TNF100

當年頭以為大嶼一百已經係吐血之最,想不到年尾的TNF100可以更吐血.TNF100本身路線已經叫人吐血,仲要加上今次大雨天氣,真係惡頂.

之前筋膜炎好似好返,上星期玩完樂善都正正路路,今次玩tnf可以証明真的完全康復,全程腳底條筋都冇痛,可喜可賀.

大會早就講左會有雨,我都怕左個天帶多件衫,平時一件風褸就算,今次帶件防水風褸再加件長袖衫,未入黑前仲話兩件野重,入黑後就大呼好彩帶齊兩件,真係少件都死.

賽前跟朋友開22個鐘,有前科樂善過20K就抽,話明跟到就跟.開跑一團人行感覺還可以,大肶實實地但未有抽筋表徵.到CP3都未到1點,比我想像還早,揾人幫手換衫換鞋.

到CP4都仲跟到,但開始攰,唔理朋友自己休多陣,轉個頭已經唔見影,之後上山已經抽大肶,長課不足真係好快抽.好彩換左跑山鞋,上龍山已經成腳泥,着跑鞋實跣死.落山又見返朋友既影,直到CP5,頂唔順,食返熱食先,跟朋友到CP5已經當有賺.

之後上南北大頭羊,對上果次行唔知係幾多年前,上緊山已經入黑又大霧,行幾步就已經抽大肶,行一陣抽下筋拉下筋,未到山頂已經大霧到有燈都睇唔清,不知身在何方,中途凍到頂唔順着長袖衫,到林綿CP6又食返陣着返件防水風褸先再行.之後就係痛苦地上樓梯,上到四方停寒風呼呼吹,近山頂波波位好似三號風球,落到CP7,有個避風營,又食粉絲,一出個營,凍到震迫住要跑,之前冇行過呢段,跟人慢慢走,真係好慢,又泥又亂石,右腳關節痛痛到,到鉛礦坳自己休返陣,慢慢落CP8.食返個一丁飲杯茶,慢慢來,返正快唔到,休完再出發,前後來來去去都係果幾個Ching,又一路行一路抽筋拉筋,落九龍坑要超慢一級一級落.終於見CP9,可以慢慢行都行得完.

最尾上屏風過八仙再爆林,真係想死,KOTH果陣轉眼就到頂,今次覺得行極都有,KOTH果陣跑既位變左做上斜,行到灰灰地.慢慢磨到日出先精神返,不過都係慢慢行,同行既CHING都走曬做24hr,我就好少理,最後果1k又泥過,落山扮有充勁咁跑兩步過終點完成.

Ultimate Direction JUREK ESSENTIAL

標題未必想起是什麼東西,那麼看圖吧:

想起來了嗎?就是Ultimate Direction出的一個超輕腰包,是啊,我又敗了一個腰包,而且要HK$200,當只帶鎖匙身分證到樓下跑步時,之前淘寶那個舊腰包仍是一個好選擇,但放太多東西時便有點不放便,因為彈性,拉上拉鍊時要小心,不然反彈一下,裡面的東東會跳出來,而且不防水,我身上的汗都透進去.預計會轉新手機,"身形"會更大,所以彈性腰包便不合用.

樂善行便是用這個走了會程,它有兩個大袋,一個袋是防水的,袋住小米2S(5寸手機應該唔夠位),另一個袋錢同身分證同一粒鹹糖,還有一個細袋放了一個Market'O,前面還有號碼布扣,不用吉穿衫.開始時一手攞Salomon Soft Flask,起步後跑一會飲一啖,飲了一半已經可以夠位放入腰包,近出咀時食Market'O,已一半路程,跑到出咀剛好可以再入水,不用多,約100ml已夠,之後到沙灘有義工派茶水,跑多一陣到西灣慢行上斜,坳位又有義工派水飲,Soft Flask已經不用再出場,出到西灣停飲汽水後直到最後CP,飲多啖汽水就到終點.

輕巧而且間隔好用,外表有新意,有防水袋(可防汗,拉鍊不防水,大雨要小心),跑半馬至全馬距離合用.

敗小米2S

今次跟行山露營跑步無關,只是忍受不了手機龜速,自動熄機,聴/打電話等問題,轉電話,千選萬選,選了小米2S,是的,部MOTO PRO PLUS已經壞到等不了紅米或MOTO G.

選機條件不算太苛刻,但發現最後選擇原來不多.第一,要平,二千五以下,當年PRO PLUS只不過買了一千元,手機買得貴,懷了就覺得肉痛,反正科技日新月異,過一兩年,賣二千五的電話已經比現在五千的電話還要強.第二,才過五寸,現在個個都想要大螢光幕,但太大,戶外活動不方便,4.5至4,7寸是最合適.第三,2GB RAM,RAM多可保行APP不易死(紅米或MOTO G價錢平,可折衷).第四,可換電,電壞了便要換手機,不化算.(價錢平,可折衷)

最後易買到,又有行貨的,運算最快的就是小米2S.

樂善行

話雖是'樂善行',但跑的多,真是行的話,最少要七個鐘才可以行完全程,所以正常都會跑幾步,跑得多又快的在前,我跑得正常多又正常慢,在中間左右吧,今次腳底没有痛,不過還是會腳底攰,在未由攰轉痛之前,大腿已經先抽筋,所以根本就没有惡化的機會,哈哈.

今年樂善少了高手參加,之前跑四小時三十分已經没有背囊,但今年傳說跑四小時五十分還有背囊,原因是SIG HK50正好在之前一日舉行,再加TNF100在一星期後,樂善出事率亦頗出名,有些人為安全計,不玩為上.

上年跑到百二名內,所以今年可以在種子區起跑,加上天氣不錯,半程出到長咀不用兩小時,比預期還好,但(怕)腳傷缺乏長課下,跑至大浪西約三小時已出現抽筋現象,之後輪流跑,抽,行,回到終點剛好四小時,比上年後了九十個名次.

下年休息轉做支援,有緣長咀見.

TNF100 試路

隻腳又休到唔多覺痛,近日都係休四日左右就可以再跑,但跑十k或行三十k後就又痛過,已經兩星期都是這樣.

TNF頭幾段不算難,荔枝窩程前後可以跑.當然如果我隻腳還可以跑的話早就去了試路,星期日還算好,可以跑一陣行一陣,廿k 左右就開始緊,分段休息.去到鹿頸開始想走,朋友話可以休息下再睇情況,食過豆腐花休左陣又好返些,所以又上路,入村上斜一會已經行錯路,上斜見到衛徑才知不對,回頭再找路,花了半小時多,連朋友都轉軚到五十一百分差口就走.

五十一百分差口跟了另一團人,都是熟口熟面的比賽常客,之後都是走馬路,再經村,總之就最快路線,一入村就下大雨,我跟朋友跑到粉嶺火車站時已經由頭濕到腳.

大約知到頭40K路線的時間,後面的路都行過,但時間就不知幾耐,到時再算吧.

是上上星期的事,轉眼到上星期日,又去試路,應該是全100K最少人去過的路段:龍山.如網上所說入口好易錯過,我走多了七百米才記起,回頭上斜用了不少腳力和時間,之後上山頗密,四支都花了,上了山還要下山,下山還好一點,不過遇到野豬,被牠嚇了一下,回到馬路又被狗追,証明平時什才人行.回到城市位又迷了一小段,加埋山頂上小休,全段已經超時,比大會用多了半小時,今次行過,下次應該可以用少一小時,希望入黑前可以到火車站,在大刀刃上看日落就更好了.

毅行陪行

雷利後休息一段時間隻腳又好似正常,試過跑幾公里都無事,剛好遇着毅行,年年都有陪行,之前兩年都是要陪跑,前隊友越來越快,先十七小時,再來十五小時,今年自知跟不上,幫不到忙,轉陪另一山友.

朋友那隊目標廿八,臨時組隊,朋友實際可二十內.約沙田坳等,我早到一點等另一隊,行一會呃相影,鼓勵幾句就回頭等原本約好的朋友.等了又等,最後發現朋友已經走過了(男人就係咁,約好就係,見到就見),發現時已經過了四十五分鐘,還好他隊友不會跑,我跑了一個鐘多點就在金山公園上斜路時追到.

追到之後輕鬆得多,行一會休一會,他隊員按時間表做事,快了就休,夠鐘就行,步調輕鬆,雖不快,但明顯表現得經驗豐富,我亦樂得跟朋友邊行邊聊,幫朋友趕走一點睡意.

今年多了很多美食,有些是之前没有,如走私坳的飯團,朋友話基圍爾有真材實料雜菜湯,草山山腳有腸仔,有人話前年已有,但之前由荃錦坳開始,未有機會一見.

陪朋友到荃錦坳隻腳開始有點緊,唉,只有三十公里,收腳回歸.朋友繼續努力,九十段仍然没有跑,但都可以廿七小時內完成,可喜可賀.

說回我隻腳,星期六朝行完,星期日陪個仔行了幾公里郊遊,星期一休息,星期二放工跑了約13K,今日又覺有些緊,又休一兩日看情況.希望星期五可以跑個10K,星期日再行TNF一小段約30K.

好得太遲,又傷過

十月二十五日下午八時開始,156k的比賽,由南涌出發到香港島大潭水塘再回南涌,用了約二十小時到大潭,休息約一小時才出發,短短的第一段用了兩小時,過了廿三小時才行了八十三k,還有七十三k但沙田坳有時限,以回程的速度限時到沙田坳的機會不到一半,加上腳板底痛,我提議剪帶.

隊友十分希望可以到100K,如果100K,剪帶位會是沙田坳,應該是深夜時間,冇車可以坐,那時沙田坳亦是十分凍,身上衣物不足應付,我不讚成,隊友亦見諒.

心當然是想完成全程156K,但事前已不敢有大期望,比賽前兩星期才可以再行山,中間還有幾日腳痛,最長只行過25K,對上行比較長的都只有36K,已經是八月頭的事,加上第一次玩過150K的路程,有些還是想像之外.

夜晚出發,一開始就行通霄,到沙田坳就已經眼瞓,我對眼已經是白兔眼,剪帶後瞓了一夜還有半隻眼充滿紅根.

休息,眼瞓,腳痛,時間,體能互相影響,不休息的話可能未行到一半就要剪帶,但休息太多没有時間亦要剪帶,操練不足是主因,一個月前康復還有時間操個50K,但半個月才康復實在太遲.

結論是16小時內最好可以到大潭,完成一半路程,瞓一到兩個小時,休息充足再回程,過了18小時已經是剪帶邊緣.南涌去沙田坳約50K要9小時內完成才算安全時間.

今次是很好的經驗,希望下次過150K的比賽可以完成.

83K剪帶後幾日只覺得腳底肌肉痛,但過幾日又覺得筋痛,要慢慢行,好有復發危機,貼了幾日運動膠布出門,亦不敢行快,下星期先有機會正常地行,下星期尾才有機會跑.

運動膠布

上次行完20+5後,奏個仔返學時,連續兩日個仔扭抱,抱了兩日後就出事,腳板底又痛痛地,之後幾日都慢動作,行快步都不敢.

星期六零運動在屋企呆,預備星期五行通兩晚頂,星期日去旺角買運動膠布,二樓樓上舖,90蚊9 折,比y拍賣還要平,回家試用,出門行了一陣,好像没有什麼用,可能當日才發揮到表現.

足底筋膜炎貼法

今日收拾定部份比賽用品.看天文台,今年天氣不錯,希望到時雙腳都正正常常,兩次日出是必然,希望没有兩次日落,如果三次用頭燈,就太悲慘啦.

試20+5k

三連假最後一日覺得雙腳冇事就再去試長些,仲要着所羅門,先着厚篾,諗住保護會好些,但所羅門比較窄,有時打橫行上斜會夾腳邊位,南涌出發過了八仙就覺得有些痛,但除鞋摸又冇痛,最後過埋九龍坑就大休,約四小時廿k,跟之前夏天未好傷時差不多速度.

之後又行五k到就上鉛礦坳時換蔑,但已經太遲,行起來已經覺得痛,心想慢慢行,但又遇到朋友下山去大埔食下午茶,又乘機走人.

今日腳板底側已經没事,反而條筋有點緊,按又没有痛,慢慢來,休息多日再試.下次放工試青公,跑廿k,再休息,星期日換返美津龍又試南涌.

今日正好十日倒數.

返到家鄉?

隻腳傷左三個月有多,真係三月零八日,之前以為就好就好,都係未好,望見家鄉好耐都未返到,今次又買新鞋又轉腳法,好似真係返到家鄉啦,朝早返工跑快幾步都冇事.

而家全腳跟落地,新鞋備震好,腳跟落地不太狠不太大步都不是問題,已經一星期不覺得傷腳,之前一直都是快些就緊,再快就痛.今次快左都冇痛,幾日都正常就試跑十k,終於跑完都冇腳痛,雖然仍然好慢加會小腌痛,受傷那邊腳板底有些特別熱之外,没冇好緊的感覺,實在太感動.

休息一日後,今日終於有機會同隊友再操山,只行一二段,太古去大潭,約十二k
有上有落,比上次有傷慢行快一倍,兩個鐘十幾分鐘行完,如果比賽當日有這個速度應該算得上十分快.

三日連假,還有明天後天,明日醒來如果隻腳感覺良好可能會試慢行長途,過夜更好.

又跑...又緊

兩個星期前話不再有針吉,上星期買新鞋,試兩次短短的約5到6K,無事,再試跑街,試個12K,又故態復萌,5,6K左右又緊,不過比之前好好多,不會有針吉,但緊的感覺不利跑,再跑就會痛,再痛就會吉,以防萬一,又行下跑下回家,12K跑了個半鐘.

又休兩日,没有針吉,但還是覺得緊,按下去會痛,雖然可以行,跑幾步都没有問題,但快同長都是不用想.減速,再輕步,再減少腳板屈曲,遲些再試,希望可以跑長些.值得恩惠的是之前跑到痛要休一星期以上,現在跑到痛休兩日就回復好似正常又再試腳.

當然最好是點跑都唔會痛,有心有力但又痛住跑的感覺實在太差.

Adidas Boost

兩個月之前買左對所羅門,今時今日係着軟左,理論上備震無問題,問題在我的腳,Ultra2又好似窄身些,雙腳迫住,總之就係唔傷都無事,傷左就着得唔多舒服.跑鞋就只有美津濃RIDER 15,上年12月買,都仲着得,只係備震不可以求多.

總之着極都冇對着得我合心水,最後就心思思又買鞋,原本想買Tarther,但係自己去按過對BOOST隻料真係彈過魚蛋,試着後就乖乖比錢.

比RIDER15買大半個碼,鞋頭有彈性貼腳面,買左第二日試跑,隻腳都仲有尐尐尐唔順暢的感覺,係因為我未百分百康復,唔關雙鞋事,對比RIDER同Ultra2,感覺十分明顯不同.

運動加只有兩款可選,最貴最輕那款没有,之前去過一般運動舖都没有boost賣,Adidas 專門店有齊,但没有折,最後買中價既energy boost.

第一次試鞋行出街,鞋底已經變色,energy boost的BOOST最厚,但腳跟位中間没有再加一層鞋底,出街一次已經發現有一個小崩塌,如果碎石路,可能會塌一大堆,想買些鞋底貼希望有幫助.

着這對新鞋去運動場跑了4km,没有即場不適,第二日亦没有事,隻腳真是康復在望,近期都會着這對鞋跑短途,之後才混合着Ultra2同RIDER 15.

跑得啦,但係......

真係好呆,呆在平地的日子還真難過,陰天好風時,山友都在山路上飛奔,晴空萬里時山友都影藍天白雲,只有我呆在家中或是同老婆行街去老鼠公園,雖然開心,但就是欠了點安多酚.

轉眼又呆了半個月,之前以為行路没有針吉已經是望見家鄉,那知現實還有一段距離.行是没有事,但距離長一點,付重多一點,行快一點就會很快有酸痛的感覺,不想再傷就乖乖的停下休息,第二日醒來就没事,不斷重複,酸痛休息酸痛休息,現在已經可以跑一段距離,就是短一點,我估1km左右吧,現在是適量復健 (Optimal Loading)時期,很想跑10k,或者上山跑,但怕Over Loading,得不償失,我十月要行的是156km呢.

浸熱水,按摩,拉筋都有,再食葡萄糖胺,盡人事吧.

休極都未跑得

之前明明可以跑下三十幾k,休息幾日後跑個半馬,又痛過,隻腳板底條筋好似豆腐那樣易爛開,之後已經去到什麼都不碰的地步,不跑不走不轆不拉筋,除了一般偏慢的步速返工放工外,家中每步都小心翼翼,休了十天都有,放工行快幾步就覺得緊,對自己隻腳除了火大外就是超火大,隊友訓練加速加長,自己就行多步都怕受傷,之前操練都白費心機,平時可以去跑步的時間就會心情超差,只有兩個月時間,希望隻腳生性尐啦.

星期日去香港島慢行頭兩段,上上落落,樓梯級連綿,還有大上斜,行下休下,人唔攰,只有腳板攰,行完冇痛,最少冇之前針吉的感覺,回家還可同個仔去行街.

今日返工隻腳仲緊過星期日,真係化學過豆腐渣,但係按落去都冇針吉,希望只係肌肉酸痛.

中層保暖衫

前幾日已經立秋,即是可以算是秋天了,雖然是行幾步已經出汗,但對比之前的日子,朝早夜晚明顯清涼一點.夏天時已經開始睇定秋冬裝,香港最凍都還有幾度,如果跑山一件長袖中層應該足夠有餘,但如果是露營看星睇日出,還是買羽絨吧.

CRAFT我着開S碼,但之前的都是夏季衫,這次是冬季衫,S碼仍然可以穿下,但中碼應該會比較好,穿上身就好貼,長度都還可以,但手袖太短,希望着多幾次會長返.

Columbia的S碼剛剛好,手袖都合長度,有姆指圈,銀色面質料有點膠,但感覺還可以.兩件都未有得試,最快都要十月才可能有幾會用得着.

休足六日

上星期腳板緊收工所以決定休息充足再試同一路線,再由南涌出發,今次已經算盡休息午餐時間,但最後時間都快不了好多,還是平均時速未夠5km/hr,我對香港島那兩段的印象實在不太好,當年陪行只由沙田坳開始到雷利起點可以用痛苦形容.

今次可以大約預計頭段時間,由南涌到太和九龍坑山腳目標時間可定4hr,再到城門約3小時.城門打後要他日再試,估計到油塘要5hr,港島段就應約2.5hr,不過仍有很多加減因素,例如夜行,入秋,睡眠不足等.

好耐無試50km長途和夜行,今個星期可能一試.

欲速則不達

上上星期六行了一轉35K後問題不大,休息三日到星期二再跑,朝9晚16,星期四再去運動場試跑800m,1K,跑不到以前的時間,但腳都没有大問題,攰是一定的,但攰得比以前快,回復能力都比以前差,星期六本來去跑30K,但跑了10K左右,再現上上星期跑20K的情況,腳板底緊,回程又是慢跑,最後25k就收腳.下午出門行街都是慢慢行,怕又整傷.

星期日終於又可以見到隊友,第一次一齊行.朝早天氣比較熱,但比之前已經算好好,一時陰一時晴,隊友精力充沛,我比以前消耗得快,體能同水都係.往年七月走長途比今年長十k以上.飲水量比上年多,加上衛徑的士多不多,如果依正路線行,南涌要過了九龍坑再過碗磘才會經過一間士多,早已變成人乾了.

9+16 + 8 + 25 + 22+15,上個星期里數只有96k,離第一目標還有60k的距離.今日腳板底還是很易緊,可能休到星期六再戰同一路線.

儲里數中

對腳剛剛康復,腳板底跑了幾次都没有大問題,星期二開始加多些里數,朝早在家附近跑了約9 K,放工跑回家有16K,這樣一日就有25K了.今日再去運動場跑幾次短跑,還不大如前,1K過了4分鐘,連5個四百都保持不到2分鐘一圈,退步不少呢,希望不要再傷但又可以加強里數同速度.

下星期二有時間的話再試運動場10K,希望50分內,都不敢希望46分.今日快快慢慢加加埋埋又有8K,兩日就33K了,星期五休息,星期六再慢慢慢慢跑30K,星期日再約隊友行四十K以上,今次想由南涌開始,到大埔道已經有40K,如果時門還早未入黑可以加料到沙田坳幫襯埋士多才回家,行返落黃大仙的話有50K,我想太多了.

現在一路寫BLOG其實都一路轆腳板底,以防復發,運動場跑得快,單方向又常轉彎好易傷,所以我不是練速度都不會去運動場.

連續兩日跑以前都試過,不過少兩日都跑長,廿K加廿K已經夠跑全馬.當年毅行前5段,後5段連續兩日跑完,實在值得懷念.

9K

16K

防水袋仔

之前係淘寶買左十個防水料做的袋仔,但強國還真是不能抱太大期望,個個大小不一,索帶不同,雖明知會有差異,但比想像的多,索帶連扣都没有,商品同圖文不合,不過好平,一個四蚊有找.

現在只用有扣的袋仔,没有扣的可能下年露營時才用,跑山時任雨打,跑步背囊没有防水套,雖然是冼水,但濕得耐都是會入水.之前都是用保鮮袋袋衫,電子用品,雜物等,但用一兩次就爛,自己都覺太浪費,所以就買這些袋仔,逢口位不可靠,但不是去浸它下水,防雨一般應該不是問題.

前幾日試行衛徑都有幾陣大雨,背囊有入水,但我用袋仔裝的衫同風褸仍然是乾的,証明没有問題.回家後洗一洗,風乾,下一次又用得.我試過用它戴水,竟然逢口位没有漏水,比想像的逢得好,一星期用一次,一個應該最少可以用一年呱.

今日又試過跑步袋電話同衫,一起跑就落大雨,由頭濕到腳,返到屋企附近收腳,衫同電話都冇濕,覺得好抵用.

最大的一個,其他比較細約四份一至六份一不等.

近拍防水料

試行衛徑油塘到大埔

之前一星期隊友已經行第二次油塘到城門,我就一直腳傷,直到昨天才行第一次.今次着t美記跑鞋,9成都是石屎路,着跑鞋輕問題不大,除了有幾個位多青苔,不過跑山鞋一樣冼,不如跑鞋好了,輕一點.

油塘起步天氣不錯,天陰有微雨

頭三個鐘都是這種天氣,頭頂一舊雲,有時有陣雨,地面一定有水.

意想不到士多竟然没有開,我想食豆腐花,仲有汽水同加返D水.什麼都化為泡影.

好耐冇睇過望夫石,平時都是行麥徑.

走去BBQ場買汽水,但仍然買不到水,只有約250ml水走到大埔才有士多救命,但人已經謝了.

之後去九龍坑山的路好迷,雖然對上一年最少行過三次,一次KOTH,兩次同朋友.最後35K走人,對腳少許痺,腳板底有些攰,但今日已經問題不大.

新跑山鞋

本來想試其他牌子的跑山鞋,吸引之處就是輕,同平,但剛剛筋膜炎,安全起見都是買對保護好些的跑山鞋,而且欠一對防水鞋,着開所羅門就買Salomon XA Pro 3D Ultra 2 GTX.

比第一代,鞋頭比較窄,頭兩日着都有夾腳指的感覺,着到第三日才覺好轉.鞋舌比較短,索好鞋帶後想放回鞋舌的小袋,小袋卻被鞋帶壓着,要拉個袋仔時也不容易,本來為方便不用綁鞋帶現在卻覺得不方便.

防水跟保護依舊,腳底弓位比一般鞋好.鞋底仍然是冼,雨天要小心平滑路面.鞋面扣着鞋帶的位仍然是同一種設計,其實我覺得這樣突出來會比較易爛,不知會否有第三代,希望第三代時會改鞋帶穿法.

今個星期未必可以跑山,出到山都應該不可以着新鞋,一來鞋底仍未着軟,跑起來不順,二來鞋頭仍偏窄,我怕長途會起水泡.衛徑多石屎路,着跑鞋也許是個好選擇.

題外話是今次買鞋是在元朗雄峄買,會員價有75折,但都要$915,多年前買第一代只要$800啊,但雄峄已經是最便宜選擇,不然就等,等到12樓做折,還要有VIP,還要有碼,還要有合心顏色...算啦,入元朗食餐好,順便買鞋吧.

再試腳

唔跑唔知隻腳好,係健復期間,隻腳無痛又唔等同好返,之前跑兩k 就覺得條筋緊,到星期六再試已經好好多,跑了七k 才開始緊,之後就停下行下慢跑下,兩個半鐘跑廿k.

星期日隻腳冇大異樣,雖然未完全康復,但應該可以跑到就出門,打算腳痛就行回家.結果比星期六還好一點,跑了十k才開始覺得腳板底筋拉緊,又行下跑下回家,未夠兩個半鐘已經跑了個半馬,還有時間去買早餐回家.

今日返工又緊緊地,但又無痛,感覺就是拉筋就覺得痛平時無痛的程度,又休幾日看看隻腳什麼反應,希望只是條筋攰而不是傷,有望今個週末完全康復可以長課操山.

康復中

上上星期開始傷,上星期都未好返,休到今日可以慢跑試腳,這兩天都用呀囝個波轆腳板底,轆三至五分鐘,睡前轆一次,瞓醒轆一次,有拉筋效果又唔使出汗.

今日隻腳板底都仲有少少緊,慢行短途冇事,夜晚跑了三K,開始慢,覺得無事才跑快些,跑了兩K後又覺得腳板底有些緊,安全起見又停低慢行,回家又轆腳板,現在一路打BLOG都一路轆.

明天仍然休腳,星期六再試,希望到時無今日咁快緊.

呀囝個波

操山老友:筋莫炎

今個星期本來係想同隊友跟隊行衛徑,可惜腳板痛,星期五還是好轉中,可能做掌上壓時屈腳指不小心拉到又傷過,星期六同老婆行街時就痛到要慢慢行,一步一痛,星期日就這樣子泡湯了.

出不到山的日子可以做什麼呢,主要就是養傷,但我好到七成時就會去試下行快幾步,結果又傷過,有時真是不小心,例如今次.其次就是練其他位,長跑網上介紹的七分鐘運動,我練其中幾個,無影凳,掌上壓同撐體,無影凳練四頭肌,上山落山都有幫助,掌上壓同撐體有助跑跳平衡,減少跑山跌倒受傷機會,亦減少消弭,但不會固意練老鼠仔,太多肌肉會增加消弭.

以前都因為筋莫炎看醫生,最後得到的是一支冬青膏,最後開都没有開.之前我遇這種情況我都會暫停行山,休腳休成個月,但今次没有那麼多時間,只好用藥,最易買到又好似有作用的外用消炎藥就是下面那個:

如果有朋友話我知更好的消炎藥,到時再分享.

防水風褸(後話)

禁運終於到手,應該十分高興,但貨未到手,個價已經減一成,因為我買的那個購物網竟然係在落單後半個月就由八折改做七折,實在太傷我心,差了百幾元,夠我食餐好又或者比跑步比賽報名費.

我買的是marmot的Super Mica Jacket,有super的分别是比較耐用同比較重,重多約五十g,但防水接位比較好(佢話),腰和肩都有耐磨料,希望真的有作用.這件手感算軟熟,以前那件比較硬,還未試過可以壓縮到幾細,應該不比以前那件大,但一定比防風那件大.第一次着時腋下那拉鏈有點頂住,轉少少位置便没有問題,試拉開拉鏈,順手一拉就得,比賽可能會開着跑,未知會唔會有其他問題.

我上圍36吸氣約38,中碼偏鬆,但跑山比較大動作,我怕如果選細碼舉高伸直手會縮上去,玩要四腳爬爬的比賽(如大嶼100)就會唔就手.

近期都未用得着,夏天總有機會,試完再寫用後報告.

雙尖雙咀正日

正式活動反而没有什麼特別,路早已經定了,特別在一齊行的其他同行人士,有跑得快但又慢慢嘆的火星人,又有跑得快但又唔想咁快完走去跑長線的火星人,仲有拍住拖由尖鼻咀半行半跑到尖沙咀的兩公婆,各式各樣同樣目標但各有路線.

我只做陪行,我定的路線未算最短,但應該曬得最少,正日好好太陽,比之前兩次試路都熱,好彩有試路,行左行右曬少些都知,知到邊到有得食,有冷氣嘆,少人迫,雖然唔快,但行得順暢亦唔太辛苦.
尾段曬就跑,陰就行的策略亦不錯,有速度又曬得少.第二日還算是正常,只是腳掌好似有些發炎,還可以正常行路,跑就要停幾日.

午餐下午茶照食無誤,最後完成時間都比上次全走要快十五分鐘,順利完成心滿意足.十分感謝大會工作人員,中途同行的鼓勵,仲有吹水閒聊無咁悶,使全程都好愉快.前頭的火星人只用了四個鐘左右便完成,三十五度呀,三十七K,時速八K幾,中間仲有上山,不愧為火星人.

當日路線,約七小時四十五分完成

雙尖雙咀再試路

星期六三號風球,雨不算大,以為再試路都只是行到荃灣再跑多十K左右就收工,估不到,尖鼻咀邊境路的去水實在太差,今日起步不久便見到幾個"大湖",而且水深及膝,頭兩次還可以靠鐵絲網好似'爪佬'般爬過去,但第三個已經没有希望,一定要除鞋,水一定不清,水底下有什麼就不要想,踏到軟淋淋的東西,那感覺比着鞋踏到牛糞更難受百陪以上.

因為多了幾個湖,所以開始時十分慢,又行錯了一小段,上次行三k今次行了五k才出到大路,浪費不少時間,不過之後頗順利,中途有幾陣雨,清涼一點,可惜不減悶熱.

今次比上次跑多了,雖然都要跑一陣等一陣,但到深旺道都有慢跑已經算不差,我只是等一會便又起步.最後不用八個鐘便完成,雙腳感覺還好,坐巴士回家不用轉車,行上斜回家也没問題,星期六的慢跑深井來回實在太慢,今次又係慢跑,近期雖好似跑得長,其實慢到不似跑.

肥已減,但血管未通,仍須努力.

毛毛雨跑青公

對上星期日又回復天陰有雨的天氣,上山會行到一腳泥,加上自己未返到長途操山水平,求其跑長課就算,慢慢跑細細步,用前掌,減少大腿用力,由荃灣跑入元朗食午餐,再跑返轉頭,夠鐘就找最近的交通工具回家.

上年最長一課由青衣去元朗再返青龍頭,希望今年打後時間可以試更長距離,一早出發應最少有十五小時可跑,耐力係另一會事.

還有想過跑通頂,應該會好悶,跑馬路跑過廿小時,不過可過一百k,又不用其他人支援,係最便宜操練方案.毛毛雨慢慢跑就是會一路跑一路諗奇怪的事.

最後跑了38k不計食午餐用了約五小時,8k/hr都没有,應該算很慢了.

雙尖雙咀試路

朋友的朋友的朋友...不知經過多少人傳播到我面簿,一個十分有趣的活動:雙尖雙咀.

很多年前跟過這隊行山隊,隊中不少火星人,我仲記得那次行程叫七塘連走,也有約三十K,不過全日下雨,夠七個塘就走人了,大隊還未夠喉,要去加料,我已經夠到吐出來,跟朋友逃上巴士回家休息.

由開頭到元荃古道入口不知如何行,所以端午節去試路,一路天陰,間中有細雨,選平路石屎路而行,到荃灣後轉回家方向,朝十晚五都未到已行三十K,網貢記載最短路線約三十七K,但各GPS記錄距離有差異,預多至四十K亦應可夠時間到達尖沙咀.

 元朗坐小巴總站下車向下行見警崗

 之後向下行轉向天水圍方向

 遠眺天水圍

 行了很多馬路後到大棠,但還是要行馬路

 全程八成以上是石屎路

 中途跟麥徑,因為短尐

 很快就到荃灣

天陰有煙霞,什麼景都没有

 荃灣西對出

到這裡再慢慢回家

復操

由大嶼一百開始至今近三個月,短途hea行零跑步,好玩好食,心肺功能變回普遍人,心廣體胖轉眼就加了七磅,即是揹多3升水有多上身,雖然應該還可以玩多一個月都未遲,但早一個月就當熱身.

星期日跟隊行三十k左右,我只行了十幾k已經覺得好熱,一路都少樹陰,有樹的地方卻是密林,焗爐般熱度不減,行了廿k 已經用了四個多小時,才到黃石碼頭,受不了,像死狗般伸直腳扒在枱上,頭痛像發燒,事實上我頭的熱度比發燒有過之而無不及.

同行火星人等我休息後又夾我行去嶂上,食過麵和豆腐花後終於回復正常,一路都天陰有雨,經麥徑,上雞公山前左轉落大網仔,坐小巴回西貢散隊.

裝備已在標籤.

 開步上大枕蓋

 上南蛇

南蛇腰好密

防水風褸(前話)

三年前去台灣環島,出發前買了一件防水風褸,當年没有上網購物的習慣,只在網上找資料,八卦幾個牌子,最便宜的就是Montane了,要好一些的,便更貴更重.當年帶了很多架餐去台灣,還包括一個單人營,多到連租車瘋的鳥哥都叫我放低一半才好上路,寄存不另收費,怕我踏不了回來,還給了卡片地址,萬一要寄行理應怎麼辦,說了不下一萬字不用帶這不用帶那的,哈哈哈,這都是題外話.不幸的是這件防水風褸買後不夠五日,用後不夠兩日便被我一個雨中炒車兩袖都破了,還好的是破的不是我的雙手.這幾年來都帶它去過不少地方,走過不少路,所以被我着得殘殘破破.

當年買這件約八百元,現在已經没有這個形號了,前幾日我有專程去問過價,不過是高一級的形號.這件防水一萬,透氣八千,慢行還可以,行快點已經焗到出汘,雨中踏車還是會出汗,不過總比全身濕透好.前幾日隨了問價,當然有試着,我試Minimus Jacket,感覺好似真是透氣些,透氣度二萬五啊,當然價錢同時高一個檔次(一陪以上啊!!).另外還試了Minimus smock,這件用料一樣,同樣透氣度二萬五,更輕,更便宜,但比賽用時會有些不便,因為要過頭穿,没有全開拉鏈,這件價格跟上網買連運費相差不多,如果有九折,已經是入貨價.

重度用了三年,包括旅行比賽,算是回本,我覺得入門用算合理價,一分錢一分貨,旺角賣這品牌的行山用品店的店員亦招呼周到,介紹詳盡,如果有八折的話,我應該會買了Minimus Jacket.就是因為没有折,所以轉移目標上網買了另一品牌的防水風褸,那就是後話了.

香港可以買到這品牌的店很易找.

壓線已經甩脫,頸位已經不防水了.還有其他千瘡百孔的位置,不過没有拍下來.

大東觀日

今星期太陽發功,兩日都三十幾度,藍天白雲,應該不少人上山看日出影日落,鳳凰一定多人,山頂上幾十人一齊食風等日出的情況遇過很多次,所以明知會多人的日子我都會去其他地方,例如大東山.

大東山會少人嗎?不是,但一定不會一堆人站在山頂,大東山頂反而甚少人上,而且有石屋可以擋風.但大東山的霧也是出名的,假如有雲海一片,鳯凰看得到,大東未必看得到,大東看得到,鳯凰卻必定看得到,

大東看日出亦可用鳯凰觀日的策略,近日出時才從伯公坳出發,但我卻很少這樣做,因為上大東山上有水可用,即是方便煮食,即是可以慢慢嘆,即是露營,如果用鳯凰"突擊"的策略好像有點浪費.

夏天已經三十幾度,但大東山上大風依舊,一定要帶防水風褸.今次没有帶睡袋,只帶一個睡袋套已經夠暖.營要帶個夠擋風的,要拉繩落營釘,我的平價淘寶營整晚都被風吹到變形,內帳頂着我個頭,還好霧氣不算大,如果有雨,這樣吹法,一定入水,成晚不用瞓.

日出成果如何呢,就是如此:

 有一秒見到太陽,其餘都是海面反映的陽光

日出後過多兩個鐘,藍天白雲,但九成人都已經下山了.

一田敗家記

近期家庭主婦的最熱話題之一應該點都離唔開一田,我都去左轉同人迫過,最少比人車了三次腳,小腿出事率最高.

第一時間去行運動部,可惜好的不會平,平的不會好,又或者已經有.

我見有Vaude Splock 28 Backpack,只要440,可惜我已經有個28L,唔會買多個,我覺得這個價都幾抵.另外就係見到好多超輕風褸,不過平的都不防水,約15D,話有加防水塗層,即係用幾次就没有用,主要就是我已經有,無需要買,我想買的最平都要五百幾,不如我上網找,又或者等旺角行山店做特價.鞋就更少選擇,我只想找防水的跑山鞋,全場都没有.其他有考慮過的還有泳鏡,但近期不常用,家中那副只是鏡片花了點,還可以用,所以又放棄了.

我見有Hanes T-shirt賣,3件99,可惜之前己經在網上近5成半價買了3件,摸過現貨,都幾輕薄,手感舒適,平常瞓覺出街都合用.

轉戰家品時發現保温壺特價,於是選了個最合用又便宜的,價錢二百以下保凍7小時又夠闊口就合用,壺的上下還是防撞,本來是給小朋友用,但帶上山用應該都不差,夏日炎炎山上獨食冰凍甜品的必需品,290ml應該夠心滿意足了.