壹Ⅹ雙尖叁頂

7月1日趕唔到出發,7月2日補返數,揾左個火星人陪走,佢7月1日已經走左麥3,4加衛徑共35km,今日仲肯陪我50km真係唔話得.8點半元朗行去小巴站,附近食早餐,啱啱好避左一場雨,坐35小巴入到尖鼻咀,10點出發.

落車個天好清,見到對面.

去警局門口開始.

起步地面尐水蒸返上泥,好耐冇咁熱玩咁長,一路走一路諗咩位可以食糖水(可惜最後都食唔到),唔見糖水就去7仔買飲品頂住,一日計落飲左好多野,雪碧500ml,C++500ml,菊花茶500mlx2,可樂x1罐,菠蘿特飲(唔記得名)500ml+1.5L水.

走朗屏,元朗,石岡,轉入甲龍林徑上荃錦坳,揾蓮姐食杯麵飲C++,入水750ml加外帶支菊花茶.個杯麵差尐都冇胃口食.

大帽有零星白合開花,一路到草山都見有

好彩一路上都陰陰地,個人係就爆邊緣.

cp1大波波

落山都見到好遠,見到起步位.

落都差尐跑唔到,行下跑下,鉛礦坳問朋友食返粒鹽糖先好返少少,之後上cp2草山.

落少少係標距柱134對面路行到去電線塔,手指右邊舊石就係CP3,x石(唔記得影舊石).

之後CP4針山

草山同X石後又跑下行下去針山腳,慢慢上,朋友完全唔似昨日行左35km再加今日30km,我就謝曬.返城門BBQ場,賣雪糕伯伯仲係到,飲返罐可樂,又問朋友食多粒鹽糖,之後逆走麥6出返大埔道,落深水埗食陳記魚蛋,唔食得辣,小辣都要係咁飲水.

深水埗行返出南昌接深旺道,油麻地,廣東道,跑到吐血都唔夠時間做9個鐘內,過5分鐘先到.