執行李旅行上山

今次去旅行又係上個三千左右既山,有山屋瞓,唔使帶睡袋,如果係台灣山屋我會帶睡袋,但今次帶個睡袋套就算,充氣地蓆都唔帶,又唔帶大腳架,慳返10L位,30L背囊已經夠用.

MHW長袖厚低衫上三千用

一條短打行另一座千幾高既山用

上三千用

防風但唔防水,以防萬一用

防水褲上三千用,都有尐洞仔,下年睇下使唔使買過條

OR中層上三千用

三件比賽衫,加件網衫,快乾,行三千以下用

左A200長梯,中A400四份三梯,右A400短梯,快乾,A200長梯行三千以上用,其他行三千以下用

左上:re:echo羽絨三千以上用,以前買落幾抵着,左中:montane event防水風褸,已經甩甩地唔防水,同埋montane都已經唔出event風褸,右上頸套三千以上用,右中:山野之王送既GigaSport毛巾一條,右下:RAB保暖手套,三千以上用

三千以上要用既除左羽絨外放入防水袋壓縮

帽,羽絨,防水褸,加之前堆衫褲

其他雜物:上由左至右,便利雨衣,背囊套,腳套.中由左至右太陽眼鏡,膠水樽,單反USB充電器,濾水器,腳架仔,尿袋.下由左至右:睡袋套,頭燈,袋仔連3A電6粒.

相機袋同Kompressor Summit(30L)

放未相機袋入去

放埋相機袋入去

話雖上三千高,但唔使露營,唔使行雪地,零度左右,冇想像中咁多野要帶,30L都夠用既.個相機可以計係隨身行李,唔計係個手提行李7kg數,仲有位可以放尐無聊野入去XD.

北龍半日遊

朋友有日比張相我睇,問係邊到,我都唔知,去問尐CLS,9A答係北龍,朋友叫我帶,我都冇去過,不過網上睇唔係好長,冇話有咩險位,可以一試,咁就去行,上加落都係5km左右,一個上午行完.行去黃龍入口,黃龍係直行,北龍係左邊.有絲帶,有小路都算明顯,應該全程唔濕水都得,不過有尐位冇揾路,落水游過去最直接.

曱甴,不過唔係屋企常見果幾種,應該幾適應水中生活,攪佢佢都潛返入水唔係爬石走.

水唔算大

水清但潭細

蜘蛛網不多,有都係高位,如上圖

水中亦常見蝌蚪,途中見一隻蛙

盡頭為天書壁

左邊有路上返山路

走返落東涌,中途見四線石龍子

Snow peak Cell2

個Cell2好耐之前見減價買落一直都冇機會用,之前都用Knot五方塔,但係上次加左蚊帳貼身唔好瞓,今次試轉另一個Cell2加另一個蚊帳,個蚊帳其實係Luxe 光波既內帳,中間高頭尾低,我估計可以啱Cell2個形.

今次去大嶼靈會山附近,傳說係睇流星,不過食白果食得多都化,冇得睇都冇所謂,露營當練AQ,EQ同IQ.

Cell2個樣已經夠怪,怪到淘寶都唔會抄,仲要唔係好好用,用既條件限制都唔少,仲要唔平(有個雪花已經貴幾個價位).買Cell2果陣約千二,呢個價夠買個唔錯既營,不過好奇心值幾百,雪花值幾百,難得有減價,手殘就買左返來.

個起營位冇咩特別,只係特別大風,大風好,冇蚊,又可以試到個營.我起營個位斜斜地,估唔到睇落Cell2個營好似易過五方塔,點知錯曬.個地一唔平個低就唔係正方形,我果兩支行山掍係Z-pole,冇得改長度,頂到斜曬,不過都唔係好得,叫做企得到.落釘落左四隻角,再加兩個頂拉繩,又加四支釘,個蚊帳又要四支釘,用釘用到盡.

入黑就起霧,個Cell2就開始作怪,霧水唔奇,但一有水個Cell2就鬆,個料吸水會伸長,平時果尐營都有,但Cell2就好覺,因為頂住個頂果兩支棍移位,加有水滑左,更易移位,再加大風,最後一晚倒左兩次營,半夜唔係好清醒咁起身又要整返支棍試位夠唔夠穩都幾煩.

個營其實唔係好長,四邊都2米,但個人就瞓中間對角線,但頭尾都好狹,個蚊帳四隻角都突左少少出去,中間冇扣位,我自己加條繩打橫,頭尾再加個自動黏貼先可以掛個內帳上去.

朝早營外睇到都唔使起身影日出.

Cell2好處係一個人內籠好多位同埋唔使烏咁低個人,同埋好攩到風,大風都唔會好似五方塔咁壓個邊位,但前題係個營位要夠平先可以夠穩.下次再試另一個營,五方塔同個Cell2都係收好等涼尐先再用.

大城Hea澗

耐冇玩水,上次玩左雙鹿,今次有人話想大城石澗,好丫,我都好耐冇行,順便去試新防水機TG-5.今次都係冇全走,全走大城應該灰穚入,但係開始果陣跟人行,行到去龍泉谷先入澗,仲好,可以多尐時間hea.

防水相機由好耐以前既笨仔,第二部係Panasonic,壞左兩年定三年,有時借個妹果部頂住先,今次終於買返部.質素進步左好多,功能又多左好多,微距果尐手機一定做唔到,個HDR都幾好,有A mode,有時都可以玩老散,又可以全焦距,好夠玩.今次玩澗全程用佢影,好滿意.

去龍泉谷入澗位 

算幾好水

好多位可以爬,落水過又得,側邊有山路行又得.

呢個潭玩左陣,個潭左邊好深.水好涼,好爽.

試微距,可以數腳毛,放上網,夠用有突.

 

游過對面爬上去,唔落可以行左邊,有小路.呢個潭又係好爽.

又係試微距,竹葉蘭

上到肥佬麥,玩左5個鐘,走人冇全走.去食下午茶XD.