Skin A200

A200出左好耐不是什麼新鮮玩意,只是我之前都是着2XU同NB的tight褲,買A200的原因只是為了夾單夠數,主要是買A400半截tight,兩條又太多(都是錢作怪),但又唔想買短tight,好似短過頭,對四頭肌幫助不大.最後就決定冇咁大壓力的A200,打算輕鬆跑時着,路線要長不用快.

昨日就去了跑香港100的頭50,本來想跟人跑,但攪手後來改做黃石開始,8點半西貢集合,我估起步都9點半,跑50k用8個鐘都開始入黑,我對行夜山係可免則免,所以就放棄跟他們自己一個上路.如我所料過了鹹田士多一上小山丘就行錯路,去了人家的後花園,行少了一個沙灘,只好繼續向大浪坳行.最後7個半鐘就到水浪窩.

A200好好着,我平時都不用花士擰,但會用沙布減少磨擦,着NB一定要用,2XU平路/短線不用,但長途不能少,着A200好啱身,全程冇磨,有上有落有跑有跳都無事.我條腰有條疤痕,少少凸出,着NB長途會磨到損,但A200唔會.原本已經預A200壓力少,着上身時覺得像已用了一年的2XU,但都有少許幫助,如用快步頻跑法,平路作用不大,上斜才感到有拉力.

可能因為天氣涼爽(上西灣山好似有冷氣吹住上山,對比上星期KOTH,真是一個天堂一個地獄),加上減慢跑(因為耐無跑50K長途,前大半程都比較慢,怕撞牆),還有在深涌食豬骨粥休了10分鐘,所以這次好像不太可以做標準,只可以話第一印象十分良好.

家中還有一條A400半截tight,如果A200可以頂得住全馬,A400可能要過了渣打才開封－為了大嶼山100.