濕一定滴水.

防水唔多,落大雨一定入水.

大風個營會徧,入風,我買四季版,我估三季版會吹到瞓唔到.

拉繩位設計不良,拉左都幫助不大.

個營短,用睡袋的話會頂腳/頭.

骨比想像中算好,吹左成晚都冇斷.

算輕1.6kg有得自立.

結論係唔好買呢隻營,雞肋雞肋.

2015年11月29日星期日

繁忙的一天

之前一日飲左可樂,攪到瞓得唔太好,加上好耐冇跑山但又去玩KOTH,又怕第二朝唔知醒,趕唔切去玩針包,轉來轉去終於瞓到,有5個鐘呱.

五點半起身,食早餐換衫攞架餐衝出門,剛好有小巴,飛上車,轉幾個灣落車仲有時間去預定地點,不過一開始就有Block Link,求救,一路行一路試其他位,最後行左頗遠去清其他Block Link.可惜我行太慢,到Block Link清左果陣個中心卜土都比人清左,想Link都冇得Link,最後只係Link左22個卜土,浪費左其他人幫手清Block Link既一番心血.

轉左色,但係尐Link仲係到,Server被玩壞了.

之後去唐記買兩個包,一路坐車一路食左個,到左香港站上巴士,尐Link仲係到,估唔到尐Link會殘留咁耐,最後到我比賽完返青衣都仲有.KOTH香港站之前玩過一次,仲記得係渣馬之後一星期,又係最後一場,人數係四場最少.今日都撞左HK168同迪遇尼半馬,所以人數都唔算多,休左成個月冇跑山,又仲眼眼地瞓,之前果次跑4個鐘35分,起步前覺得自己狀態麻麻,預左5個鐘先.

起步有小妹妹倒數,好攪笑

跑左陣又冇咁眼瞓,個人精神返,天氣熱,但我跑果陣又唔覺晒,返到終點聴到話後面有人中署.上次跑左過28km,今次短左幾百米,都唔係覺得路線有唔同,應該係正常誤差.最惡頂既都係個孖崗山,尾尾果幾km先行,上完都抽想大腿,之後引水道都要跑下行下.全程好多都係石屎路,落樓梯攪到個腳板痛痛地,對鞋又係時候買過對.

唔知係唔係太耐冇飲電解飲品,今日飲好似特別有效果,全程食個番薯包同飲電解/水就夠返終點,平時應該個人冇乜電.

KOTH多左讚助,今次跑完多左野食,之前得啤酒,今次有湯,有蛋糕,仲要好好味果隻,食左兩件先肯走.

個湯好似味精水,我食雜豆就算.

返到屋企再食多個下午茶

返到屋企收拾個人同架餐,之後開電腦玩,一開就同我出WIN10更新,我冇比錢,用緊下載版,唔使更新都得,攪一陣,又話出門去同事婚禮飲.出門坐巴士仲可以用理應唔存在既Link起CF,好鬼神奇.

2015年11月15日星期日

儲磅數,儲mu,儲ap

之前操UTMF使體重下降到新低位後都有回升,但都係136,137左右,所以就繼續儲磅數係屋企Hea,但星期六日係屋企真係好悶,敗家網睇多幾次都係冇錢買架.個天文台又話有雨,唔係就去露營避下世.上星期都有同朋友行下山,梅窩起步,最高位都只係伯公坳,Hea到好似散步咁,慢行就當然手多多攞出泥玩ingress,都填左尐色.

十朗士多星期六都有開.

未到大嶼100比賽日子,好少人行呢頭

南山間屋又靚左,唔知係咪有人住.

去到伯公坳都近黃昏,見到班十幾歲學生仔/妹着行街鞋上大東,幾個熱褲,幾個牛仔褲,仲有個着裙,呢個年頭真係為求呃Like咩都得.睇埋近期新聞,唔使諗,一日芒草未枯一日都唔會上大東露營.

月頭Ingress升左上15,AP有排升,好勤力咁玩左兩個星期都係升唔夠一格,仲要欠個黑章,一係行夠2500km,而家仲差665km,一星期35km,仲有近5個月行.一係就填色,目標都係大嶼,荃灣同環水塘,好彩都過100kmu,有時間仲可以ADA,炸完再填過色,好勤力又好彩既話,兩個幾月都可以變黑章.種菇種到變黑就唔使諗啦.

今個星期日終於回到140磅,好懶咁十一點幾先出門跑下行下,原本跑青公,但跑下玩下比深井上面大塊空位引左上山填色,接返麥10一路向西,都係悶悶地,不過有泥路跑下都好過全走石屎.尾段遇到個自己人,不過趕住落返山,係佢面前Hi左聲就走左.未到M198太陽已經落左山,好彩尾尾有街燈唔使用手機照路咁慘.