熱到爆左

星期六跑青公,本來好有決心咁慢跑個全馬,青衣出發出荃灣西跑青公到三聖來回剛好42km,但太陽太猛,濕度太高,跑左十幾k就爆左,之後見,未屯門轉車站已經大休,到黃金海岸間七仔直頭想瞓個覺先再出發,悶悶地轉左去玩ingress,玩到落沙灘炸下大field食AP hack腳同彈,到左三聖又休好耐先肯返轉頭,黃金海岸間七仔飲一排多多(好爽),再行下跑下,中途遇到藍人行青公清卜土(同起返大field?),我頂唔順去青龍頭坐小巴走人,來回行夠31k就閃.

星期日個天陰返尐,但仲係好焗,悶悶地,去大嶼山玩ingress,諗住一路玩一路行夠廿幾k有上上落落就算,係映灣園玩陣過白芒,又返轉頭,油站見到毅行教室一大班人經過.玩左陣有藍人問想玩咩,映灣園又天橋又圍欄都幾迷,要upv都煩,個卜土炸完又比藍人連返,又唔係彈多過人,最後都轉返上山.

昂平棧道有mission,慢慢行上去,一路行一路連,卜土好密,又炸又落腳又hack,進度緩慢,上到市集又炸下cap下,幫襯七仔飲返支凍飲返轉頭落山,又一路落一路hack返堆腳,落到底再過返石門甲起field食AP.未食夠AP前就餵飽堆蚊,一停就一堆蚊圍攻,一腳一打以上,兩條小腳好似烏鷹貼咁.為左唔養肥尐蚊,好快咁走上去,連曬條棧道既卜土,落返石門甲時已經比藍人炸左兩個最底既卜土,之後數有32個cf,加返炸左果兩個,全部有34個,mu好少,加埋都可能唔夠1k,但AP有唔少,係山到食到咁多AP覺得已經算唔錯.最後行返東涌加加埋埋26k,總計今個月終於夠里數.

back to back長課

轉眼已經5月尾,仲有三個半月時間訓練,長課要加長加多加攀升,適逢三日連假,先休一日,走兩日,還好第一日算涼,間中有雨,天陰,仲有風吹下個人濕度唔算高.第二日仲出到山,跟朋友行香港島,上左幾個山轉到自己唔知行到邊,年年佛誕都好好天,今年都係好好太陽,仲要濕度高,朋友就住我行多尐樹陰位,都轉到過30k,夠曬皮.

第一日朝,約9:15尖鼻咀,又手多見有得hack就hack左先,唔記得要start mission先,等多5分鐘先開始得.起步一路都有水氹,但唔使濕腳,過左魚塘就正常路,但都有尐焗,跑得慢過上次有毛毛雨.出到元朗都係行唔到條最短路線,跑過左個紅綠燈位,最後上左西鐵站穿商場過返馬路.接返錦田公路就易認路,直跑直到回旋處見有指荃灣方向,上到經過軍營,去到個小巴站位轉入去上甲龍林徑,出返荃錦坳上大帽頂.

一路上頂都冇乜力,沿途見到好多人操山(仲有幾個到左蓮姐到再返上頂跑多轉),近山頂時落左場大雨,好彩一陣,對鞋都未濕透,上頂hack完就轉頭,落返蓮姐到食寸魚蛋加支500ml休左陣(hack左陣)先慢行返川龍,端記後面條路落去引水道,左水邊再落見返荃錦公路返地鐵站.

荃灣天橋好多人,人群中左穿右插,再穿商場到如心壙場,落返地面(荃灣天橋真係出名多),跑去葵盛圍經過泳池上返荔景落返美孚,深旺道直出尖沙咀,剛好7hr,同上年時間一樣,只係因為冇食糖水,用少左半個鐘.咁多字其實都未必知點行,啱使就攞去使:gpx

第二日同第一日個天氣完全唔同,開始冇耐已經出曬汗,係個人未爆之前出口術叫朋友唔好去咁盡,之後行左尐行過但又好耐冇行既路,轉到唔知自己行到邊.

朋友住香港島,行後山可以零車費,加上小西灣,大浪灣(仲有凍暖水分),陽明山都有水機,算係低成本操山路線.如果北潭坳,沙田坳,水浪窩,城門水塘都有水機就好啦.天氣熱,好快就謝左,陽明山超市都幫襯過兩次,廿幾k後朋友仲想上多個山,問意見,諗都唔諗就比我反對左,真係上多幾級樓梯都唔願.

返到屋企腳板底緊緊地,希望過兩日正常返.今年七月一行雙尖雙頂(要上多個針山),練好尐先起個mission走返轉(仲要選個陰天日子).

新台同更新Lollipop

今個星期轉左台,為左玩Ingress有咁激氣,個平價台越來越差,仲要完左合約後加價,行山見到卜土收唔到都仲話情有可原,城市位都收唔到真係血壓飆升,有時坐巴士都收唔到,一係慢到過左兩個站都未Hack完.轉台後以前收唔到既地方都有時會收到,今日上過大帽頂,收得好好,話咁快可以Hack完返落山.

另外今個星期部電話ZR有Lollipop更新,更新完好似好正常,當晚去跑個步用runtastic,跑完先知一關螢光幕就會自己斷GPS,全程都冇計過距離,因為我跑圈,最後跑左10km變得幾十米.之後再安裝先正常返.

一年前買已經算舊款,都過左十個月都仲有更新,算有良心

執垃圾

近期天氣都雨粉粉,合長跑,雖然由頭濕到腳但比會熱到中暑好.上星期陪人行又順便做Mission,個位係有尐偏僻,但都有人行,行得果到都預左要行幾遠帶幾多飲飲食食,除非係II啫,題係尐樽全部都係香港品牌,唔似II所為.

好啦,我都知行得長途個人會攰,但一個吉樽又有幾重,隨地拋都係咁攰,少個樽又唔係會識飛,一堆樽係草堆,睇到眼火爆,執到返大路先收手,用個背囊妗袋左成袋約廿個樽,都係咁行返出去又唔係重好多攰好多,真係唔知掉樽尐人點諗.

仲有見到有人學強國咁攞個樽插係樹支到做路標,妖左聲就順手收埋個樽落背囊妗,我唔想香港見到成膠樽樹同成地樽咁恐怖.

兩日短走

朋友問星期六有冇山行,但只有半日時間,近近地又行大嶼山,最好東涌上東涌完,十幾km有上有落,反正打算閒遊,找些Mission路線先探路,下次先玩計時.

忘記之前玩大嶼50/100定KOTH經過簿刀刃,由黃龍澗入口出,應該係最多人行的東涌上山路段.行到水霸過澗上樓梯就見路,路頗斜但唔跣少碎石青苔,要上不算難.

回望水霸

東涌及機場

斜路

第一個頂有斷標一支

第二個頂

又見雞公蛇

見有時間,同朋友上埋蓮花山,剛好有陣雨,一路上山草頗密,鞋濕了一半.經過支標後前面同右邊都有路可下山接回大路,右邊路較好走.

石上紅字與簿刀刃楆柱上的字疑似出自同一人.

返到伯公坳,行舊東涌道接地塘仔郊遊徑,經石門甲回東涌.

約8點半出發,約1點己回到東涌.

星期日有毛毛雨天陰陰,打算試下自己整的mission,點知大帽山頂平價台接收不到,之前明明可以,可能大霧影響訊號.Mission冇得繼續,提早走人返荃錦坳坐51,打算去錦上路轉西鐵入天水圍食晚飯,我太耐冇坐51去錦上路方向(網上查出2014年10月改),而家已經改做循環線,經上村後回荃錦坳,最後我返回荃灣西,見有時間就打算玩ingress一陣,考遇有人起田(同時有人炸田),賺了AP一陣後先入天水圍.

勞動節三連假(後編)

山友群組有活動返大陸行七娘山,事源女姓朋友J小姐見一其友好行七娘山風光明日媚,大文大路,朋友亦不是操山人仕,見朋友行得輕髮,自已就想去,剛好遇着三日連假就揾人帶路,絶對估唔到係惡夢既開始,明顯就揾錯人帶隊,帶隊者行澗爬崖多過行石屎路,即使爆林亦可着露指涼鞋一馬當先(汗).

一朝早去上水坐車到羅湖坐地鐵再轉巴士,有幾條巴士線可選,帶隊有做功課,選了特別路線,車費較貴,但少轉車,有位坐不用企,還好有位坐,一坐就是差不多四個鐘,平時只要1.5小時,勞動節全國出門,塞車塞到坐都攰.

坐地鐵

坐十蚊巴士

隧道內塞車

又見到鹽田港

再轉黃色小巴

近坐車總站時又塞,全團落車行去起點,中途見坐船仔出海觀光

坐了四個鐘車,起步已經係下午近一點,係坐車時已經開始食乾糧,下車後直接行入村,没有時間食午餐,有田有蜂箱,路雖小,但不算密,冇蜘蛛網,以為全程都係這種路,直到見到一大石後轉入乾澗,自認太傻太天真了.

入村

收唔到電話,交唔到卜土

養蜂箱

小路轉冇路,大石左轉,影相後明走回頭

 一轉入澗,蜘蛛網就開始多,還好是細蜘蛛,手指甲上下大,用手食幾個都問題不大,越上越多毛毛蟲,一手捉支樹枝,明明係乾,捉住個位有黑色一糊野,濕濕地,唉,空手殺毛蟲,隻手有排痕,有團友撞到蟻巢,成身蟻.近頂要爬個大坡板,仲見有條百足,加條蛇仔,嚇到團友狂爆粗.

乾澗上

又一個養蜂箱

爆左一段後見石級以為逃出生天,點知行一陣又要爆林

近頂時的大波板

 上到頂見到一陣雲海,之後又係返堆霧中 

由"禁止進入"出來

侵犯版權的標距柱標志

見到正常路,以為可以返回人間

試左幾個位都係收唔到,之後就冇試開Ingress

原來爆左幾個鐘上到個頂都唔係七娘山,帶隊話叫大雁頂,之後又入返林向七娘山前進,比之前好走有明顯路,但都要手撥草,天開始黑但仍在山中睇住GPS log前進,上上落落,我個手機冇電都唔知,好彩朋友一路行一路差電,近大路時已經係晚上九點,跟住垃圾引路終於到七娘山,乜風景都見唔到,氣炸J小姐.

強國特色的膠樽插樹枝路標

山上什多蛙,香港常見的蟾蜍反而少見,斑腿樹蛙最多

花姫蛙

落返半山見到馬路,但有燈冇車,要叫車先可以返皇崗,都唔知有冇人肯來接,價錢一定唔平.最後到山腳已經十點,有公安看守山腳,公安仲叫人接我地下山,團友試叫車,但等了一陣都冇回音,最後公安幫手叫了架七人車,剛好成隊人一架攪掂.又塞四個鐘回到皇崗,兩點,水又冇糧又冇,午餐冇晚餐冇,只靠乾糧過全日.頂唔順,過關幫襯汽水機飲盒菊花茶釣命.三點食麥當當四點先上到床,仲遲過跑完HK100返屋企瞓.

看守所窗上的斑腿樹蛙