行過EBC 後就想去行島峰，參加島峰團的話尼泊爾響導會拉人上山，即使唔識雪地技考都可以參加，但我呢尐怕事既都係想識咁尐先去行，有咩事都唔會倒瀉籮蟹。香港冇雪落，最近可以行雪山就係台灣，可惜天氣温暖，報了名成了團，最後無雪，無計。登山社問轉唔轉團，假就請左，有幾多日去足唔好浪費XD，最後就去左無明山甘薯峰。
呢兩個百岳應該唔多出名，最少我係出發前都冇留意過呢兩座山。北二段山難事故後唔比全走，所以原本可以一次四個百岳變左分兩次，每次兩個，根據團友講，無明山甘薯峰比另外兩個辛苦，咁就好啦，因為今次都真係揹得幾辛苦。
出發9.2kg(今次帶個自家製行李袋)
第一日落機就去左寄存行李，再去買山上食物，唔知山上咩環境，所以就唔開爐，咁多日係山上面自己食早午餐都係食乾糧就算,都係餅呀鳳梨酥乾果之類，夠營養夠碳夠纖維。第二朝好早起身食早餐，之後坐車去起點，分公家糧或營。塞個公家營入背囊即刻變左15kg，我尐糧加水估都唔過2kg，即係個營3kg起。一開始係平路，之後落斜，到溪大休再上返山。
第一晚住通舖，涼涼地好快就瞓左。
落斜
見到條溪
過水......兩三個團友唔小心濕腳.
又爬返上山
我瞓既營,但唔係我揹既營.
餘興節目,烤襪XD
第三日一早就有奇事發生，竟然多左個營冇人揹，明明一開始唔係揹糧就揹營，一人一份，響導又冇理由審人捉賊咁攪，最後響導揹多個營，加加埋埋我估佢都揹左最少30kg上身。我之前揹果個營唔知比邊個揹左，咁就揹另一個，一揹就覺得有尐唔同，先諗返起有尐營有前廰，又重咁尐，重要犀牛牌，鬼死咁重。
晨早出發，上呀上，天上好多星，但係個林入面影個鬼，我知點解呢兩個山唔多出名，因為行係個林入面多，對比其他出名百岳個景真係差咁尐。上山上到一個三差位，原本應該係扎地方，但係呢幾日台灣放連假，多左好多人行百岳，營地冇位,只好又行返落低尐既地方揾位扎營，就係咁白揹個一趟，落山果陣仲要加埋公家水同自家水，加加埋埋過硬20kg，落返營地一放低個囊，個人好似會飘起咁orz，攰死我。
無明池,水黃黃地但算清,過濾完飲都冇肚痛.
第四日輕裝出發，一來一回甘薯峰後到焇地收營落返條溪到就攪掂，輕鬆過第三日好多，不過路途長尐，最早起身出發，有尐團友都攰攰地，落山落到腳痛。
太陽都未出已經行左幾k
三人飛溪先係正路嘛,但係到時團費又唔係咁計XD
之前經過係夜晚,落山先發現杜鵑已經開花
傳說係梅花,係耳無溪營地附近.
最後一日就簡單，就是回頭路，上返林道行返出起點.好好彩全程都冇雨，直到全團都返出起點上車就開始落雨，如果條路有雨一定難行一倍。
話說呢個係進階團，團友都真係唔弱，有幾個揹得都唔會輕過我個背囊，行得快過我。最強既係尐團友成日夜晚酒聚飲酒，全部酒都係50%以上,，第二日仲起到身行山XD
沒有留言:
張貼留言